ខេត្តសៀមរាប ៖ ពលរដ្ឋប្រុសស្រីក្មេង ចាស់ ជាង៥០០នាក់នៅក្នុងឃុំពង្រលើ ស្រុកជីក្រែង ខេត្តសៀមរាប បានក្អូតចង្អោរ ចុកពោះ រាករូសទន់ដៃទន់ជើង បន្ទាប់ពីបរិភោគនំបុ័ងដាក់សាច់ក្នុងកម្មវិធីជប់លៀងមួយរបស់អង្គការទស្សនៈពិភពលោក ហៅកាត់ថា(WORLD VISON) ខណៈគ្រូពេទ្យ និងសមត្ថកិច្ចកំពុងជួយសង្គ្រោះនៅតាមមណ្ឌលសុខភាពនានាដែលមានអ្នកជម្ងឺធ្ងន់និងស្រាលជាច្រើននាក់។
ហេតុការណ៍ពុលអាហារនេះកើតឡើងកាលពីវេលាម៉ោង៧យប់ ថ្ងៃទី២៧រហូតដល់ថ្ងៃទី២៨ មីនា ២០១៥ ស្ថិតនៅក្នុងសាលាបឋមសិក្សាចេក ក្នុងភូមិចេក ឃុំពង្រលើ ស្រុកជីក្រែង ខេត្តសៀមរាប។ តាមប្រភពពីពលរដ្ឋប្រុសស្រីក្មេងចាស់ជាច្រើននាក់បានឲ្យដឹងថា ពួកគាត់ទៅចូលរួមក្នុងកម្មវិធីជប់លៀងមួយរបស់អង្គការទស្សនៈពិភពលោក ហៅកាត់ថា(WORLD VISON)ដែលគេរៀបចំកម្មវិធីស្តីពីការទប់ស្កាត់ពលកម្មលើកុមារ។
ប្រភពបានបន្តថា បន្ទាប់ពីកម្មវិធីនោះចប់សព្វគ្រប់ ម្ចាស់គំរោងក៏បានរៀបចំនំបុ័ងដាក់សាច់ និងទឹកបរិសុទ្ធជូនពលរដ្ឋទាំងនោះបរិភោគដើម្បីអបអរសាទរដល់អ្នកចូលរួមក្នុងកម្មវិធីនោះ។ បន្ទាប់ពីទទួលទាននំបុ័ងដាក់សាច់ និងទឹកបរិសុទ្ធនេះរួចគេសង្កេតឃើញថា មានអាការប្លែកនៅវេលាម៉ោង៧ល្ងាចថ្ងៃទី ២៧ លុះដល់ព្រឹកឡើងថ្ងៃទី២៨ មិីនា ទើបឃើញមានការឆោឡោផ្អើលពេញភូមិ។ ប្រភពបានបន្ថែមទៀតថា រហូតមកដល់ម៉ោងនេះគេសង្កេតឃើញមានពលរដ្ឋក្មេងចាស់ប្រុសស្រីដែលពុលអាហារកើនឡើងប្រមាណជាង៥០០នាក់ហើយ។
អធិការនគរបាលស្រុកជីក្រែងលោកវរសេនីយ៍ទោ តូច សាកល មានប្រសាសន៍ប្រាប់កោះសន្តិភាពនៅរសៀលថ្ងៃទី២៨ មីនានេះថា ករណីនេះកើតឡើងតាំងពីល្ងាចថ្ងៃទី២៧ លុះព្រឹកឡើងថ្ងៃទី២៨ មីនា ក៏ផ្ទុះហេតុការណ៍ថា មានមនុស្សពុលនំបុ័ងកាន់តែច្រើនឡើងៗ។ លោកបន្តថា រឿងនេះកើតឡើងបន្ទាប់ពីកម្មវិធីនោះរួចរាល់ហើយ ពួកគេនាំគ្នាជប់លៀងហូបអាហារសម្រន់មាននំបុ័ងដាក់សាច់នឹងទឹកបរិសុទ្ធ។ លោកបន្តថា បន្ទាប់ពីពួកគេហូបនំបុ័ងនោះរួចហើយក៏ឃើញមានពលរដ្ឋមួយចំនួនចុកពោះរាករូស រហូតទន់ដៃទន់ជើង។
លោកបន្ថែមថា បច្ចុប្បន្នសមត្ថកិច្ច និងក្រុមគ្រូពេទ្យបានវេចខ្ចប់នំបុ័ងទាំងនោះយកទៅពិនិត្យនៅទីក្រុងភ្នំពេញ ដូច្នេះមូលហេតុនៃការពុលនេះនៅមិនទាន់ដឹងការពិតនៅឡើយទេ។ លោកបន្ថែមទៀតថា ជនរងគ្រោះទាំងអស់អាចមានចំនួនរហូតដល់ជិត៥០០នាក់ ហើយបច្ចុប្បន្ននេះសមត្ថកិច្ចនិងក្រុមគ្រូពេទ្យកំពុងជួយសង្គ្រោះនៅតាមមណ្ឌលសុខភាពនានានៃស្រុកជីក្រែង និងស្រុកសូទ្រនិគម។
ទាក់ទិននឹងករណីនេះលោកក្រួស សារ៉ាត់ ប្រធានមន្ទីរសុខាភិបាលខេត្តសៀមរាបមិនអាចសុំការពន្យល់បានទេជុំវិញករណីពលរដ្ឋពុលអាហារនេះដោយសារទូរស័ព្ទរបស់លោកហៅចូលជាច្រើនដង តែគ្មានអ្នកលើក។ ចំណែកលោកប្រធានអង្គការទស្សនៈពិភពលោក ហៅកាត់ថា(WORLD VISON)ដែលគេរៀបចំកម្មវិធីមិនអាចសុំការពន្យល់បានទេដោយលោកស្នើឲ្យទាក់ទងទៅក្រុមការងារខេត្ត។
ជុំវិញករណីនេះដែរលោក ឃឹម ប៊ុនសុង អភិបាលខេត្តសៀមរាបមិនអាចសុំធ្វើការអត្ថាធិប្បាយបានទេពីបញ្ហានេះ ប៉ុន្តែនៅរសៀលនេះគេក៏ឃើញមានវត្តមានលោក ឃឹម ប៊ុនសុងអភិបាលខេត្ត និងក្រុមការងារខេត្តបានចុះទៅសួរសុខទុក្ខដល់ពលរដ្ឋដែលរងគ្រោះទាំងនោះផងដែរ។
គួរកត់សម្គាល់ផងដែរថា នេះជាលើកទី១ហើយ ក្នុងឆ្នាំ២០១៥ ដែលមានពលរដ្ឋរាប់រយនាក់បានពុលនំបុ័ងនៅស្រុកជីក្រែង ប៉ុន្តែមិនទាន់មានពលរដ្ឋណាម្នាក់ឈានទៅដល់ការស្លាប់បាត់បង់ជីវិតនោះទេ។ លទ្ធផលចុងក្រោយរបស់សមត្ថកិច្ចអ្នករងគ្រោះដោយសារការពុលនេះអាចឈានទៅដល់៥៤២នាក់ ក្នុងនោះមនុស្សចាស់១៧៨នាក់ ហើយលទ្ធផលលម្អិតនោះបានបង្ហាញថា ការពុលនេះគឺបណា្តលមកពីជ្រក់ត្រសក់ ៕
ចែករំលែកព័តមាននេះ