ខេត្តសៀមរាប៖នៅថ្ងៃទី ២៨ ខែមីនា ឆ្នាំ២០១៥នេះ លោក ឃឹម ប៊ុនសុង អភិបាលនៃគណៈអភិបាលខេត្តសៀមរាប និង លោក នូ ផល្លា ប្រធានក្រុមប្រឹក្សាខេត្ត បានដឹកនាំគណៈប្រតិភូខេត្ត និង គ្រឿងឧបភោគបរិភោគ ដែលជាអំណោយរបស់រដ្ឋបាលខេត្តសៀមរាប ជូនដល់នាយទាហាន ពលទាហាន កងពលតូចអន្តរាគមន៍លេខ៥ នៃកងពលធំអន្តរាគមន៍លេខ២ ឈរជើងនៅ ភូមិឈើស្លាប់ ក្នុងភូមិសាស្ត្រស្រុកបន្ទាយអម្ពិល ខេត្តឧត្តរមានជ័យ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខ ដែលអមដំណើរដោយលោកជាក្រុមប្រឹក្សាខេត្ត គណៈអភិបាលខេត្តអស់លោក លោកស្រីជាថ្នាក់ដឹកនាំមន្ទីរ ស្ថាប័ន អង្គភាព មន្ត្រីរាជការ ក្នុងនាមជាខេត្តសម្ព័ន្ធមេត្រីភាព ។
ក្នុងកិច្ចស្វាគមន៍របស់លោក ឧត្តមសេនីយ៍ទោ សំរឹទ្ធ សារ៉េត មេបញ្ជាការកងពលតូចអន្តរាគមន៍លេខ៥ បានធ្វើសេចក្តីរាយការណ៍ អំពីសភាពការណ៍សន្តិសុខ តាមបណ្តោយព្រំដែនកម្ពុជាថៃ មានសភាពស្ងប់ស្ងាត់ល្អ ប៉ុន្តែកងកម្លាំងនៃកងយោធពលខេមរភូមិន្ទ នៅតែបន្តការប្រុងប្រយ័ត្នជាប់ជានិច្ច ដើម្បីត្រៀមលក្ខណៈទប់ទល់ទៅនឹង ល្បិចកលគ្រប់រូបភាពរបស់បច្ចាមិត្ត ដែលមានបំណងចង់ឈ្លានពានបូរណភាពទឹកដីរបស់កម្ពុជា។ ម្យ៉ាងទៀតលើភារកិច្ចថែរក្សាសន្តិសុខ កងពលតូចអន្តរាគមន៍លេខ៥ បានយកចិត្តទុកដាក់ប្រើប្រាស់កម្លាំងសហការជាមួយអាជ្ញាធរមូលដ្ឋាន ធ្វើសកម្មភាពការពារ សុវត្ថិភាពជូនប្រជាពលរដ្ឋ និង កម្មវិធីនានារបស់រាជរដ្ឋាភិបាលទាំងថ្នាក់ជាតិ និង អន្តរជាតិក្នុងខេត្តឧត្តរមានជ័យផងដែរ ។ ក្នុងនោះលោកមេបញ្ជាការ ក៏បានសម្តែងនូវអំណរគុណចំពោះ គណៈប្រតិភូខេត្តសៀមរាប ដែលជាខេត្តសម្ព័ន្ធមេត្រីភាព ដោយកន្លងមកបានធ្វើកិច្ចសហប្រតិបត្តិការគ្នាបានល្អ ព្រមទាំងបានធ្វើការផ្គត់ផ្គង់ ឧបត្ថម្ភគាំទ្រ ក្នុងការកសាងទីតាំងអង្គភាពផងដែរ ។
មានប្រសាសន៍សំណេះសំណាលនាឱកាសនោះ លោក ឃឹម ប៊ុនសុង ក៍បានបញ្ជាក់ថា កន្លងមកប្រមុខរាជរដ្ឋាភិបាល ក្រោមការដឹកនាំដ៏ខ្ពង់ខ្ពស់របស់សម្តេចទាំងបី ពិសេសសម្តេចសម្តេចតេជោហ៊ុន សែន នាយករដ្ឋមន្ត្រី បានយកចិត្តគិតគូអំពីសុខភាព និង ជីវភាពរស់នៅរបស់បងប្អូនកងយោធពលខេមរភូមិន្ទ ឈរជើងនៅសមរភូមិមុខ និងក្រុមគ្រួសារទ័ពនៅតំបន់ទិសទី៣ នៃយោធភូមិភាគទី៤ ក៏ដូចកងកម្លាំងប្រដាប់អាវុធការពារតាមបណ្តោយ បន្ទាត់ ព្រំដែនកម្ពុជា ថៃ ។លោកក៏បានធ្វើការក្រើនរំលឹក ដល់នាយទាហាន ពលទាហានទាំងអស់ ដោយបានបញ្ជាក់ថា ទោះបីស្ថានការណ៍នៅតាមបណ្តោយព្រំដែនកម្ពុជា ថៃ មានសភាពល្អ ស្ងប់ស្ងាត់ក៏ដោយ បងប្អូនត្រូវយកចិត្តទុកដាក់ ក្នុងការហ្វឹកហាត់ឲ្យបានជាប្រចាំ នូវយុទ្ធវិធី យុទ្ធសាស្ត្ររបស់កងទ័ព ហើយបងប្អូនទាំងអស់ ត្រូវត្រៀមលក្ខណៈនៅគ្រប់វិនាទី ក្នុងការជួយអន្តរាគមន៍នូវពេលមានសភាពការណ៍ណាមួយកើតឡើង ។ លោកក៏បានពាំនាំនូវការផ្តាំផ្ញើសួរសុខទុក្ខនិងធ្វើការកោតសរសើរពីសំណាក់សម្តេចតេជោ ហ៊ុន សែន នាយក រដ្ឋមន្រី្ត និងសម្តេចកិតិព្រឹទ្ធបណ្ឌិត ប៊ុនរ៉ានី ហ៊ុន សែន ជូនចំពោះមេបញ្ជាការ មេបញ្ជាការរង នាយទាហាន នាយទាហានរង និង ពលទាហាននៃកងពលតូចអន្តរាគមន៍លេខ៥ ដែលបានខិតខំយកចិត្តទុកដាក់ពុះពារគ្រប់បែបយ៉ាង ក្នុងការកសាងអភិវឌ្ឍន៍អង្គភាព ដើម្បីរួមចំណែកបំពេញភារកិច្ចដ៏ឧត្តុង្គឧត្តម ក្នុងកិច្ចការពារ បូរណភាពទឹកដីការពារ ខ្សែបន្ទាត់ព្រំដែននៃមាតុភូមិ និងការថែរក្សាសន្តិសុខ សុវត្ថិភាពក្នុងភូមិសាស្ត្រទទួលខុសត្រូវ របស់ខ្លួននាពេលកន្លងមក ។លោកអភិបាលខេត្ត ក៏បានផ្តាំផ្ញើដល់បងប្អូនកងកម្លាំងទាំងអស់ត្រូវយកចិត្តទុកដាក់ខ្ពស់ទៅលើបញ្ហាសុខភាព អនាម័យ និង ធ្វើការកសាងជំរកក្នុងអង្គភាព ព្រមទាំងធ្វើការ ដាំដុះដំណាំបន្លែបង្កា និង ចិញ្ចឹមសត្វ ដើម្បីផ្គត់ផ្គង់ជីវភាពកងទ័ពក្នុងអង្គភាព និង គ្រួសារកងទ័ព ជាពិសេសលើការគ្រប់គ្រង និង ថែរក្សានូវគ្រឿងបំពាក់សម្ភារៈកងទ័ពឲ្យបានល្អ ក្នុងការទ្រទ្រង់នៅពេលមានសភាពការណ៍ណាមួយកើតឡើង ព្រមទាំងចូលរួមអនុវត្តនូវគោលនយោបាយភូមិឃុំ មានសុវត្ថិភាព សំដៅឆ្ពោះទៅការអភិវឌ្ឍន៍រីកចម្រើនជូនដល់ប្រជាជន ឲ្យដល់ត្រើយសុភមង្គមតទៅថ្ងៃអនាគត ។
លោក ឃឹម ប៊ុនសុង ក៏បានលើកឡើងថា ក្នុងឱកាសប្រជាជនកម្ពុជា ទទួលអំណរសាទរបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ក្នុងនាមខេត្តសម្ព័ន្ធមេត្រីភាព ជាមួយកងពលតូចអន្តរាគមន៍លេខ៥ គណៈប្រតិភូខេត្ត ក៏បាននាំយកនូវ អំណោយ ជាគ្រឿងឧបភោគ បរិភោគ ចំនួន ២១មុខ និង ប្រេងម៉ាស៊ូត១ពាន់លីត្រ ,ស័ង្កសី១ពាន់សន្លឹក និងឧបត្ថម្ភថវិកាដល់ពលទាហាន ម្នាក់៤ម៉ឺនរៀល សរុបថទឹកប្រាក់ ចំនួន ៥៤លាន៨៥៣ពាន់៤០០រៀលគត់ និង ឧបត្ថម្ភដល់គណៈបញ្ជាការសមរភូមិមុខទិសទី៣ លោក ជា តារា នូវស៊ីម៉ង់ ចំនួន១៥តោន និង ផ្តល់ជូនទីបញ្ជាការកងពលធំអន្តរាគមន៍លេខ២ នូវថវិកា ៥លានរៀល ស្រាបៀរ ចំនួន ៥០កេសផងដែរ ៕
ចែករំលែកព័តមាននេះ