រាជធានីភ្នំពេញ ៖ កុមារកំព្រា កុមាររើសអេតចាយ កុមារអាណាថា កុមារគ្មានទីពឹង កុមារគ្មានទីលំនៅ ដេកនៅតាមសួន និងទីសារធារណៈចំនួនជាង៣០០នាក់ ត្រូវបានទទួលរបបអាហារពេលព្រឹក និងពេលថ្ងៃត្រង់ចំនួន៥ថ្ងៃពីសប្បុរសជនមួយក្រុមដែលដឹកនាំដោយលោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលរោងចក្រស្រាបៀកម្ពុជា ក្រុមហ៊ុនជីបម៉ុង លោកជំទាវឧកញ៉ាអ៊ឹង ស៊ីស្រ៊ន់ លោកជំទាវឧកញ៉ា យីន ផាន្នី និងលោកជំទាវ ចន្ធូ ព្រមទាំងអស់លោក លោកស្រីដែលមានចិត្តសប្បុរសជាច្រើនអ្នកទៀតបានចូលរួមផ្តល់ជូនតាមរយៈអង្គការផ្ទះបាយកុមារ។ ក្នុងការផ្តល់ជូននេះដែរ បានធ្វើឡើងកាលពីវេលាម៉ោង៣និង៣០នាទីរសៀល ថ្ងៃទី២៩ មីនា ២០១៥ នៅទីស្នាក់ការអង្គការផ្ទះបាយកុមារផ្ទះលេខ២៦ ផ្លូវ៤៥៤ ក្នុងសង្កាត់ទួលទំពូងទី២ ខណ្ឌចំការមន។
លោកជំទាវឧកញ៉ា ភាព ហៀក ជាប្រធានក្រុមប្រឹក្សាភិបាលរោងចក្រស្រាបៀរកម្ពុជា ក្រុមហ៊ុនជីបម៉ុងបានមានប្រសាសន៍ថា ក្រុងនាមជាសប្បុរសជនដែលមានចិត្តសប្បុរសធម៌ទាំងអស់គ្នាដែលមានវត្តមាននៅទីនេះបានពាំនាំនូវការផ្តល់ជូនចៅៗ ក្មួយៗ តាមរយៈអង្គការផ្ទះបាយកុមារនូវអាហារចំនួន៥ពេល ដែលចាប់ពីថ្ងៃទី៣១ មីនា រហូតដល់ថ្ងៃទី៤ មេសា។ ដោយបានឃើញនូវភាពខ្វះខាតរបស់ចៅៗ ក្មួយៗទាំងអស់គ្នាដែលសុទ្ធតែជាក្មេងៗដ៏គួរឱ្យស្រឡាញ់ និងអាណិតគ្មានអ្វីមកព្រៀមផ្ទឹមពុំបាននៅទីនេះ ក្នុងពេលកន្លងមកអ៊ុំ មីង ទាំងអស់គ្នាដែលសុទ្ធតែអ្នកមានចិត្តសប្បុរសធម៌នោះ តែងតែបានផ្តល់ជូននូវអាហារដល់ពួកក្មួយៗ តាមរយៈអង្គការផ្ទះបាយកុមារជាញឹកជាប់ផងដែរ។ លោកជំទាវក៏បានមានប្រសាសន៍ផ្តាំផ្ញើរផងដែរថា ដោយសារតែចងឱ្យក្មួយៗតាំងអស់គ្នាដែលនៅទីនេះ បានហូបឆ្អែត មានសុខភាពល្អ និងបានចូលរៀនផងដែរនោះ ទើបបានជាពួកអ៊ុំៗ មីងៗ តែងតែបាននាំគ្នាធ្វើការឧបត្ថម្ភជាថវិការ សម្លៀកបំពាក់ និងឧបករណ៍សិក្សាផ្សេងៗជាបន្តបន្ទាប់ផងដែរ។ ទន្ទឹមនឹងការខិតខំចំណាយពេលវេលានឹងចំណាយព្រទ្យធន់ផ្ទាល់ខ្លួនរបស់សប្បុរសជនទាំងអស់គ្នាដែលបានយកជួយឧបត្ថម្ភក្មួយៗទាំងអស់គ្នាក្នុងពេលនេះ សូមឱ្យក្មួយៗយកចិត្តទុកដាក់ខំរៀនសូត្រ និងជៀសឱ្យឆ្ងាយពីគ្រឿងញៀនទាំងអស់គ្នា ដើម្បីធ្វើយ៉ាងណាប្រែក្លាយខ្លួនឯងឱ្យទៅជាពលរដ្ឋល្អម្នាក់នៅក្នុងសង្គមជាតិយើង។
