ខេត្តពោធិ៍សាត់ ៖ ដោយយល់ឃើញថាអ្នករៀនពូកែ គឺជាធនធានមនុស្សដ៏សំខាន់ ជាទំពាំងស្នងឫស្សី និងជាអ្នកបន្តវេណក្នុងការដឹកនាំកសាងអភិវឌ្ឍន៍ប្រទេសឲ្យរីកចំរើនឆាប់រហ័សនោះលោកស៊ុយ សែម រដ្ឋមន្ត្រីក្រសួងរ៉ែ និងថាមពល
ខេត្តពោធិ៍សាត់ ៖ ដោយយល់ឃើញថាអ្នករៀនពូកែ គឺជាធនធានមនុស្សដ៏សំខាន់ ជាទំពាំងស្នងឫស្សី និងជាអ្នកបន្តវេណក្នុងការដឹកនាំកសាងអភិវឌ្ឍន៍ប្រទេសឲ្យរីកចំរើនឆាប់រហ័សនោះលោកស៊ុយ សែម រដ្ឋមន្ត្រីក្រសួងរ៉ែ និងថាមពលនិងលោកជំទាវតែងបានផ្ដាំផ្ញើក្រើនរំលឹកដល់សិស្សានុសិស្សនៅគ្រប់សាលាក្នុងខេត្តពោធិ៍សាត់ទាំងអស់ឲ្យខិតខំរៀនសូត្រក្លាយជាសិស្សពូកែ ព្រមទាំងផ្ដល់ជារង្វាន់លើកទឹកចិត្តទៀតផង។
កាលពីរសៀលថ្ងៃទី២៩ មីនា ២០១៥ លោករដ្ឋមន្ត្រីស៊ុយ សែម និងលោកជំទាវបានជួបសំណេះសំណាលជាមួយសិស្សានុសិស្សដែលរៀនជាប់ចំណាត់ថ្នាក់ពីលេខ១ដល់លេខ៥ចំនួន៣០នាក់ មកពីអនុវិទ្យាល័យ និងវិទ្យាល័យចំនួន១៣ក្នុងខេត្តពោធិ៍សាត់ ដែលពិធីនេះបានរៀបចំធ្វើនៅបណ្ណាល័យពោធិ៍សាត់។
លោករដ្ឋមន្ត្រី ស៊ុយ សែម បានសម្ដែងទឹកចិត្តរំភើបរីករាយដែលបានឃើញក្មួយៗសិស្សានុសិស្សជាកូនចៅប្រជាពលរដ្ឋក្នុងខេត្តពោធិ៍សាត់រៀនពូកែសមតាមបំណងប្រាថ្នារបស់លោកដែលបានក្រើនរំលឹកកន្លងមក។ លោកមានប្រសាសន៍ថា ក្មួយៗដែលរៀនពូកែនេះដោយសារទី១-មានការគ្រប់គ្រងល្អពីឪពុកម្ដាយ ទី២-គ្រូបង្រៀនល្អ និងទី៣-គឺខ្លួនឯងផ្ទាល់មានចិត្តចង់រៀន។
ជាក់ស្ដែងដូចជារូបលោកជាដើមកាលរៀននៅសាលាបឋមសិក្សាមិនសូវចេះទេ ប៉ុន្តែពេលចូលដល់អនុវិទ្យាល័យលោកមានការតាំងចិត្តខ្ពស់ទើបរៀនពូកែបានជាប់ចំណាត់លេខ១លេខ២រហូតតែម្ដង។ កាលលោកនៅរៀន ឪពុកម្ដាយមានជីវភាពលំបាកលំបិន គ្មានកង់-ម៉ូតូជិះមករៀនទេ ហើយក៏គ្មានអគារថ្មអង្គុយរៀនដូចក្មួយៗសព្វថ្ងៃនេះដែរ ប៉ុន្តែដោយសារការតស៊ូខិតខំប្រឹងប្រែងទើបមានថ្ងៃនេះ។
ពីមុនប្រទេសយើងសំបូរអ្នកចេះដឹងច្រើនណាស់ ប៉ុន្តែពួកប៉ុលពត សម្លាប់ចោលគ្មានសល់ ទើបតែក្រោយថ្ងៃរំដោះ៧ មករា ១៩៧៩ យើងបានចាប់ផ្ដើមកសាងឡើងវិញពីបាតដៃទទេដែលដៃម្ខាងទប់នឹងសង្គ្រាម ដៃម្ខាងកសាង និងបណ្ដុះបណ្ដាលធនធានមនុស្សទំរាំបានដូចសព្វថ្ងៃនេះមិនមែនជារឿងធម្មតានោះទេ។
សមាគមអតីតសិស្សវិទ្យាល័យពោធិ៍សាត់បង្កើតបណ្ណាល័យនេះឡើងដើម្បីជួយសិស្សជំនាន់ក្រោយក្នុងការស្រាវជ្រាវចំណេះដឹង និងជួយដល់សិស្សក្រីក្រដែលជួបការលំបាក។ ស្ថិតក្នុងវ័យសិក្សាក្មួយៗត្រូវតែសប្បាយនឹងកាសិក្សា ខិតខំរៀនចាប់យកជំនាញណាមួយឲ្យពិតប្រាកដ លុះបានការងារធ្វើហើយយើងសប្បាយនឹងរកប្រាក់ចំណូលវិញម្ដងដើម្បីទ្រទ្រង់ជីវភាពគ្រួសារ និងអនាគតរបស់ខ្លួន។ លោកមានប្រសាសន៍ថា ឥឡូវនេះក្មួយៗជាសិស្សពូកែត្រឹមថ្នាក់ខេត្តទេ បើសិនជាទៅដល់ថ្នាក់ជាតិរៀនបានចំណាត់ថ្នាក់លេខ១លោកនឹងជូនរង្វាន់ម៉ូតូម្នាក់មួយគ្រឿងសម្រាប់ជិះទៅសិក្សា។
ក្នុងឧិកាសនោះលោករដ្ឋមន្ត្រីស៊ុយ សែម និងលោកជំទាវបានផ្ដល់ថវិកាដល់សិស្សពូកែទាំង៣០នាក់ ក្នុងម្នាក់ៗទទួលបាន២០ម៉ឺនរៀលក្នុងនោះមានសិស្សចំនួនពីរនាក់ ម្នាក់ទៅប្រលងនៅហុងកុង លោកបានឧបត្ថម្ភបន្ថែម២០០ដុល្លា និងម្នាក់ទៀតទៅប្រលងនៅប្រទេសថៃ លោកបានឧបត្ថម្ភបន្ថែម៥.០០០បាត។ ចំណែកគ្រូដែលនាំសិស្សមកទាំង១៣សាលានោះ ឧបត្ថម្ភម្នាក់៥០.០០០រៀល និងបានឧបត្ថម្ភបណ្ណាល័យចំនួន៣០០ដុល្លាផងដែរ៕
ចែករំលែកព័តមាននេះ