ខេត្តព្រះវិហារ៖ គណៈប្រតិភូខណ្ឌជ្រោយចង្វារ ខណ្ឌឫស្សីកែវ និងខណ្ឌដូនពេញកាលពីរសៀលថ្ងៃ២៨ មីនា ២០១៥ បានចុះសួរសុខទុក្ខ និងនាំអំណោយសម្តេចតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត
ខេត្តព្រះវិហារ៖ គណៈប្រតិភូខណ្ឌជ្រោយចង្វារ ខណ្ឌឫស្សីកែវ និងខណ្ឌដូនពេញកាលពីរសៀលថ្ងៃ២៨ មីនា ២០១៥ បានចុះសួរសុខទុក្ខ និងនាំអំណោយសម្តេចតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត ប៊ុន
រ៉ានី ហ៊ុន សែន ទៅចែកជូនគ្រួសារកងទ័ព និងកងទ័ព ចំនួន១៥២គ្រួសារនៃវរសេនាតូច៣៩១ ដែលឈរជើងនៅសមរភូមិមុខស្ថិតនៅភូមិសែនរុងរឿង៣ ឃុំទឹកក្រហម ស្រុកជាំក្សាន្ត ខេត្តព្រះវិហារ។
គណៈប្រតិភូខណ្ឌឫស្សីកែវដឹកនាំដោយលោក ឃ្លាំង ហួត អភិបាលនៃគណៈអភិបាលខណ្ឌជ្រោយចង្វារ និង លោក ប្រាក់ ចាន់ណា ប្រធានក្រុមប្រឹក្សាខណ្ឌជ្រោយចង្វារ, គណៈប្រតិភូខណ្ឌដូនពេញដឹកនាំដោយលោក គួច ចំរើន អភិបាលនៃគណៈអភិបាលខណ្ឌដូនពេញ និងលោក ហែម អាន ប្រធានក្រុមប្រឹក្សាខណ្ឌដូនពេញ និងគណៈប្រតិភូខណ្ឌឫស្សីកែវដឹកនាំលោក ធុយ សុខន អភិបាលនៃគណៈអភិបាលខណ្ឌឫស្សីកែវ និងលោកវ៉ាន់ សាលី ប្រធានក្រុមប្រឹក្សាខណ្ឌឫស្សីកែវ ។
អំណោយទាំងនេះជាការផ្សារភ្ជាប់ និងជួយឧបត្ថម្ភដល់កងទ័ព និងគ្រួសារក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ ម្យ៉ាងទៀតជាការលើកទឹកចិត្តដល់វីរយុទ្ធជនដែលឈរជើងយ៉ាងអង់អាចក្លាហានដើម្បីការពារបូរណភាពទឹកដី ជាការចូលរួមចំណែកក្នុងស្មារតីសេ្នហាជាតិ តាមពាក្យស្លោក «ការពារជាតិ ដើម្បីទាំងអស់គ្នា ទាំងអស់គ្នា ដើម្បីការពារជាតិ»។
ក្នុងឱកាសនេះដែរ លោក គួច ចំរើន តំណាងគណៈប្រតិភូខណ្ឌទាំង៣ ក៏បានថ្លែងអំណរគុណ និងពាំនាំនូវប្រសាសន៍ផ្តាំផ្ញើដ៏មានតម្លៃរបស់សម្តេចតេជោ និងសម្តេចកិត្តិព្រឹទ្ធបណ្ឌិត ផ្តាំផ្ញើសួរសុខទុក្ខដែលបានផ្តល់នូវអំណោយ និងថវិកាដ៏ច្រើនសន្ធឹកសន្ធាប់យកមកចែកជូនគ្រួសារកងទ័ពនាពេលនេះ ។
លោកគួច ចំរើន ក៏បានកោតសរសើរចំពោះវីរភាពដ៏អង់អាចក្លាហានរបស់វីរកងទ័ពរបស់យើង ដែលឈរការពារខ្សែក្រវ៉ាត់ព្រំដែនប្រចាំទិសប្រាសាទព្រះវិហារ។ ជាការឆ្លើយតបចំពោះការយកចិត្តទុកដាក់របស់ប្រមុខរាជរដ្ឋាភិបាលដែលដឹកនាំដោយ សម្តេចតេជោ ប្រកបដោយគតិបណ្ឌិត វីរកងទ័ពដ៏ក្លាហានបានសច្ចាថា តស៊ូការពារមិនឱ្យទឹកដីដ៏បវរនេះបាត់បង់សូម្បីតែមួយមីល្លិម៉ែត្រឡើយ។
អំណោយដែលបាននាំយកមកចែកជូននាពេលនេះ ១គ្រួសារទទួលបានអង្ករ២៥គីឡូក្រាម, មីយើង១កេស, ទឹកត្រី១យួរ, ទឹកស៊ីអីវ១យួរ, ត្រីខកំប៉ុង១យួរ, ប្រេងឆា២ដប, ប៊ីចេង១គីឡូក្រាម, សារុង១, ក្រមា១,ថវិកា១០ម៉ឺនរៀល និងឧបត្ថម្ភប្រធានវរៈ១នាក់៣០ម៉ឺនរៀល, ឧបត្ថម្ភអនុប្រធានវរៈ៦នាក់ ក្នុងម្នាក់២០ម៉ឺនរៀល, ឧបត្ថម្ភប្រធាន គ ៤នាក់ ក្នុងម្នាក់១៥ម៉ឺនរៀល, ឧបត្ថម្ភប្រធាន ខ ចំណុះវរៈ៣នាក់ ក្នុងម្នាក់១០ម៉ឺនរៀល, ឧបត្តម្ភស្ត្រីមានផ្ទៃពោះ៣នាក់ ក្នុងម្នាក់២០ម៉ឺនរៀល, ឧបត្តម្ភស្ត្រីមានកូនភ្លោះ២នាក់ ក្នុងម្នាក់១០ម៉ឺនរៀល, ឧបត្ថម្ភកូនៗកងទ័ព ៥០ម៉ឺនរៀល, ឧបត្ថម្ភអង្គភាពវរៈ ៦លានរៀល និងឧបត្ថម្ភអណ្តូងទឹកចំនួន២ តម្លៃ១២លានរៀល សរុបជាថវិកាអស់ចំនួន៦០.២៤២.៤០០រៀល៕
ចែករំលែកព័តមាននេះ