ខេត្តពោធិ៍សាត់ ៖ ហ្វូងគោដើរអនាធិបតេយ្យក្នុងក្រុងពោធិ៍សាត់វាមិនមែនជារឿងថ្មីនោះទេ គឺវាមានយូរហើយ ហើយវាក៏ជារឿងដដែលៗដែរ ប៉ុន្តែអាជ្ញាធរ និងសមត្ថកិច្ចហាក់បីដូចជាមិនទាន់ដែលឃើញចាត់វិធានការចំពោះអ្នកចិញ្ចឹមគោទាំងនោះទាល់តែសោះ។
ហ្វូងគោទាំងនោះបានដើរប្រសេចប្រសាចលើផ្លូវជាតិលេខ៥ និងតាមផ្លូវនានាក្នុងក្រុងពោធិ៍សាត់បង្កការលំបាកដល់អ្នកធ្វើដំណើរស្ទះចរាចរណ៍, គ្រោះថ្នាក់ចរាចរណ៍, ជុះអាចម៍ប្រតេកប្រតាកប្រឡាក់លើផ្លូវ លើសួនច្បារធ្វើឲ្យខូចសោភ័ណភាព និងសណ្ដាប់ធ្នាប់សង្គម។
ហ្វូងគោទាំងនេះមិនមែនលែងចោលតែពេលថ្ងៃនោះទេ គឺទាំងថ្ងៃទាំងយប់ ជូនកាលពេលខ្លះដើរចូលក្នុងផ្សារស៊ីផ្លែឈើ ឫបង្អែមទៀតផង បើសិនជាអ្នកលក់កំពុងជាប់រវល់មិនបានមើលទេនោះ។ មិនតែប៉ុណ្ណោះបើនៅតាមគេហដ្ឋានវិញមានពាងទឹកតាមមុខផ្ទះមិនបានគ្របត្រឹមត្រូវប្រាកដជាត្រូវសត្វគោយកមាត់ជ្រលក់គ្រប់ផ្ទះជាមិនខាន។
ហ្វូងគោអនាធិបតេយ្យក្នុងក្រុងពោធិ៍សាត់នេះបានធ្វើឲ្យអ្នកធ្វើដំណើរធុញថប់ណាស់ ហើយខ្មាស់ដល់ភ្ញៀវទេសចរជាតិ និងអន្តរជាតិដែលគេចូលមកលេងទៀតផង។ អ្នកធ្វើដំណើរបានរិះគន់ចំពោះហ្វូងគោទាំងនេះ ហើយបានសំណូមពរដល់អាជ្ញាធរដែនដី និងសមត្ថកិច្ចឲ្យចាត់វិធានការចំពោះអ្នកដែលចិញ្ចឹមគោកុំឲ្យមានការលែងអនាធិបតេយ្យក្នុងទីប្រជុំជនបែបនេះតទៅទៀត ហើយត្រូវធ្វើការផាកពិន័យឲ្យបានខ្លាំងផងដែរដើម្បីឲ្យមានការរាងចាល៕
ចែករំលែកព័តមាននេះ