ខេត្តកំពង់ស្ពឺ៖ កម្មករ២ក្រុមបានវាយតប់គ្នាព្រោះតែរឿងរថយន្តវ៉ាជែងគ្នាទីបំផុតម្ចាស់រថយន្តទាំងសងខាងត្រូវបានឃាត់ខ្លួន។ករណីនេះកើតឡើងនៅតាមបណ្តោយផ្លូវច្បារមនក្រាំងចេកនៅចំណុចស្ពានតាំងតាឡាត់ស្ថិតក្នុងភូមិតាំងតាឡាត់ ឃុំព្នាយ ស្រុកសំរោងទង នៅវេលាម៉ោង៦និង១៥នាទី ថ្ងៃទី២៨មីនា ២០១៥។
ប្រភពពីប្រជាពលរដ្ឋនៅក្បែរកន្លែងកើតហេតុបានអោយដឹងថាគេបានឃើញរថយន្តទាំងពីរគ្រឿងបានបើកវ៉ាជែងគ្នាចុះឡើងៗ ។ លុះមកដល់កន្លែងកើតហេតុរថយន្តទាំង២បានឈប់ពេលនោះស្រាប់តែក្រុមកម្មករដែលជិះលើរថយន្តបានចុះមកដេញវាយគ្នាបង្កឲ្យមានការភ្ញាក់ផ្អើលដល់អ្នកធ្វើដំណើរបណ្តាឲ្យស្ទះចរាចរណ៍យ៉ាងខ្លាំង ធ្វើឲ្យមានការភ្ញាក់ផ្អើលដល់សមត្ថកិច្ចចុះមកអន្តរាគមន៍ ។ ប្រភពបន្តថាក្រោយកើតហេតុវាយតប់គ្នាតៃកុងរថយន្តទាំង២នាក់ត្រូវបានឃាត់ខ្លួនទាំងសងខាងចំណែកក្រុមកម្មករដែលវាយគ្នាបានរត់គេចខ្លួនអស់ ៕
ចែករំលែកព័តមាននេះ