រាជធានីភ្នំពេញ ៖ យ៉ាងហោចណាស់មនុស្ស២នាក់រងរបួសធ្ងន់-ស្រាល បន្ទាប់ពីមានរថយន្តមួយគ្រឿងបើកបត់ឆ្វេងលឿនជ្រុលទៅបុកជនរងគ្រោះ ខណ:ដែលកំពុងជិះម៉ូតូបញ្ច្រាសទិសគ្នា ហើយបើករត់បាត់ បណ្តាលឲ្យផ្លោងខ្ទាតអ្នកជិះពីក្រោយទៅប៉ះជាមួយរថយន្តមួយគ្រឿងផ្សេងទៀត ដែលបើកស្របទិសជាមួយរថយន្តបង្ក កាលពីវេលាម៉ោង៨ និង៣០នាទីយប់ ថ្ងៃទី២៨ មីនា ២០១៥ ស្ថិតនៅលើកំណាត់ផ្លូវជាតិលេខ៤ ត្រង់ចំណុចមុខសាលាក្តីខ្មែរក្រហម ភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ ។
តាមប្រភពនៅកន្លែងកើតហេតុបានឱ្យដឹងថា ជនរងគ្រោះឈ្មោះ កូយ យ៉េន ភេទប្រុស អាយុ២៨ឆ្នាំ មុខរបរបុគ្គលិកក្រុមហ៊ុនសន្តិសុខឯកជន ស្នាក់នៅភូមិកំបូល សង្កាត់កំបូល ខណ្ឌពោធិ៍សែនជ័យ មានស្រុកកំណើត ភូមិវាលស្មាច់ ឃុំស្បូវ ស្រុកកំចាយមារ ខេត្តព្រៃវែង រងរបួសស្រាល ជាអ្នកបើកបរម៉ូតូ ម៉ាកហុងដា C១២៥ ស៊េរី២០១១ ឡើងតែម២០១៣ ពណ៌ខ្មៅ ពាក់ស្លាកលេខ ភ្នំពេញ 1AK-7785 និងអ្នករួមដំណើរជាមួយ មានឈ្មោះ សួស វិសាល ភេទប្រុស អាយុ២៤ឆ្នាំ រស់នៅភូមិរកា ឃុំម្កាក់ ស្រុកអង្គស្នួល ខេត្តកណ្តាល រងរបួសធ្ងន់សន្លប់ឈឹងនៅកន្លែង ។
ចំណែករថយន្តផ្តើមបង្កតាមប្រជាពលរដ្ឋបានអះអាងថា ជារថយន្តម៉ាកកាមរី មិនចាំពណ៌ មិនចាំស្លាកលេខ ខណ:ពេលកើតហេតុ មេឃងងឹត ហើយធ្លាក់ទៀត ។ ដោយឡែក រថយន្តដែលជនរងគ្រោះខ្ទាតចូល ម៉ាកវីហ្គោ ពណ៌ស្លែ ពាក់ស្លាកលេខ ភ្នំពេញ 2F-8739 ជិះគ្នា២នាក់ ប្រុសម្នាក់ និងស្រីម្នាក់ អ្នកបើកបរឈ្មោះ ភាព សុរិទ្ធ ភេទប្រុស អាយុ២៥ឆ្នាំ មុខរបររត់ម៉ូតូឌុប ស្នាក់នៅទីរួមខេត្តកោះកុង និងមានស្រុកកំណើតភូមិត្រពាំងព្រលឹត សង្កាត់២ ស្រុកកំពង់បាយ ខេត្តកំពត ។
តាមប្រភពនៅកន្លែងបានឲ្យដឹងថា មុនកើតហេតុ ជនរងគ្រោះជិះម៉ូតូឌុបគ្នាពីលិចទៅកើត លុះដល់ចំណុចខាងលើ ស្រាប់តែរថយន្តបង្កម៉ាកកាមរី បើកពីកើតទៅលិច បត់ឆ្វេងយ៉ាងលឿនជ្រុលទៅបុកម៉ូតូ ហើយបន្ថែមល្បឿនរត់គេចបាត់ ចំណែកមអ្នករួមដំណើរដោយម៉ូតូផ្លោងទៅចូលពីមុខរថយន្តវីហ្គោ បើកពីកើតទៅលិច បណ្តាលឲ្យបុកអូសជាង១០ម៉ែត្រ ទើបរថយន្តឈប់ស្ងៀម ។
ជនរងគ្រោះត្រូវបានរថយន្ត១១៩ ប្រចាំនៅគោលដៅសំរោងក្រោមបញ្ជូនទៅមន្ទីរពេទ្យព្រះកុសុមៈ ចំណែកម៉ូតូជនរងគ្រោះ និងរថយន្តវីហ្គោត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោក ស្នងការរាជធានីភ្នំពេញរង់ចាំដោះស្រាយពេលក្រោយ ៕
ចែករំលែកព័តមាននេះ