រាជធានីភ្នំពេញ ៖ ប្រធានសម្ព័ន្ធសមាគមសហគ្រាសធុនតូចនិងមធ្យមកម្ពុជា(FASMEC) លោកឧកញ៉ា តែ តាំងប៉ មានប្រសាសន៍ថា ដើម្បីត្រៀមខ្លួនចូលសហគមន៍សេដ្ឋកិច្ចអាស៊ាន សម្ព័ន្ធសមាគមសហគ្រាសធុនតូចនិងមធ្យមកម្ពុជា តែងតែជំរុញនិងរៀបចំការតាំងបង្ហាញផលិតផលក្នុងស្រុកជាបន្តបន្ទាប់ក្នុងមួយឆ្នាំៗ ។ ជាក់ស្តែងនៅថ្ងៃទី២៧ដល់ថ្ងៃទី២៩ មីនា នេះ FASMECបានរៀបចំតាំងបង្ហាញផលិតផលក្នុងស្រុកចំនួន២០២ស្តង់ ក្នុងនោះស្តង់ម្ហូបអាហារមានច្រើនជាងគេ បើធៀបនឹងផលិតផលដទៃទៀត ដែលបានរៀបចំនៅក្នុងមណ្ឈមណ្ឌលសន្និបាត និងពិព័រណ៍កោះពេជ្រ ដើម្បីឲ្យប្រជាជនខ្មែរនិងបណ្តាប្រទេសនៅអាស៊ានបានស្គាល់កាន់តែច្បាស់អំពីផលិតផលខ្មែរ ។
លោកឧកញ៉ាបន្តថា ការតាំងបង្ហាញផលិតផលនេះ សម្ព័ន្ធសមាគមបានធ្វើឡើងចំនួន៥ឆ្នាំមកហើយ និងបានកត់សម្គាល់ថា ពីមួយឆ្នាំទៅមួយឆ្នាំ អ្នកដែលមានផលិតផលបានមកចូលរួមកាន់តែច្រើនឡើងៗ ក្នុងនោះសូម្បីតែការវេចខ្ចប់ មា្នក់ៗបានព្យាយាមធ្វើយ៉ាងណាឲ្យមានសោភ័ណភាព និងគុណភាព ដើម្បីត្រៀមខ្លួនចូលសមាហរណកម្មសេដ្ឋកិច្ចអាស៊ាននាពេលខាងមុខ ។
លោកឧកញ៉ាលើកឡើងថា សម្ព័ន្ធសមាគម បានដើរតួនាទីយ៉ាងសំខាន់ក្នុងការជំរុញនិងជួយស្វែងរកការបណ្តុះបណ្តាលវគ្គខ្លីដើម្បីឲ្យម្ចាស់សហគ្រាសធុនតូចនិងមធ្យម អាចផលិតនូវផលិតផលដែលមានគុណភាពទៅតាមស្តង់ដាដូចប្រទេសផ្សេងទៀត ។ ជាពិសេសក្រសួងឧស្សហកម្មនិងសិប្បកម្ម បាននិងកំពុងជំរុញផ្នែកស្តង់ដានេះអាចឈានទៅប្រកួតប្រជែងនៅក្នុងទីផ្សារអាស៊ានបានដូចគេនៅពេលខាងមុខ។
លោកឧកញ៉ាបញ្ជាក់ថា តាមការជំរឿនរបស់ក្រសួងផែនការ កាលពីឆ្នាំ២០១១ កម្ពុជាមានសហគ្រាសធុនតូចនិងមធ្យមចំនួន៥៣ម៉ឺនកន្លែង ហើយសព្វថ្ងៃ សម្ព័ន្ធមានគោលបំណងជំរុញសហគ្រាសទាំងនោះឲ្យចូលទៅក្នុងចង្កោមរបស់ក្រសួងឧស្សាហកម្មនិងសិប្បកម្ម ដើម្បីងាយស្រួលក្នុងការគ្រប់គ្រង និងចង់ដឹងថា ពួកគាត់ខ្វះខាតវត្ថុធាតុដើមអ្វីខ្លះសម្រាប់បំពេញខ្សែសង្វាក់ផលិតកម្មរបស់គាត់ឬយ៉ាងណា ? ហើយបើខ្វះខាត ខាងសម្ព័ន្ធនឹងស្នើសុំទៅរាជរដ្ឋាភិបាលដើម្បីឲ្យពួកគាត់នាំចូលដោយមិនបាច់យកពន្ធឡើយ ៕
ចែករំលែកព័តមាននេះ