ខេត្ដសៀមរាប ៖ រថយន្ដសាំងយ៉ុង១៥កៅអីដឹកអ្នកធ្វើចំការចេញពីភូមិសាស្ត្រឃុំស្រែណូយ ស្រុកវ៉ារិន បានបែកកង់ក្រោយខាងឆ្វេងក្រឡាប់អូសចម្ងាយជាង២០០ម៉ែត្របណ្តាលឲ្យអ្នកជិះលើរថយន្តចំនួន២៧នាក់ធ្លាក់រដូករណែលពេញ
ខេត្ដសៀមរាប ៖ រថយន្ដសាំងយ៉ុង១៥កៅអីដឹកអ្នកធ្វើចំការចេញពីភូមិសាស្ត្រឃុំស្រែណូយ ស្រុកវ៉ារិន បានបែកកង់ក្រោយខាងឆ្វេងក្រឡាប់អូសចម្ងាយជាង២០០ម៉ែត្របណ្តាលឲ្យអ្នកជិះលើរថយន្តចំនួន២៧នាក់ធ្លាក់រដូករណែលពេញវាលស្រែ ក្នុងនោះជាបឋមស្លាប់ម្នាក់ របួសធ្ងន់-ស្រាល២៦នាក់។
ហេតុការណ៍គ្រោះថ្នាក់ចរាចរនេះកើតឡើងកាលពីវេលាម៉ោង១០ និង៤៥នាទីព្រឹក ថ្ងៃទី២៩ មីនា ២០១៥ ស្ថិតនៅលើកំណាត់ផ្លូវហាយវេ(៦៧)ក្នុងភូមិត្មាតពង ឃុំរុនតាឯក ស្រុកបន្ទាយស្រី ខេត្តសៀមរាប។ សាក្សីដែលបានឃើញហេតុការណ៍នេះបានឲ្យដឹងថា រថយន្តម៉ាកសាំងយ៉ុងដឹកមនុស្សពេញប្រៀបនោះបើកបរក្នុងល្បឿនលឿនពីជើងមកត្បូង ហើយក៏បានបែកកង់ ភ្លាមនោះក៏រេចង្កូតក្រឡាប់អូសធ្លាក់វាលស្រែ បណ្តាលឲ្យស្លាប់ម្នាក់ របួសធ្ងន់៦នាក់ និងស្រាល២០នាក់រដូករណែលពេញចិញ្ចើមផ្លូវ។
លោកអនុសេនីយ៍ឯក ហឿល សារ៉ែម នាយផ្នែកសណ្តាប់ធ្នាប់នគរបាលស្រុកបន្ទាយស្រីបានប្រាប់កោះសន្តិភាពនៅរសៀលថ្ងៃទី២៩ មិនាឲ្យដឹងថា បើតាមសាក្សីដែលរួចផុតពីគ្រោះថ្នាក់មានឈ្មោះ ឈឿន ហួង ភេទប្រុស អាយុ២២ឆ្នាំរស់នៅភូមិតាព្រៀច ឃុំទីពោធិ៍ ស្រុកសន្ទុក ខេត្តកំពង់ធំបានរៀបរាប់ប្រាប់សមត្ថកិច្ចនៅកន្លែងកើតហេតុថា ពួកខ្លួនបានសម្រាកពីធ្វើចំការរួចក៏នាំគ្នាជិះរថយន្តសាំងយ៉ុងនេះចេញពីភូមិជប់ត្រាវ ឃុំស្រែណូយ ស្រុកវ៉ារិនដែលមានគ្នាចំនួន២៧នាក់ ឆ្ពោះទៅស្រុកកំណើត ប៉ុន្តែមកដល់កន្លែងកើតហេតុរថយន្តនោះក៏បែកកង់បណ្តាលឲ្យក្រឡាប់អូសជាច្រើនម៉ែត្រ ប៉ុន្តែសំណាងល្អខ្លួនខ្ញុំមិនមានរបួសធ្ងន់។
លោកបន្តថា ជនរងគ្រោះទាំងអស់នោះត្រូវបានសមត្ថកិច្ចហៅរថយន្តសង្គ្រោះតាមគ្លីនិកឯកជន និងមន្ទីរពេទ្យបង្អែកខេត្តមកជួយសង្គ្រោះ។ លោកបន្តទៀតថា រថយន្តបង្កម៉ាកសាំងយ៉ុងពណ៌ទឹកប្រាក់ចំណុះ១៥កៅអី ពាក់ស្លាកលេខបាត់ដំបង ២A.៦២៦០ បើកបរដោយឈ្មោះ ភក្រ័ មានទីលំនៅម្តុំស្រែណូយ។ លោកបញ្ជាក់ថា ជនរងគ្រោះដែលស្លាប់មានឈ្មោះ គា គុយ ភេទប្រុស អាយុ២២ឆ្នាំ រស់នៅខេត្តកំពង់ធំ។
ប្រភពចុងក្រោយបានឲ្យដឹងថា អ្នករងរបួសធ្ងន់មានចំនួន១៣នាក់ ក្នុងនោះស្រី៥នាក់៕
ចែករំលែកព័តមាននេះ