ខេត្តបន្ទាយមានជ័យ ៖ បុរសម្នាក់ត្រូវគេវាយនឹងដែកសរសៃរងរបួសធ្ងន់ កាលពីវេលាម៉ោងជាង៤ទៀបភ្លឺ ថ្ងៃទី២៩ មីនា ២០១៥ ក្នុងបរិវេណកាស៊ីណូផ្កាយ៥ ភូមិក្បាលស្ពាន១ សង្កាត់ និងក្រុងប៉ោយប៉ែត។
ជនរងគ្រោះឈ្មោះចិន្តា សុករុណា អាយុ២៧ឆ្នាំ មានទីលំនៅក្នុងភូមិសង្កាត់កើតហេតុ ជាបុគ្គលិកកាស៊ីណូរិចទើបបើកថ្មី។ ជនរងគ្រោះរងរបួសក្បាល និងផ្ទៃមុខ ព្រមទាំងដៃជើងដេរជាច្រើនថ្នេរ។
តាមប្រភពពីកន្លែងកើតហេតុប្រាប់ថា មុនហេតុការណ៍កើតឡើងជនរងគ្រោះបានផឹកស៊ីជុំគ្នាជាមួយមនុស្ស០១ក្រុម បន្ទាប់មកក៏ផ្ទុះជាជម្លោះឡើងសង្ស័យប់ះពារសំដីគ្នាឈានដល់ការប្រើហិង្សាវាយតប់គ្នាតែម្ដង។ ជនរងគ្រោះត្រូវអ្នកផឹកស៊ីជុំគ្នាព្រួតវាយទាត់ធាក់ និងប្រើដែកវាយបណ្ដាលឲ្យរងរបួសធ្ងន់ ហើយក្រុមបង្កបានគេចខ្លួនអស់។
ជនរងគ្រោះត្រូវបានមិត្តភក្តិដឹកទៅកាន់មន្ទីរពេទ្យបង្អែកក្រុងប៉ោយប៉ែតដើម្បីធ្វើការសង្គ្រោះក្រោយហេតុការណ៍កើតឡើង។ ប្រភពពីអាវុធហត្ថម្នាក់ប្រាប់ថា ជម្លោះខាងលើកើតឡើងដោយសារការផឹកស៊ីឌៀមដាមសម្ដីគ្នា ប៉ុន្តែមិនទាន់ដឹងពីមូលហេតុពិតនៅឡើយទេ ហើយជនរងគ្រោះត្រូវមនុស្ស៣ទៅ៤នាក់ព្រួតវាយ។
ជនរងគ្រោះមិនអាចសាកសួរបានព្រោះរបួសធ្ងន់។ ទោះជាយ៉ាងណាប្រភពដដែលបន្តថា បុរសម្នាក់ជាមិត្តភក្តិជនរងគ្រោះដែលស្ថិតក្នុងហេតុការណ៍ផ្ទុះជម្លោះដែរនោះត្រូវបានសមត្ថកិច្ចហៅសួរនាំរកអត្តសញ្ញាណក្រុមជនបង្កដើម្បីចាត់វិធានការតាមផ្លូវច្បាប់៕
ចែករំលែកព័តមាននេះ