ខេត្តបន្ទាយមានជ័យ៖ រទេះសំរាប់ជនពិការចំនួន៥០គ្រឿង និងស្រោមជើង៣.៤០០ឡូជាអំណោយសប្បុរសរបស់រោងចក្រស្រោមជើងថថៃរ៉ុង ប្រទេសថៃបានផ្ដល់មកកម្ពុជាតាមច្រកទ្វារអន្តរជាតិប៉ោយប៉ែតតាមរយៈអាជីវករខ្មែរនៅផ្សាររុងក្លឿ ស្រុកអារញ្ញ ប្រទេសថៃប្រគល់ឲ្យប្រធានការិយាល័យស្រុកប្រតិបត្តិស្រុកសង្កែ និងជាតំណាងមន្ទីរសុខាភិបាលខេត្តបាត់ដំបង ដើម្បីជួយដល់ជនពិការ និងអ្នកជម្ងឺតាមមន្ទីរពេទ្យ កាលពីវេលាម៉ោងជិត០១រសៀល ថ្ងៃទី៣០ មីនា ២០១៥។
លោកអ៊ឹម ចិត្រា ប្រធានការិយាល័យស្រុកប្រតិបត្តិស្រុកសង្កែ និងជាតំណាងមន្ទីរសុខាភិបាលខេត្តបាត់ដំបងបានប្រាប់កោះសន្តិភាពនៅច្រកទ្វារអន្តរជាតិបោ់យប៉ែតថា អំណោយទាំងនេះរួមមានរទេះសំរាប់ជនពិការចំនួន៥០គ្រឿង និងស្រោមជើងចំនួន៣.៤០០ឡូ។
លោកអ៊ឹម ចិត្រា បន្តថា អំណោយទាំងនេះជារបស់រោងចក្រថថៃរ៉ុងនៅប្រទេសថៃតាមរយៈអាជីវករខ្មែរនៅផ្សាររុងក្លឿប្រគល់ឲ្យលោកដើម្បីយកទៅចែកជូនជនពិការ និងអ្នកជម្ងឺតាមមន្ទីរពេទ្យក្នុងខេត្តបាត់ដំបង។ តំណាងមន្ទីរសុខាភិបាលរូបនេះប្រាប់ថា ការជួយជាអំណោយសប្បុរសពីរោងចក្រស្រោមជើងថថៃរ៉ុងនេះជាលើកទី០២ហើយ ដោយកាលពីលើកទី០១នៅខែ១០ ២០១៤ គឺខាងការិយាល័យស្រុកប្រតិបត្តិរបស់លោកទទួលបានស្រោមជើង៧០០ឡូ ហើយអំណោយកន្លងមកនោះបានចែកជូនដល់អ្នកក្រីក្រ ពិសេសស្ត្រីសម្រាលកូន និងមួយចំនួនបានចែកជូនដល់គ្រួសាររងគ្រោះផ្ទុកមេរោគអេដស៍ក្នុងភូមិរកា។
តំណាងមន្ទីរសុខាភិរូបនេះបញ្ជាក់ថា អំណោយទាំងអស់លើកនេះអាចនឹងយកទៅចែកជូនដល់ជនពិការ និងអ្នកជម្ងឺតាមមណ្ឌលសុខភាព និងមន្ទីរពេទ្យនៅទូទាំងខេត្តបាត់ដំបងក្រោយពីពិភាក្សា ឬឆ្លងយោបល់ពីប្រធានមន្ទីរសុខាភិបាលខេត្តរួច។ លោកអ៊ឹម ចិត្រា បញ្ជាក់ថា រោងចក្រថថៃរ៉ុងនឹងផ្ដល់អំណោយសប្បុរសបែបនេះជាលើកទី៣ទៀតនៅឆ្នាំក្រោយ៕
ចែករំលែកព័តមាននេះ