រាជធានីភ្នំពេញ ៖ រឿងរ៉ាវចម្រូងចម្រាសជុំវិញការប្រកួតរវាងកីឡាករម៉ាត់ ឆ្វេង មកពីសមាគមកីឡាប្រដាល់ក្រសួងការពារជាតិ និងកីឡាករថាន រ៉ាឌី មកពីក្លិបសម្រែករាជសីហ៍បង្ក្រាបគ្រឿងញៀ.ននៅលើសង្វៀនទូរទស្សន៍រាជធានីភ្នំពេញ
រាជធានីភ្នំពេញ ៖ រឿងរ៉ាវចម្រូងចម្រាសជុំវិញការប្រកួតរវាងកីឡាករម៉ាត់ ឆ្វេង មកពីសមាគមកីឡាប្រដាល់ក្រសួងការពារជាតិ និងកីឡាករថាន រ៉ាឌី មកពីក្លិបសម្រែករាជសីហ៍បង្ក្រាបគ្រឿងញៀននៅលើសង្វៀនទូរទស្សន៍រាជធានីភ្នំពេញបុ៉ស្តិ៍លេខ៣ កាលពីថ្ងៃអាទិត្យ ទី២៩ ខែមីនា កន្លងមកនេះ បានធ្វើឱ្យលោកអាជ្ញាកណ្តាល ងួន និត ឈឺក្បាលយ៉ាងខ្លាំងដោយសារតែភាពមិនចុះសម្រុងគ្នារវាងគណៈកម្មការរៀបចំការប្រកួត ។
ការប្រកួតនៅក្នុងទឹកទី១រវាងគូនេះ គេមានការចាប់អារម្មណ៍ថា ថាន រ៉ាឌី មានចេតនាលក់ការប្រកួតរួចទៅហើយ ធ្វើឱ្យលោករត្ន សត្ថា មន្ត្រីសម្របសម្រួលការប្រកួតបានព្រមានកីឡាករទាំងពីរភ្លាមៗថា បើមិនប្រកួតឱ្យអស់ពីសមត្ថភាពទេនោះ ប្រយ័ត្នគេដេញចុះពីលើសង្វៀនលែងឱ្យប្រកួត គឺពិតជាមិនបានប្រាក់តម្លៃខ្លួនឡើយ ។ ការព្រមាននេះឃើញថា មានប្រសិទ្ធភាពគ្រាន់បើ ព្រោះថាក្រោយពីធ្វើការព្រមានរួចមក កីឡាករទាំងពីរបានសម្រុកចូលវាយគ្នាទៅវិញទៅមកយ៉ាងសាហាវ ។
ជាពិសេស ម៉ាត់ ឆ្វេង តែម្តងបានសម្រុកដើរចូលវាយម៉ាត់ទៅលើផ្ទៃមុខ ថាន រ៉ាឌី ពេញៗធ្វើឱ្យ ថាន រ៉ាឌី ផ្ទុះកំហឹងស្ទុះដើរចូលវាយម៉ាត់សងវិញភ្លាមៗបង្កឱ្យមានការចាប់អារម្មណ៍យ៉ាងខ្លាំង។ បុ៉ន្តែការប្រកួតទាំងនៅក្នុងទឹកទី១ និងទី២ កន្លងផុតទៅនៅមិនទាន់មានប្រតិកម្មអ្វីកើតឡើងនៅឡើយនោះទេ លុះចូលដល់ទឹកទី៣ ម៉ាត់ ឆ្វេង នៅតែបន្តដើរចូលវាយទៅលើ ថាន រ៉ាឌី ដូចខ្លាត្រូវរបួសធ្វើឱ្យ ថាន រ៉ាឌី កាន់តែឡើងកម្តៅបង្ខំចិត្តវាយបកសងវិញទាំងកំរោល បុ៉ន្តែរាល់ការវាយចេញរបស់ ថាន រ៉ាឌី ចូលចំគោលដៅបានល្អជាង ។
ការវាយម៉ាត់ បូករួមទាំងស្នៀតជង្គង់បុកចូលមុខ និងពោះទឹក ម៉ាត់ ឆ្វេង ពេញៗនោះមិនត្រឹមតែមិនអាចធ្វើឱ្យ ម៉ាត់ ឆ្វេង ដកថយនោះទេ ផ្ទុយទៅវិញកាន់តែធ្វើឱ្យកីឡាកររូបនេះផ្ទុះកំហឹងកាន់តែខ្លាំង ក៏សម្រុកចូលវាយទៅលើ ថាន រ៉ាឌី ដូចព្យុះ ធ្វើឱ្យ ថាន រ៉ាឌី ភ្លាត់ជើងដួលទៅលើក្តារតាពី ហើយភ្លាមនោះ ម៉ាត់ ឆ្វេង ក៏ជ្រុលជើងទាត់ត្រូវក្បាលបណ្តាលឱ្យមានរបួសបែកចេញឈាម ។ ចំណែក ថាន រ៉ាឌី ក្រោយពីត្រូវមួយជើងរបស់ ម៉ាត់ ឆ្វេង ទោះបីជាលោកអាជ្ញាកណ្តាលរាប់ដល់១០ទៅហើយ ក៏មិនខ្ចីក្រោកដែរ ។ ភ្លាមនោះលោករត្ន សត្ថា បានប្រាប់ទៅលោកងួន និត ថាមិនបាច់ប្រកាសលទ្ធផលឡើយ ព្រោះលោកដឹងថា ថាន រ៉ាឌី មានចេតនាចង់ស៊ីឡាក បុ៉ន្តែក៏មានបទបញ្ជាមួយថ្មីទៀតចេញពីលោកឆឹង យ៉ៅយ៉េន អនុប្រធានសហព័ន្ធកីឡាប្រដាល់កម្ពុជាថា ឱ្យប្រាប់ទៅលោកងួន និត ព្រមាន ម៉ាត់ ឆ្វេង ហើយប្រកាសឱ្យ ថាន រ៉ាឌី ជាអ្នកឈ្នះវិញ។ ការចេញបញ្ជាបែបនេះដោយសារលោកចោទប្រកាន់ ម៉ាត់ ឆ្វេង ថា ជាអ្នកបំពានទៅនឹងច្បាប់ប្រកួតដែលបានវាយថែមទៅលើ ថាន រ៉ាឌី ធ្វើឱ្យលោកងួន និត ដែលជាអាជ្ញាកណ្តាលនោះឡើងចង់វិលក្បុងព្រោះតែមានបញ្ជាច្រើនពេក ។
ជុំវិញហេតុការណ៍ទាំងនេះបានធ្វើឱ្យសាធារណមតិមួយចំនួនធ្វើការរិះគន់ទៅលើសហព័ន្ធកីឡាប្រដាល់កម្ពុជា ដែលគ្មានចំណាត់ការពិតប្រាកដ មិនដឹងអ្នកណាជាអ្នកទទួលខុសត្រូវលើការប្រកួតពិតប្រាកដនោះទេ ។ មន្ត្រីបច្ចេកទេសរបស់សហព័ន្ធកីឡាប្រដាល់កម្ពុជាមួយចំនួនបានឱ្យដឹងថា តាមពិតថ្វីដ្បិតតែ ថាន រ៉ាឌី ត្រូវ ម៉ាត់ ឆ្វេង ទាត់ថែមត្រូវក្បាលរហូតដល់ថ្នាក់មានរបួសបែកចេញឈាមមែន បុ៉ន្តែ ថាន រ៉ាឌី ត្រូវបានគេសង្ស័យថា មានគម្រោងលក់ការប្រកួតតាំងពីដំបូងមកម្ល៉េះ ។ ដូច្នេះគូនេះបើមិនប្រកាសលទ្ធផល គឺល្អជាង ។
ទោះជាយ៉ាងណា ផ្អែកទៅលើសភាពជាក់ស្តែង គឺការបង្ករបួសស្នាមផង និងការធ្វើខុសទៅនឹងច្បាប់ប្រកួតផង ទើបលោកអនុប្រធានសហព័ន្ធចេញបញ្ជាឱ្យលើកដៃ ថាន រ៉ាឌី ជាអ្នកឈ្នះការប្រកួតដោយស្វ័យប្រវត្តិ ។ លោកទី រ៉ាណាត អ្នកគ្រប់គ្រងកម្មវិធីប្រកួតប្រចាំស្ថានីយទូរទស្សន៍បុ៉ស្តិ៍លេខ៣ បានសំណូមពរដល់សហព័ន្ធកីឡាប្រដាល់ធ្វើការស្រាវជ្រាវរឿងនេះឡើងវិញដើម្បីរកឱ្យឃើញថា តើអ្នកណាជាអ្នកមានកំហុសពិតប្រាកដ ។ ម៉ាត់ ឆ្វេង បានសារភាពថា គេពិតជាបានធ្វើខុសទៅនឹងច្បាប់ប្រកួតមែន បុ៉ន្តែ ថាន រ៉ាឌី ក៏ជាអ្នកខុសដែរ ព្រោះថាការប្រកួតជាច្រើនលើកជាមួយគ្នាកន្លងមកនេះ ថាន រ៉ាឌី ត្រូវខ្លួនវាយឱ្យសន្លប់២លើករួចមកហើយ ទើបលើកនេះប្រហែលជាដឹងថា មិនអាចទៅរួចជាមួយខ្លួន ទើប ថាន រ៉ាឌី មានចេតនាធ្វើបែបនេះតែម្តង ។
សម្រាប់ការប្រកួតគូផ្សេងទៀត សៀវ ងុយ មកពីសមាគមកីឡាប្រដាល់ក្រសួងការពារជាតិ ឈ្នះពិន្ទុ ហេង វាសនា មកពីក្លិបព្រៃទទឹងមានរិទ្ធបង្ក្រាបគ្រឿងញៀន ។ លួន សុខខេង មកពីក្លិបអាស៊ីកីឡា ផ្តួល ពេជ្រ ម៉ាប់ មកពីក្លិបសាលវ័ន្តកីឡាឱ្យសន្លប់ត្រឹមទឹកទី៥ និង សយ សី មកពីក្លិបពន្លឺវិបុលរិទ្ធី ឈ្នះពិន្ទុ រស់ វិបុល មកពីក្លិបសាលវ័ន្តកីឡា ៕
ចែករំលែកព័តមាននេះ