ខេត្តក្រចេះ ៖ បុរសជាព្រូរថយន្តម្នាក់បានស្លាប់ដោយកៀបជាប់ជាមួយនឹងឈើជន្លង់ម្រេចក្នុងរថយន្តសាំយ៉ុង បន្ទាប់ពីជួបហេតុការណ៏រថយន្តបែកកង់ក្រឡាប់លើផ្លូវជាតិលេខ៧កាលព្រឹកថ្ងៃទី២៩ ខែមីនា ឆ្នាំ២០១៥ ក្នុងឃុំស្វាយជ្រះ ស្រុកស្នួល ។
ជនរងគ្រោះត្រូវបានគេស្គាល់ថាឈ្មោះ សៅ សឹម អាយុ១៧ឆ្នាំ មានទីលំនៅឃុំដារ ស្រុកចិត្របុរី ជាព្រូរថយន្ត ចំណែកឯអ្នកបើកបរបានគេចខ្លួនក្រោយពីជួបហេតុការណ៍នេះរួច ។
លោកវរសេនីយ៏ត្រី កែ វិណូ អធិការរងទទួលបន្ទុកចរាចរណ៏ស្រុកស្នួលបានឲ្យដឹងថា មូលហេតុដែលបណ្តាលឲ្យមានគ្រោះថ្នាក់ដោយសារតែរថយន្តមួយគ្រឿងនេះផ្ទុកធ្ងន់ ហើយបើកលឿន នៅពេលបែកកង់ក្រោយក៏បានរេចង្កូតក្រឡាប់តែម្តង ។
តាមការឲ្យដឹងពីអ្នកឃើញហេតុការណ៍គ្រោះថ្នាក់នេះបានឲ្យដឹងថា គេបានឃើញរថយន្តសាំយ៉ុង ពណ៌ស ពាក់ស្លាកលេខ ភ្នំពេញ 2M-4305 មួយគ្រឿងនេះមានផ្ទុកឈើជន្លង់ម្រេចពេញប្រៀប និងមានអ្នកជិះពីរនាក់ ពេលបើកកំពុងតែលឿនបានបែកកង់ខាង ក្រោយ ក៏រេចង្កូតក្រឡាប់ជាច្រើនជុំ បណ្តាលឲ្យស្លាប់ព្រូឡានម្នាក់ ។
សាកសពរបស់ជនរងគ្រោះជាព្រូរថយន្តត្រូវបានអ្នកភូមិជាមួយសមត្ថកិច្ចចាប់គាស់ទាញចេញមកក្រៅ ។
លោកអធិការរងបានឲ្យដឹងទៀតថា រថយន្តគឺត្រូវសមត្ថកិច្ចនាំមករក្សាទុកនៅប៉ុស្តិ៍រដ្ឋបាលនគរបាលស្វាយជ្រះបណ្តោះអាសន្នក្រោយពីបង្កហេតុរួច ៕
ចែករំលែកព័តមាននេះ