រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានគូសបញ្ជាក់ថា សុវត្ថិភាពជាកត្តាចម្បងក្នុងការទាក់ទាញទេសចរណ៍ និងជារូបភាពវិជ្ជមាននៃគោលដៅទេសចរណ៍នីមួយៗ ជារួមគឺកញ្ចប់នៃការទស្សនារបស់ភ្ញៀវប្រកបដោយបរិយាកាសកក់ក្តៅនិងសុវត្ថិភាព។
លោក ថោង ខុន បានថ្លែងបែបនេះក្នុងឱកាសចូលរួមជាអធិបតីភាពក្នុងពិធីបើកសម្ភោធក្រុមហ៊ុនសន្តិសុខលីដែន & ហ្វេបៀន ស៊ីឃ្យូរីធី ហូលឌីង ខូអិលធីឌី (LIDEN and FABIAN SECURITY HOLDING Co.,Ltd) កាលពីថ្ងៃទី២៧ មីនា ២០១៥ កន្លងមកនេះនៅសណ្ឋាគារកាំបូឌីយ៉ាណា ។
លោក ថោង ខុន បានបន្ថែមថា ជាមួយគ្នានេះ នៅក្នុងផែនការយុទ្ធសាស្ត្រអភិវឌ្ឍន៍ទេសចរណ៍កម្ពុជា (២០១២.២០២០) ក៏បានបង្ហាញនូវចក្ខុវិស័យច្បាស់លាស់ សម្រាប់អនាគតនៃការអភិវឌ្ឍវិស័យទេសចរណ៍កម្ពុជា ដោយផ្តោតសំខាន់ទៅលើទិសដៅជាយុទ្ធសាស្ត្រទាំង៦រួមមាន (ការអភិវឌ្ឍន៍ផលិតផលទេសចរណ៍ ការសិក្សាទីផ្សារ និងផ្សព្វផ្សាយទេសចរណ៍ ការតភ្ជាប់ និងការសម្រួលការធ្វើដំណើរ និងការដឹកជញ្ជូនទេសចរណ៍) និងចំណុចចុងក្រោយគឺប្រព័ន្ធសុវត្ថិភាពទេសចរណ៍។
លោក ថោង ខុន បានបញ្ជាក់ថា ការបង្កើតក្រុមហ៊ុនសន្តិសុខលីដែន & ហ្វេបៀន ស៊ីឃ្យូរីធី ហូលឌីង ខូអិលធីឌីនេះ គឺជាការរួមចំណែកផ្តល់ភាពកក់ក្តៅក្រុមហ៊ុនវិនិយោគ វិនិយោគិន និងភ្ញៀវទេសចរផងដែរ ខណៈដែលព្រះរាជាណាចក្រកម្ពុជាក្រោមការដឹកនាំដ៏ត្រឹមត្រូវប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ត្រូវបានទទួលស្គាល់លើឆាកអន្តរជាតិពីកត្តាសន្តិសុខ សុវត្ថិភាព និងស្ថិរភាពនយោបាយទូទាំងប្រទេស ស្របតាមការផ្សព្វផ្សាយទេសចរណ៍អាស៊ាន អាស៊ានផ្តល់ភាពកក់ក្តៅដល់ទេសចរណ៍ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