រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ក្នុងឱកាសបិទសន្និបាតរបស់ក្រសួងអប់រំយុវជន និងកីឡា នារសៀលថ្ងៃទី២៦ មីនា នៅវិទ្យាស្ថានបច្ចេកវិទ្យាកម្ពុជាថា ដោយសារមានសាលារដ្ឋ និងសាលាឯកជនផង ការសម្រេចថ្មី គឺសិស្សានុសិស្សដែលបានប្រឡងជាប់បាក់ឌុបនៅឆ្នាំ២០១៤ ទាំងប្រឡងលើកទី១ និងប្រឡងលើកទី២ និងឆ្នាំ២០១៥ ដែលមាននិទ្ទេសA និទ្ទេសB និទ្ទេសC និទ្ទេសD និងនិទ្ទេសE អនុញ្ញាតឱ្យដាក់ពាក្យប្រឡងចូលរៀននៅសាលាវេជ្ជសាស្ត្រ ។
ក្នុងករណីដែលប្រឡងជាប់បាក់ឌុបមិនអនុញ្ញាតឱ្យចូលមកប្រឡង គឺយោងទៅលើបរិបទថ្មី បន្ទាប់ពីកំណែទម្រង់ការប្រឡងរបស់ក្រសួងអប់រំ យុវជន និងកីឡា ។ សិស្សានុសិស្សខ្លះគ្រាន់តែប្រឡងជាប់ដោយគ្មាននិទ្ទេស គឺមិនអនុញ្ញាតឱ្យដាក់ពាក្យប្រឡងទេ។ កិច្ចការនេះត្រូវប្រយ័ត្ន និងយកចិត្តទុកដាក់ខ្លាំងណាស់ ករណីកន្លងទៅដោយសារខ្វះខាតការប្រុងប្រយ័ត្ន ដូចនៅក្នុងភូមិរកាចាប់ផ្តើមឆ្លងអេដស៍មួយភូមិ ។
សម្តេចតេជោមានប្រសាសន៍បន្តថា ដោយសារបរិបទថ្មីនៃការកែទម្រង់វិស័យអប់រំបានជះឥទ្ធិពលភ្លាមទៅលើការពង្រឹងផ្សេងទៀត ក្នុងនោះមានវិស័យសុខាភិបាល កាលពីមុនអនុញ្ញាតឱ្យសិស្សប្រឡងជាប់បាក់ឌុបមាននិទ្ទេសA, B, C ចូលប្រឡង ឥឡូវបន្ថែមឱ្យនិទ្ទេសD និងE ឱ្យចូលប្រឡងដែរ ។ ទាក់ទងនឹងការប្រឡងនេះ សម្តេចតេជោនាយករដ្ឋមន្ត្រី គូសបញ្ជាក់ថា មិនអនុញ្ញាតឱ្យសិស្សានុសិស្សដែលជាប់បាក់ឌុបកាលពីឆ្នាំ២០១២-២០១៣ មកប្រឡងដាច់ខាត ។ ត្រូវយកសិស្សានុសិស្សចាប់ពីឆ្នាំ២០១៤ទៅ ទើបអនុញ្ញាតឱ្យប្រឡង ។
យើងត្រូវមើលឱ្យឃើញមានអន្តរសកម្ម គ្រាន់តែកំណែទម្រង់វិស័យអប់រំមួយ គឺជះឥទ្ធិពលភ្លាមទៅលើវិស័យផ្សេងៗទៀតតែម្តង ដូច្នេះយើងត្រូវផ្តោតការយកចិត្តទុកដាក់លើកំណែទម្រង់វិស័យអប់រំ វិនិយោគឱ្យវិស័យអប់រំ គឺបើសិនក្មួយៗចង់ទៅរៀនមុខវិជ្ជាពេទ្យ ត្រូវខំរៀនប្រឡងឱ្យជាប់ អ្នកចេះបានជាប់ ដោយសម្តេចផ្តាំថា សូមឱ្យយកវិធានការនេះបន្តទៀត។ នៅពេលដែលក្រសួងដាក់កម្រិតនៅមធ្យមសិក្សាទុតិយភូមិ គឺច្បាស់ណាស់ថា គេត្រូវប្រឹងហើយ មិនមែនប្រឹងមួយខែ ពីរខែមុនពេលប្រឡងទេ ត្រូវប្រឹងតាំងពីក្រោមទៅ បើមិនដូច្នេះទេ គ្មានមូលដ្ឋានដើម្បីប្រឡងជាប់មធ្យមសិក្សាទុតិយភូមិទេ ។
