ចូលដល់ថ្ងៃទី៥ នៃការវាយប្រហារតាមអាកាសនៅយេម៉ែនរបស់ក្រុមចម្រុះអារ៉ាប់ នាំមុខដោយអារ៉ាប៊ីសាអ៊ូឌីត អគ្គលេខាធិការសម្ព័ន្ធអារ៉ាប់ លោក ណាប៊ីល អាល់អារ៉ាប៊ី អះអាងកាលពីថ្ងៃទី២៩
ចូលដល់ថ្ងៃទី៥ នៃការវាយប្រហារតាមអាកាសនៅយេម៉ែនរបស់ក្រុមចម្រុះអារ៉ាប់ នាំមុខដោយអារ៉ាប៊ីសាអ៊ូឌីត អគ្គលេខាធិការសម្ព័ន្ធអារ៉ាប់ លោក ណាប៊ីល អាល់អារ៉ាប៊ី អះអាងកាលពីថ្ងៃទី២៩ មីនា ថា ការវាយប្រហារតាមអាកាសនឹងបន្តទៀតរហូតដល់ពួកជីវពលស៊ីអីុត ហ៊ូធី ដកខ្លួនថយចេញ ហើយដាក់អាវុធចុះ ។ លោកថ្លែងបែបនេះ នៅថ្ងៃចុងក្រោយនៃកិច្ចប្រជុំកំពូលអារ៉ាប់នៅទីក្រុង Charm El Cheikh ប្រទេសអេហ្ស៊ីប ។
រដ្ឋមន្ត្រីការបរទេសយេម៉ែន លោក រីយ៉ាដ យ៉ាសស៊ីន អះអាងក្នុងកិច្ចប្រជុំនោះថា នឹងពុំមានការចរចាជាមួយពួកឧទ្ទាមឡើយ បើដរាបណារដ្ឋាភិបាលស្របច្បាប់ពុំអាចវិលទៅត្រួតត្រាដែនដីទាំងមូលរបស់យេម៉ែន ទេនោះ ។
ចាកចេញពីទីតាំងពួកគេនៅខេត្តសាអាដា ភាគខាងជើងយេម៉ែន ពួកហ៊ូធីកាលពីខែកញ្ញា បានលុកចូលកាន់កាប់រដ្ឋធានីសាណា បន្ទាប់មកដណ្តើមកាន់កាប់តំបន់ជាច្រើននៅភាគកណ្តាល និងខាងលិចប្រទេស ដោយរយៈពេលប៉ុន្មានថ្ងៃចុងក្រោយនេះ គំរាមវាយដណ្តើមយកទីក្រុងអាដេន ជាទីក្រុងធំនៅភាគខាងត្បូងប្រទេស កន្លែងរត់ភៀសខ្លួនរបស់ប្រធានាធិបតី លោក Abd Rabbo Mansour Hadi ទៀត ។
ដោយឆ្លើយតបចំពោះការអំពាវនាវសុំជំនួយរបស់រដ្ឋាភិបាលយេម៉ែន ក្រុមចម្រុះនៃបណ្តាប្រទេសអារ៉ាប់ នាំមុខដោយអារ៉ាប៊ីសាអ៊ូឌីត មានព្រំដែនយ៉ាងវែងជាប់យេម៉ែន បានបើកធ្វើពីថ្ងៃទី២៦ មីនា មក នូវការវាយប្រហារតាមអាកាសលើទីតាំងទាំងឡាយរបស់ពួកឧទ្ទាមហ៊ូធី គាំទ្រដោយអីុរ៉ង់ និងបណ្តាកងឯកភាពយោធា ដែលនៅតែស្មោះត្រង់ជាមួយអតីតប្រធានាធិបតី លោក អាលី អាប់ដាល់ឡាហ៍ សាឡេហ៍ ដែលត្រូវបង្ខំឱ្យចាកចេញពីតំណែងកាលពីឆ្នាំ២០១២ ។
