ខេត្តប៉ៃលិន ៖ មានសេចក្តីរាយការណ៍ពីប្រជាពលរដ្ឋ និងអាជ្ញាធរមូលដ្ឋានកាលពីចុងខែកុម្ភៈ និងខែមីនា ឆ្នាំ២០១៥ កន្លងទៅនេះថា នៅតំបន់ព្រៃអភិរក្ស ស្ថិតក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន និងត្រង់ចំណុចអូរអែម ក្នុងភូមិបហ៊ុយ សង្កាត់បយ៉ាខា ក្រុងប៉ៃលិន សត្វព្រៃដ៏កម្រជាច្រើនប្រភេទដូចជា សំពោច ស្ការ ត្រកួត ជ្រូកព្រៃ ពស់ ឈ្លូស ប្រើស ក្តាន់ និងសត្វផ្សេងៗជាច្រើនទៀតនៅក្នុងព្រៃតំបន់ការពារនេះស្ទើរតែផុតពូជទៅហើយ ដោយត្រូវបានសមត្ថកិច្ចពាក់ព័ន្ធមួយចំនួន និងប្រជាពលរដ្ឋប្រកបរបររកស៊ីបរបាញ់ និងចាប់យកទៅលក់នៅតាមហាងតូចធំៗនានាក្នុងក្រុងប៉ៃលិន ។
ប្រភពព័ត៌មានពីប្រជាពលរដ្ឋជាច្រើនបានបង្ហើបឱ្យដឹងថា តាំងពីដើមរហូតមកដល់បច្ចុប្បន្ននេះ បទល្មើសសត្វព្រៃនៅតែបន្តមានដដែល ដោយសារតែមន្ត្រីមួយចំនួនមានតួនាទីជាអ្នកការពារសត្វព្រៃទាំងនោះបានប្រព្រឹត្តិបទល្មើស ព្រោះថា ខណៈមេចាត់ឱ្យទៅការពារព្រៃ ពួកគេកាប់ព្រៃឈើលក់ ហើយពេលមេឱ្យទៅការពារសត្វព្រៃ ពួកគេចាប់ និងបាញ់សម្លាប់សត្វព្រៃធ្វើម្ហូប និងលក់ឱ្យឈ្មួញមួយចំនួនដឹកតាមម៉ូតូបន្តយកទៅលក់នៅតាមហាងស្ទើរតែទាំងអស់ក្នុងក្រុងប៉ៃលិន ។ ម្យ៉ាងវិញទៀត មានសត្វព្រៃមួយចំនួនក៏ត្រូវក្រុមឈ្មួញដឹកតាមម៉ូតូយកទៅលក់រហូតដល់ខេត្តបាត់ដំបងផងដែរ ដោយចេញតាមផ្លូវក្រចាប់ សង្កាត់អូរតាវ៉ៅ ក្រុងប៉ៃលិន ។
ប្រជាពលរដ្ឋបន្តទៀតថា សត្វព្រៃជាច្រើននៅក្នុងប្រទេសកម្ពុជាយើងបច្ចុប្បន្នអាចនឹងទទួលរងការផុតពូជ តែសត្វមួយចំនួនទៀតនៅសេសសល់តិចតួចបំផុតពោលគឺនៅក្នុងព្រៃជ្រៅៗ ទើបមានសត្វទាំងនោះ ។ ម្យ៉ាងវិញទៀតបើគេចូលទៅហូបអាហារនៅតាមអាហារដ្ឋាន ឬហាងស្ទើរតែទាំងអស់ ហើយបញ្ជាទិញ(កម្មង់)ម្ហូបសត្វព្រៃនោះ ម្ហូបសត្វអ្វីក៏មានដាក់លក់ឱ្យភ្ញៀវទទួលទានដែរ ។ ប៉ុន្តែគេមិនឃើញមានមន្ត្រីអភិរក្សសត្វព្រៃណាមួយចុះទៅធ្វើការហាមឃាត់ ឬចាត់ការតាមច្បាប់នោះឡើយ ដោយបណ្តែតបណ្តោយឱ្យលក់ដូរយ៉ាងរលូនទៅវិញ ។
ប្រជាពលរដ្ឋសំណូមពរដល់សមត្ថកិច្ចពាក់ព័ន្ធ និងប្រជាពលរដ្ឋរកស៊ីរបរខុសច្បាប់នេះ មិនត្រូវប្រព្រឹត្តបទល្មើសចាប់សត្វព្រៃយកទៅទទួលទាន ឬប្រកបរបរចាប់យកទៅលក់នៅតាមហាងតូចធំនោះឡើយ ព្រោះថា ការធ្វើបែបនេះខុសទៅនឹងច្បាប់យ៉ាងខ្លាំង ។ បើគេទស្សនាតាមកញ្ចក់ទូរទស្សន៍នាទីសត្វព្រៃ នៅប្រទេសរបស់គេសត្វអ្វីក៏មានដែរ គឺគេចេះថែរក្សាសត្វទាំងនោះឱ្យបានគង់វង្ស ទុកជាកេរតំណែលធម្មជាតិ ហើយបើសិនសមត្ថកិច្ចរបស់គេដឹងថា នរណាម្នាក់ចាប់សត្វព្រៃលក់នោះ គេនឹងផាកពិន័យ ឬអាចជាប់ពន្ធនាគារថែមទៀតផង ៕
ចែករំលែកព័តមាននេះ