ខេត្តរតនគិរី ៖ កាលពីវេលាម៉ោង១១ ថ្ងៃទី២៩ ខែមីនា ឆ្នាំ២០១៥ ក្រុមអាជីវករលក់ដូរក្នុងផ្សារបានលុងបានមានជម្លោះជាមួយក្រុមហ៊ុនគីម ជ្រា ប្រមូលសំរាម របស់លោកជាគង និងអាជ្ញាធរក្រុងមួយប្រាវធំ ធ្វើឱ្យមានការផ្អើលពេញផ្សារ ។
ក្រុមអាជីវករផ្សារបានលុងដែលមានទីតាំងស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង ប្រមាណជាង៤០នាក់បានឱ្យកាសែត «កោះសន្តិភាព» ដឹងថា មុនពេលកើតមានជម្លោះ ពួកគាត់ជាអាជីវករលក់ដូរក្នុងផ្សារបានលុងបានឃើញខាងអាជ្ញាធរក្រុងបានលុង និងក្រុមហ៊ុនគីម ជ្រា ប្រមូលសំរាមរបស់លោកជា គង ដឹកសម្ភារសំណង់មួយចំនួនធំមានដូចជា ម៉ាស៊ីនភ្លើង និងដែក យកមកកសាងតូបថ្មីបន្ថែមទៀត ហើយបានបញ្ជាឱ្យពួកគាត់ជាអាជីវករលក់ដូរចាស់ៗផ្អាកការលក់ដូរមួយរយៈសិន រង់ចាំធ្វើតូបថ្មីហើយចាំចូលលក់ដូរវិញ ។ ក្រុមអាជីវករបានបន្តទៀតថា ពួកគាត់មិនព្រមផ្អាកលក់ដូរទេ លុះណាតែមានកិច្ចសន្យាត្រឹមត្រូវ ព្រោះថាបើគ្មានកិច្ចសន្យាទេ ពេលចូលលក់ដូរសារជាថ្មីមុខជាគ្មានកន្លែងលក់ទេ ។
លោកអ៊ុក សំអុល អភិបាលក្រុងបានលុងបានមានប្រសាសន៍ប្រាប់ឱ្យដឹងថា ការដឹកសម្ភារសំណង់មកធ្វើតូចថ្មីគឺធ្វើឱ្យជនជាតិដើមភាគតិចលក់ដូរជុំវិញផ្សារ ដូចនេះអាជីវករចាស់ៗត្រូវផ្អាកលក់ដូរមួយរយៈសិន ។
លោកជាម សុផាត តំណាងក្រុមហ៊ុនហេង ដារ៉ា វិនិយោគផ្សារ បានឱ្យដឹងដែរថា ក្រុមហ៊ុនហេង ដារ៉ា វិនិយោគផ្សារ មានច្បាប់ត្រឹមត្រូវក្នុងការវិនិយោគផ្សារដោយមានសុពលភាព៣៥ឆ្នាំ ហើយរហូតមកដល់ពេលនេះគឺទើបតែបាន៨ឆ្នាំប៉ុណ្ណោះ ។ ម្យ៉ាងវិញទៀតជាង២ខែដើមឆ្នាំ២០១៥នេះ ខាងក្រុមហ៊ុនក៏មិនបានដកហូតភាស៊ីតូបជុំវិញផ្សារដែរ ធ្វើឱ្យខាតចំណូលថវិកាក្នុង១ខែៗរាប់លានរៀល ។
ដោយឡែក ក្រុមអាជីវករលក់ដូរក្នុងផ្សារបានលុង ក៏បានអំពាវនាវ និងសំណូមពរដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សុំមេត្តាជួយពួកគាត់ផង ព្រោះពួកគាត់មានការលំបាកណាស់ ពេលខ្លះពួកគាត់កំពុងលក់ដូរ ខាងអាជ្ញាធរក្រុង និងខាងក្រុមហ៊ុន គីម ជ្រា ប្រមូលសំរាម បានមកដេញពួកគាត់មិនឱ្យលក់ដូរជាញឹកញាប់ និងជួនកាលនៅពេលយប់លួចរុះរើតូបលក់ដូររបស់ពួកគាត់ទៀតផង ។
ក្រុមអាជីវករបានត្អូញត្អែរថា ផ្សារតែមួយតែមានអ្នកគ្រប់គ្រងដល់ទៅ៣ គឺទី១-អាជ្ញាធរក្រុងបានលុង ទី២-ក្រុមហ៊ុនគីម ជ្រា ប្រមូលសំរាម ដែលជាអ្នកមានអំណាច មានលុយ និងទី៣-ក្រុមហ៊ុនហេង ដារ៉ា វិនិយោគផ្សារ ។ ក្រុមអាជីវករផ្សារបន្តត្អួញត្អែរទៀតថា អ្នកដែលតែងតែមករករឿងក្រុមអាជីវករគឺខាងអាជ្ញាធរក្រុង និងក្រុមហ៊ុនគីម ជ្រា ប្រមូលសំរាម ដែលតែងតែមកហាម និងដេញអាជីវករមិនឱ្យលក់ ឬផ្អាកការលក់ដូរមួយរយៈជាញឹកញាប់ ។
ចែករំលែកព័តមាននេះ