ការប្រយុទ្ធគ្នានាពេលយប់រវាងពួកអ្នកគាំទ្រ និងពួកប្រឆាំងហ៊ូធី កើតមានជាពិសេសកាលពីថ្ងៃទី២៩ មីនា បណ្តាលឱ្យមនុស្សស្លាប់យ៉ាងតិច២០នាក់ ធ្វើឱ្យតុល្យការនៃអំពើហិង្សាចាប់តាំងពីថ្ងៃទី២៦ មីនា មក អ្នកស្លាប់ឡើងដល់ជិត១០០នាក់ហើយ ។
នៅភាគឦសានក្រុងអាដេន ក្នុងខេត្តចាបវ៉ា មនុស្សយ៉ាងតិច៣៨នាក់ បានត្រូវស្លាប់ក្នុងការប្រយុទ្ធគ្នារវាងពួកកុលសម្ព័ន្ធស៊ុននីត និងពួកឧទ្ទាមសីុអីុត និងពួកសម្ព័ន្ធមិត្តនៅក្រុង Nuqub ជិតតំបន់ប្រេងកាត Usaylan ។ យោងតាមប្រភពពួកកុលសម្ព័ន្ធថា ពួកកុលសម្ព័ន្ធស៊ុននីតខេត្តអាប៊ីយ៉ាន បានបញ្ជូនកម្លាំងមកជួយពួកកុលសម្ព័ន្ធនៅចាបវ៉ា ។
ចំណែកកងយន្តហោះរបស់ក្រុមចម្រុះអារ៉ាប់ បានធ្វើការវាយប្រហារ៤យប់ជាប់ៗគ្នាលើបណ្តាទីតាំងរបស់ពួកហ៊ូធី និងសម្ព័ន្ធមិត្ត ។ ក្រៅពីព្រលានយន្តហោះក្រុងសាណា កងយន្តហោះក្រុមចម្រុះបានទម្លាក់គ្រាប់បែកលើក្រុងស៊ូបាហា ភាគខាងលិចរដ្ឋធានី និងទីបញ្ជាការដ្ឋានរបស់កងឆ្មាំសាធារណរដ្ឋសម្ព័ន្ធមិត្តពួកហ៊ូធី ដោយសម្លាប់ទាហាន១៥នាក់ ។
អារ៉ាប៊ីសាអ៊ូឌីត ប្រកាសនាថ្ងៃទី២៩ មីនា ថា មីស៊ីលបាលីស្ទិកទាំងអស់របស់ពួកហ៊ូធី នឹងត្រូវកម្ទេចក្នុងប៉ុន្មានថ្ងៃខាងមុខនេះ ។
យោងតាមទូរទស្សន៍ Al-Arabiya ថា ក្នុងសន្និសីទសារព័ត៌មានមួយ អ្នកនាំពាក្យយោធាអារ៉ាប៊ីសាអ៊ូឌីត ឧត្តមសេនីយ៍ អាម៉េដ អាល់ អាស៊ីរី គូសបញ្ជាក់ថា ក្រុមចម្រុះចូលរួមដោយប្រទេស១០ផ្សេងទៀត បន្តវាយប្រហារសំដៅបណ្តាមីសីុល ដើម្បីចៀសវាងការខូចខាតច្រើន ។ អ្នកនាំពាក្យរូបនេះបន្តថា ក្នុងប្រតិបត្តិការកាលពីថ្ងៃទី២៩ មីនា ការវាយប្រហារតាមអាកាសសំដៅលើបណ្តាមីសីុល និងកងកម្លាំងអាកាសចរណ៍របស់ពួកហ៊ូធី បណ្តាឃ្លាំងស្តុកគ្រាប់រំសេវ ផ្លូវផ្គត់ផ្គង់ ព្រមទាំងការចល័ត និងការប្រមូលផ្តុំកម្លាំងរបស់ពួកហ៊ូធី នៅក្បែរព្រំដែនអារ៉ាប៊ីសាអ៊ូឌីត ៕
ចែករំលែកព័តមាននេះ