រាជធានីភ្នំពេញ ៖ កម្មវិធីប្រឡងចម្រៀង «សំនៀងឯក» វគ្គ១ ប្រចាំឆ្នាំ២០១៤ ដែលរៀបចំដោយក្លឹបសិល្បៈឌីភី បានរកឃើញអ្នកមានទឹកដមសំឡេងពីរោះក្នុងពិធីប្រកួតផ្តាច់ព្រ័ត្រកាលពីថ្ងៃទី២៤ មីនា ២០១៥ ។ ពិធីប្រកួតផ្តាច់ព្រ័ត្រនេះ រៀបចំធ្វើឡើងនៅក្នុងបរិវេនក្លឹបសិល្បៈឌីភី ស្ថិតនៅតាមបណ្តោយមហាវិថីសហព័ន្ធរុស្ស៊ីទល់មុខអាកាសយានដ្ឋានអន្តរជាតិភ្នំពេញ ។
លោកកុយ ស៊ីឌឿន អគ្គនាយកក្លឹបសិល្បៈឌីភី និងជាប្រធានវិទ្យុឌីភីដែលបានចូលរួមជាកិត្តិយសជាមួយភរិយានាឱកាសនោះបានលើកឡើងថា បេក្ខជនចំនួន១៥នាក់ចុងក្រោយ តាមរយៈប្រឡងផ្តាច់ព្រ័ត្ររើសបានពីចំណាត់លេខ១ដល់លេខ៥ ។ ជ័យលាភីទាំង៥នាក់មិនត្រូវអស់សង្ឃឹមទេ គឺក្លឹបឌីភីផ្តល់ឱកាសសម្រាប់ទីផ្សារសិល្បៈ ។ នេះជាមោទនភាពសម្រាប់ក្លឹបសិល្បៈឌីភីដែលជ្រើសរើសបានម្ចាស់សំនៀងឯក ។ អ្នកជាប់ចំណាត់ថ្នាក់ បើចង់នៅទីនេះក៏បាន ឬចេញទៅរកការងារក្នុងផលិតកម្មផ្សេងក៏បាន មិនបិទសិទ្ធិទេ ។ អ្នករៀបចំប្រលងគ្រាន់តែជួយលើកទឹកចិត្ត ចំណែកជ័យលាភីផ្ទាល់ចង់ទៅកន្លែងណា គឺជាសិទ្ធិជ្រើសរើសរបស់ខ្លួន ។
ចំណែកតារាចម្រៀងជើងចាស់លោកណូយ វ៉ាន់ណេត ដែលជាគណៈមេប្រយោគដាក់ពិន្ទុតាំងពីវគ្គដំបូងរហូតដល់ចុងក្រោយបានថ្លែងថា លោកឃើញបេក្ខជនទាំង១៥នាក់មានទឹកដមសំឡេងពីរោះ ដូច្នេះហើយតាំងពីប្រឡងប្រចាំខែពីមួយវគ្គទៅមួយវគ្គ បេក្ខជន ម្នាក់ៗពិតជាលំបាកក្នុងការដណ្តើមយកជ័យជម្នះ ។
លោកណូយ វ៉ាន់ណេត ណែនាំថា ជាតារាម្នាក់ពេលឡើងដល់ចំណុចគេទទួលស្គាល់ត្រូវចេះរក្សាកៅអីឱ្យបាន កុំឱ្យអ្នកណាដណ្តើមបាន។ ត្រូវមានអត្តចរិតមារយាទល្អ គោរពចាស់ទុំ និងព្យាយាមធ្វើអ្វីគ្រប់បែបយា៉ងដើម្បីថែរក្សាកិត្តិយសរបស់ខ្លួន ។
ក្នុងកម្មវិធីប្រលងនោះ ចំណាត់ថ្នាក់លេខ១បានទៅលើបេក្ខជនម៉ម សំនៀង ទទួលបានរង្វាន់ម៉ូតូឌ្រីមសេ១២៥ សេ៊រីឆ្នាំ២០១៥ ចំនួនមួយគ្រឿង ។ ចំណាត់ថ្នាក់លេខ២បានទៅបេក្ខនារីទិព សាវរី ទទួលបានទូរស័ព្ទដៃអាយហ្វូន៥អេស១គ្រឿង ។ ចំណាត់ថ្នាក់លេខ៣ បានទៅបេក្ខជនស្រុន សំអាត ទទួលបានប្រាក់១លានរៀល ។ ចំណាត់ថ្នាក់លេខ៤បានទៅបេក្ខជនអៀង វុត្ថា ទទួលបានប្រាក់៨០ម៉ឺនរៀល ។ ចំណាត់ថ្នាក់លេខ៥ បានទៅបេក្ខនារីដួង សុម៉ាលីតា ទទួលបានប្រាក់៦០ម៉ឺនរៀល ។ ក្រៅពីនេះមានរង្វាន់លួងចិត្តដល់បេក្ខជនចំនួន៣នាក់ទៀត ដោយក្នុង ម្នាក់ៗទទួលបានកង្ហារ១គ្រឿង ។
ក្លឹបសិល្បៈឌីភីជាក្លឹបដែលទទួលបានប្រជាប្រិយភាពពីបណ្តាយុវជនដែលស្រឡាញ់សិល្បៈ ព្រោះក្លឹបនេះមានទីផ្សារជួយដល់ពួកគេក្រោយបញ្ចប់ការសិក្សា ។ ក្លឹបសិល្បៈឌីភីមានបង្រៀនច្រៀង សម្តែង របាំ និងផ្នែកពិធីករ ពិធីការិនី។ ចំពោះកុមារកំព្រាក្លឹបមិនយកប្រាក់កម្រៃទេ ។ ក្លឹបសិល្បៈឌីភីមានទីតាំងបង្ហាត់នៅខាងត្បូងជាប់របងសារមន្ទីរជាតិទួលស្លែង ៕
ចែករំលែកព័តមាននេះ