ការចាត់ចែងដោយក្រសួងអប់រំ យុវជន និងកីឡាកន្លងទៅ ពិតមែនមានមួយចំនួនមិនសប្បាយចិត្ត ក៏ប៉ុន្តែរឿងអ្នកមិនសប្បាយចិត្ត គឺជារឿងមួយផ្សេង ។ អ្វីដែលយើងត្រូវធ្វើ គឺឱ្យប្រទេសកម្ពុជាមានគុណភាពពេញលេញគ្រប់គ្រាន់ កុំឱ្យមានតែបរិញ្ញាបត្រ ។ ស្រុកយើងឥឡូវគ្រាន់តែគេមកមើលដូចជា គ្រាន់បណ្ឌិតអីនឹងគេដែរ ប៉ុន្តែវាអត់បានការ ដូច្នេះយើងត្រូវធ្វើនៅត្រង់កន្លែងហ្នឹងឱ្យបានច្បាស់លាស់ ។
សម្តេចតេជោនាយកដ្ឋមន្ត្រីសង្កត់ធ្ងន់ថា ដំណើររបស់កម្ពុជាបច្ចុប្បន្ន មិនមែនជាដំណើរដោយឯកឯងតាមភាពឯកោទេ ប៉ុន្តែដំណើរចូលរួមនៅក្នុងក្របខ័ណ្ឌការតភ្ជាប់ និងការធ្វើសមាហរណកម្មជាមួយនឹងប្រទេសក្នុងតំបន់ អនុតំបន់ និងភាពជាសាកលផង ។ សូម្បីតែអ្នកគ្រូនាង ផល្លា ក៏ត្រូវទៅចូលរួមលើឆាកអន្តរជាតិដែរ ។ ថ្ងៃនោះខ្ញុំមើលតាមអនឡាញនៅតូក្យូ ខ្ញុំមើលរហូតដល់ចប់ គេផ្សាយមក បើកមើលតាមអនឡាញទេ ខ្ញុំបោះឆ្នោតនៅតូក្យូទេ ប៉ុន្តែលទ្ធផលគេអត់ប្រកាសផង ។
ទាក់ទិននឹងបញ្ហានេះ សម្តេចតេជោរិះគន់ថា បានសេចក្តីថា គេត្រៀមមនុស្សជាប់រួចទៅហើយ យើងទៅបង្គ្រប់កិច្ចហ្នឹង ។ មូលហេតុងាយយល់ទេ គេអញ្ជើញគ្លីនតុន រួចទៅហើយ បានសេចក្តីថា គ្រូអាមេរិកត្រូវជាប់ ។ គេដឹងថា គ្រូអាមេរិកជាប់រួចទៅហើយ បានជាគេអញ្ជើញគ្លីនតុន មក ។ បើសិនជាទៅដល់កន្លែងនោះបានផ្តាច់ព្រ័ត្រប្រហែលជាគេអត់ទាន់ដឹងថាអ្នកណាជាប់ទេ តែគឺមានបេក្ខជនជាប់រួចទៅហើយ យើងទៅគ្រាន់តែបង្គ្រប់កិច្ចទេតើ ។
ប៉ុន្តែណ្ហើយ បានប៉ុណ្ណឹងបានហើយ ស្រុកយើងកុំថាឡើយក្នុងចំណោម១០នាក់ ត្រឹមតែទី៥០ ក៏ខ្ញុំសប្បាយដែរ ។
សម្តេចតេជោគូសបញ្ជាក់ថា កន្លងទៅប៉ុន្មានថ្ងៃនេះ មានការបោះឆ្នោតដោយយើងជាម្ចាស់ផ្ទះអត់ដឹងផងថា គេបោះឱ្យក្រុងសៀមរាបក្លាយជាក្រុងលេខ១ នៅអាស៊ី លេខ២ សម្រាប់ពិភពលោក ខាងផ្នែកទាក់ទាញទេសចរណ៍ ។
ចំណែកកំណែទម្រង់វិស័យអប់រំ សម្តេចតេជោមានប្រសាសន៍ថា ចាប់ពីឆ្នាំ២០១៥ទៅ ក្នុងមួយឆ្នាំត្រូវជ្រើសរើសយកនាយកសាលាល្អចំនួន៣នាក់ និងលោកគ្រូ អ្នកគ្រូ ៥នាក់ដើម្បីជាគំរូឈានមុខសម្រាប់អនុវត្តជារៀងរាល់ឆ្នាំ ។
បន្ទាប់មក សម្តេចតេជោបានបំពាក់គ្រឿងឥស្សរិយយសព្រះរាជាណាចក្រកម្ពុជា ថ្នាក់មហាសេរីវឌ្ឍន៍ជូនដល់អ្នកគ្រូ នាង ផល្លា ព្រមទាំងប្រគល់ប្រាក់១០០លានរៀលផងដែរ ៕
ចែករំលែកព័តមាននេះ