ខេត្តកំពង់ឆ្នាំង ៖ «សេវាព្យាបាលអ្នកជំងឺឯកជនគ្មានច្បាប់អនុញ្ញាតត្រូវបិទជាបន្ទាន់ កុំបណ្តែតបណ្តោយប្រយ័ត្នដូចនៅឃុំរកា ខេត្តបាត់ដំបង មួយឃុំឆ្លងជំងឺអេដស៍ស្ទើរទាំងអស់ មិនដឹងថាគាត់ព្យាបាលជំងឺបែបណានោះទេ ? ដល់តែអ៊ីចឹងទៅ សង្គមស៊ីវិល បក្សប្រឆាំង គេថ្កោលទោសមកលើរាជរដ្ឋាភិបាលថាគ្មានសមត្ថភាពដឹកនាំ» ។ នេះជាប្រសាសន៍របស់លោក ឈួរ ច័ន្ទឌឿន អភិបាលខេត្តក្នុងឱកាសអញ្ជើញជាអធិបតីភាពក្នុងពិធីបិទសន្និបាទបូកសរុបការងារមន្ទីរសុខាភិបាលខេត្ត កាលពីរសៀលថ្ងៃទី២៥ មីនា នៅសាលប្រជុំនៃមន្ទីរសុខាភិបាលខេត្ត ដែលមានមន្ត្រីរាជការ និងមន្ត្រីសុខាភិបាលជាច្រើនរូបទៀតចូលរួម ។
លោកអភិបាលខេត្តបន្តថា មន្ទីរសុខាភិបាល ក៏ត្រូវពិនិត្យឡើងវិញលើគ្លីនិកវិភាគវេជ្ជសាស្ត្រ(ពិនិត្យឈាម) តើអ្នកប្រកបរបរពិនិត្យឈាមនោះមានជំនាញកម្រិតណា ? តើម៉ាស៊ីនដំណើរការលើការវិភាគឈាមនោះមានគុណភាពដែរទេ? បើគ្មានទេត្រូវតែបិទដែរ ឬឱ្យគាត់ទិញម៉ាស៊ីនថ្មីមកដាក់ជំនួសដើម្បីបន្តអាជីវកម្មរបស់គាត់បាន ។ ត្រូវយកចិត្តទុកដាក់ពង្រឹងឡើងវិញនៅមន្ទីរពេទ្យរបស់រដ្ឋទាំងនៅខេត្ត ស្រុក និងឃុំ បើមិនដូចឆ្នោះទេ អ្នកជំងឺគេបាត់ជំនឿលើពេទ្យរដ្ឋនិងងាកមករកសេវាព្យាបាលឯកជនវិញ ព្រោះវាថោកជាង មានសេវាល្អជាង យកចិត្តទុកដាក់ជាង និងមានក្រមសីលធម៌ល្អជាង ។ គ្រូពេទ្យមានតួនាទីសំខាន់ណាស់ក្នុងសង្គម ព្រោះអ្នកជំងឺណាក៏ដោយ ពេលឈឺក៏ត្រូវការលោកគ្រូពេទ្យដែរ ហេតុនេះគ្រូពេទ្យត្រូវមានក្រមសីលធម៌៤យ៉ាង សម្រាប់សង្គ្រោះអ្នកជំងឺ ។
ក្នុងឱកាសនោះផងដែរ លោកអភិបាលខេត្ត ក៏បានរំឮកឡើងវិញថា កាលពី៣៦ឆ្នាំមុន គ្មានទេវិស័យសុខាភិបាល គ្មានគ្រូពេទ្យ គ្មានថ្នាំព្យាបាល កាលសម័យនោះមានដែរគ្រូពេទ្យដែលស្ទើរតែមិនចេះអក្សរ មានថ្នាំព្យាបាលដែរគឺថ្នាំដែលគេច្រកក្នុងដបទឹកក្រូច ហើយបើគិតមកដល់សព្វថ្ងៃនេះ វិស័យសុខាភិបាលរបស់កម្ពុជាទើបតែបានអាយុ៣៦ឆ្នាំប៉ុណ្ណោះ ។
លោក ប្រាក់ វ៉ុន ប្រធានមន្ទីរសុខាភិបាលខេត្ត បានមានប្រសាសន៍ថា ក្នុងឆ្នាំ២០១៤កន្លងទៅនេះ មានស្ត្រីកាន់តែច្រើនបានសម្រចចិត្តត្រឹមត្រូវដោយស្វែងរកសេវាសាធារណៈដើម្បីសម្រាលកូនដោយសុវត្ថិភាព ធ្វើឱ្យអត្រាគ្រោះថ្នាក់ស្លាប់ដោយការសម្រាលត្រូវបានកាត់បន្ថយ ក្នុងនោះដែលស្ត្រីសម្រាលកូនដោយការវះកាត់មានដល់ទៅ៣៨២នាក់ គឺមានន័យថា ស្ត្រីដែលសម្រាលកូនប្រឈមទៅនឹងការគ្រោះថ្នាក់បានកើនឡើង ។ សេវាបង្ការការចម្លងមេរោគអេដស៍ពីម្តាយទៅកូន-សេវាព្យាបាលជំងឺឱកាសនិយម និងការព្យាបាលឱសថប្រឆាំងមេរោគអេដស៍កំពុងអនុវត្ត ។
ទន្ទឹមនឹងនេះបានជ្រលក់ថ្នាំមុងឡើងវិញសរុបចំនួន៤២ ៥៨០នាក់ ដល់ប្រជាពលរដ្ឋរស់នៅតំបន់គ្រុនចាញ់ខ្ពស់ ។ ទិសដៅសំខាន់ៗក្នុងការអនុវត្តឆ្នាំ២០១៥នេះ គឺការពង្រីកសេវាសុខភាពបន្តពូជ សេវាសុខភាពមាតា ទារក កុមារ សម្រាលកូនដោយឆ្មបជំនាញពង្រីកសេវាសម្ភពសង្គ្រោះបន្ទាន់ និងសេវាថែទាំទារកដើម្បីធានាថាស្ត្រីមានគភ៌គ្រប់រូបត្រូវបានយកចិត្តទុកដាក់ ៕
ចែករំលែកព័តមាននេះ