ខេត្តកំពង់ឆ្នាំង៖ សេចក្តីវេទនារស់ដោយការអត់ឃា្លនបានធ្លាក់មកលើកុមារកំព្រា៣នាក់បងប្អូន ដោយក្នុងនោះប្អូនស្រីពៅបានក្លាយខ្លួនជាជនពិការ ដោយសារពស់ចឹក គ្មានលុយព្យាបាល ។ កុមារទាំង៣នាក់បងប្អូនត្រូវបានឪពុកចាកចោលទៅមានប្រពន្ធថ្មី មិនមកជួយមើលថែរក្សា រីឯម្តាយទៅប្រទេសថៃបាត់ដំណឹងឈឹង ចំណែកបងៗបានទៅធ្វើការ និងមានប្តី មិនដែលមកអើតប្អូនៗម្តងណាឡើយ។
រយៈពេល៣ឆ្នាំដែលពួកគេរស់ក្នុងភាពឯកកោគ្មានភាពកក់ក្តៅពីមេបា គឺពឹងអាស្រ័យតែបងប្រុសមានអាយុ១៥ឆ្នាំស៊ីឈ្នួលមើលគោឱ្យគេបានប្រាក់បន្តិចបន្តួចចិញ្ចឹមប្អូនៗ និងដោយសារអ្នកជិតខាងឱ្យបាយសម្ល កំដររស់រង់ចាំថ្ងៃណាមួយ ម្តាយឪពុកគេភ្ញាក់ខ្លួនវិលត្រឡប់មករកកូនៗវិញ ។
ជីវិតកំសត់នៃក្មេងទាំងបីនាក់នេះកំពុងរស់នៅភូមិក្រាំងស្គា ឃុំក្រាំស្គា ស្រុកទឹកផុស ខេត្តកំពង់ឆ្នាំង ។ ប្រជាពលរដ្ឋរស់នៅភូមិក្រាំងស្គារ បាននិយាយពីប្រវត្តិកុមារកំព្រាទាំង៣នាក់ និងក្រុមគ្រួសារគេឱ្យដឹងថា កុមារាទី១-ឈ្មោះ សឺ សាន អាយុ១៥ឆ្នាំ សព្វថ្ងៃដើរស៊ីឈ្នួលមើលគោ ក្របីឱ្យគេយកប្រាក់ចិញ្ចឹមប្អូនៗ កុមារីទី២-ឈ្មោះ សឺ សុជា អាយុ១០ឆ្នាំ ដើរជីកដំឡូងព្រៃលក់ និងកុមារីទី៣-ឈ្មោះ សឺ ម៉ាណិត អាយុ៨ឆ្នាំ ពិការជើងខាងស្តាំមួយកំណាត់កាលពី២ឆ្នាំមុនដោយសារពស់ចឹកគ្មានលុយព្យាបាល។ ពួកគេមានបងប្អូន៣នាក់ទៀតគឺ ១-ឈ្មោះសឺ សល់ ភេទប្រុស អាយុ២១ឆ្នាំ ទៅធ្វើការនៅភ្នំពេញបាត់ដំណឹងជាង៣ឆ្នាំមកហើយ ២-ឈ្មោះ សឺ ម៉ាណុត ភេទស្រី អាយុ១៨ឆ្នាំ បែកមានប្តីមិនដែល មករកប្អូនៗឡើយ និង៣-ឈ្មោះ សឺ ឡុង ភេទស្រី អាយុ១៣ឆ្នាំ ស៊ីឈ្នួលលាងចានឱ្យគេនៅភូមិថ្នល់ទទឹង ឃុំសែប ស្រុកកំពង់ត្រឡាច បានតែបាយហូបមិនដែលបានប្រាក់អ្វីឡើយ។
ចំណែកឪពុកពួកគេ ឈ្មោះ ញឹម សៃ អាយុ៤២ឆ្នាំ ចេញទៅរស់នៅជាមួយប្រពន្ធចុងជាង២ឆ្នាំហើយមិនដែលមកមើលកូនៗឡើយ ចំណែកម្តាយរបស់គេឈ្មោះនី អាយុ៤១ឆ្នាំ ចេញទៅធ្វើជាកម្មការិនីនៅប្រទេសថៃជាង២ឆ្នាំម កហើយបាត់ដំណឹងឈឹង។
ដោយមើលឃើញការលំបាកអត់ឃ្លានគ្មានបានរៀនសូត្រ របស់កុមារទុរគតទាំង៣នាក់ខាងលើដែលកំពុងរស់នៅក្នុងកូនខ្ទមស្លឹកដ៏តូចមួយធ្លុះធ្លាយមុខក្រោយដ៏គួរឱ្យអាណិតពេកនោះ ប្រជាពលរដ្ឋក្នុងភូមិសំណូមពរស្នើសុំដល់សប្បុរសជន តាមរយៈសារព័ត៌មានមេត្តាជួយសង្គ្រោះដល់កុមារទាំង៣នាក់បងប្អូនខាងលើនេះដោយអនុគ្រោះផងចុះ៕
ចែករំលែកព័តមាននេះ