លោកង៉ូវ ឈីវ ប្រធានអង្គការផ្ទះបាយកុមារក៏បានមានប្រសាសន៍ថា លោកក៏សូមថ្លែងអំណរគុណយ៉ាងជ្រៀលជ្រៅទៅដល់លោកជំទាវទាំងអស់គ្មាដែលមានវត្តមាននៅទីនេះ ដែលមានចិត្តសប្បុរសធម៌តែងតែបានជួយឧបត្ថម្ភជាអាហារ និងសម្ភារផ្សេងៗជាច្រើនកន្លងមកដល់កុមារនៅក្នុងអង្គការផ្ទះបាយកុមារ។ ការជួយឧបត្ថម្ភរបស់សប្បុរជននេះដែរ អង្គការផ្ទះបាយកុមារតែងតែបានធ្វើអាហារផ្តល់ជូនដល់ក្រុមកុមារក្រីក្រគ្មានទីពឹងជាច្រើនដូចជា ក្មេងៗគ្មានទីពឹង ក្មេងៗរើសអេតចាយ ក្មេងៗស្នាក់នៅតាមសួន និងតាមទីសារធារណៈជាដើម ជាពិសេសគឺទារកផងដែរ។ លោកក៏មានមានប្រសាសន៍បន្តទៀតថា ក្នុងមួយថ្ងៃអង្គការផ្ទះបាយកុមារបានរៀបចំអាហារដល់ពួកគេចំនួនពីរពេល គឺអាហារពេលព្រឹក និងពេលថ្ងៃត្រង់ ចាប់ពីថ្ងៃច័ន្ទ ដល់ថ្ងៃសៅរ៍ ហើយក្នុងមួយថ្ងៃៗមានកុមារចំនួន២៥០នាក់ ទៅជាង៣០០នាក់ ដែលបានមកទទួលអាហារទាំងពីរពេលនៅទីនេះ ដោយមិនប្រកាន់ថា ជាកុមារមានឪពុកម្តាយ ឬជាកូនកំព្រាឡើយ។ ដែលការចំណាយសម្រាប់ម្ហូបក្នុងមួយថ្ងៃសាច់ពី២៥ទៅ៣០គីឡូ ហើយអង្គការផ្ទះបាយកុមារតែងតែមានការឧបត្ថម្ភទៅគ្រប់តម្រូវការរបស់ក្រុមកុមារទាំងនេះជាច្រើនផ្នែកផងដែរ។
ក្នុងឱកាសនេះដែរ លោកជំទាវឧកញ៉ា ភាព ហៀក ប្រធានក្រុមប្រឹក្សាភិបាលរោងចក្រស្រាបៀកម្ពុជា ក្រុមហ៊ុនជីបម៉ុង បានឧបត្ថម្ភប្រាក់ចំនួន១លានរៀល ទឹកដោះគោខាប់ចំនួន២៨៨កំប៉ុង ម្សៅទឹកដោះគោចំនួន៣២កំប៉ុង ស្ករសចំនួន១០០គីឡូ នំក្មេងចំនួន៤៣២កញ្ចប់, លោកជំទាវឧកញ៉ា អ៊ឹង ស៊ីស្រ៊ន់ ឧបត្ថម្ភប្រាក់ចំនួន៤០០ដុល្លារ, លោកជំទាវឧកញ៉ា យីន ផាន្នី ឧបត្ថម្ភប្រាក់ចំនួន៨០ដុល្លារ និងលោកជំទាវ ចន្ធូ ឧបត្ថម្ភប្រាក់ចំនួន១២០ដុល្លារ សម្រាប់យកទៅធ្វើអាហារជូនដល់ក្រុមកុមារដែលគ្មានទីពឹងទាំងអស់នេះចាប់ពីថ្ងែទី៣១ មីនា រហូតដល់ថ្ងៃទី០៤ មេសា នេះ៕
ចែករំលែកព័តមាននេះ