រាជធានីភ្នំពេញ ៖ វិហារអ៊ិស្លាម «អាល់សារកាល់» ស្ថិតនៅបឹងកក់ សង្កាត់ស្រះចក ខណ្ឌដូនពេញ នាព្រឹកថ្ងៃទី២៧ មីនា បានប្រារព្ធពិធីសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់សម្តេច
រាជធានីភ្នំពេញ ៖ វិហារអ៊ិស្លាម «អាល់សារកាល់» ស្ថិតនៅបឹងកក់ សង្កាត់ស្រះចក ខណ្ឌដូនពេញ នាព្រឹកថ្ងៃទី២៧ មីនា បានប្រារព្ធពិធីសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។ វិហារដែលចំណាយថវិកាសាងសង់អស់ជាង២,៩លានដុល្លារមួយនេះមានការចូលរួមពីរាជរដ្ឋាភិបាលដោយការមិនយកពន្ធលើការសាងសង់ និងឧបករណ៍សម្ភារសាងសង់ ។
សុន្ទរកថាស្វាគមន៍ លោក មិន ឃិន រដ្ឋមន្ត្រីក្រសួងធម្មការ និងសាសនា ថ្លែងថា វិហារអ៊ិស្លាមបឹងកក់ «អាល់សារកាល់» ដែលនឹងសម្ពោធដាក់ឱ្យប្រើប្រាស់នាពេលបន្តិចទៀតនេះ គឺកើតចេញពីមនុញ្ញផលនៃសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យ ក្រោមការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយរបស់សម្តេចតេជោនាយករដ្ឋមន្ត្រី ។ នេះគឺបានបង្ហាញពីសេរីភាពនៃការគោរព និងការប្រតិបត្តិជំនឿសាសនានៅកម្ពុជា ។ ការប្រតិបត្តិខាងផ្លូវសាសនាផ្សេងៗនៅកម្ពុជា ត្រូវបានរដ្ឋធានាក្នុងលក្ខខណ្ឌដែលមិនប៉ះពាល់ដល់ជំនឿសាសនាដទៃ ។
សេរីភាពខាងជំនឿសាសនា ពិតជាត្រូវបានរាជរដ្ឋាភិបាលកម្ពុជាយកចិត្តទុកដាក់ និងលើកកម្ពស់យ៉ាងពិតប្រាកដ មិនត្រឹមតែព្រះពុទ្ធសាសនាដែលជាសាសនារបស់រដ្ឋនោះទេ អ៊ិស្លាមសាសនា គ្រិស្តសាសនា និងសាសនាដទៃទៀត ក៏ត្រូវបានរដ្ឋយកចិត្តទុកដាក់ផងដែរ ពោលគឺប្រជាពលរដ្ឋមានសិទ្ធិពេញទីខាងជំនឿសាសនា ដោយគ្មាននរណាម្នាក់ត្រូវបានចាប់បង្ខំឱ្យជឿលើសាសនាណាមួយឡើយ ។
លោករដ្ឋមន្ត្រីក្រសួងធម្មការ និងសាសនាបញ្ជាក់ថា សាសនាទាំងអស់នៅលើពិភពលោកមានកំណើត និងប្រភពខុសៗគ្នា ។ ដោយឡែកសម្រាប់នៅកម្ពុជាយើង សាសនាទាំងអស់ទទួលបានការចាប់កំណើត និងរស់រានមានជីវិតឡើងវិញក្នុងពេលដំណាលគ្នា គឺថ្ងៃ៧ មករា ១៩៧៩ នេះឯង ។ មកដល់បច្ចុប្បន្ននេះ សាសនាទាំងអស់មានការរីកចម្រើនគួរជាទីមោទនៈ និងចេះយោគយល់គ្នា អធ្យាស្រ័យគ្នា និងគោរពគ្នាទៅវិញទៅមកដែលជាមូលដ្ឋានគ្រឹះនៃវប្បធម៌សន្តិភាព ។
លោកឧកញ៉ា ដាតុ អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គការមូលនិធិអភិវឌ្ឍន៍មុស្លីមកម្ពុជា ឱ្យដឹងថា សមិទ្ធផលអ៊ិស្លាមគឺកើតឡើងបានដោយការយកចិត្តទុកដាក់ខ្ពស់ពីរាជរដ្ឋាភិបាល ក្រោមការដឹកនាំរបស់សម្តេចតេជោនាយករដ្ឋមន្ត្រី ដែលបានបើកទ្វារចំហទទួលយកជំនួយសប្បុរសធម៌មកពីគ្រប់បណ្តាប្រទេសអ៊ិស្លាមតាមផ្លូវរដ្ឋ អង្គការ សមាគម ឬបុគ្គល ។ បើពុំនោះទេ ប្រាកដជាមិនអាចបំពេញបាននូវកង្វះខាតដែលជាសេចក្តីត្រូវការចាំបាច់របស់អ៊ិស្លាមកម្ពុជាបានរីកចម្រើនឆាប់រហ័សនោះឡើយ ។
លោកឧកញ៉ា ដាតុ អូស្មាន ហាស្សាន់ ថ្លែងបន្តទៀតថា គោលបំណងនៃការស្ថាបនាម៉ាសិ្ជទរបស់សាសនាអ៊ិស្លាម គឺពុំមែនត្រឹមតែជាទីកន្លែងមួយសម្រាប់កិច្ចប្រណិប័តន៍ ឬការជួបជុំគ្នាដើម្បីសូត្រធម៌ ឬការថ្វាយបង្គំបុ៉ណ្ណោះទេ ពីព្រោះសាសនាអ៊ិស្លាមបានចាត់ទុកទីតាំងដីទាំងអស់ជាម៉ាសិ្ជទ ជាទីកន្លែងដែលអាចថ្វាយបង្គំបានរបស់សាសនិកអ៊ិស្លាមរួចទៅហើយ ក៏បុ៉ន្តែសារសំខាន់របស់ម៉ាសិ្ជទនៅមានជម្រៅ និងអត្ថន័យខ្លាំងក្លាជាងនេះទៀត ។
ដូច្នេះម៉ាស្ជិទរបស់សាសនាអ៊ិស្លាម ជាទីកន្លែងប្រមូលផ្តុំគ្រប់ស្រទាប់វណ្ណៈនៃមនុស្សដើម្បីអប់រំលើគ្រប់វិស័យទាំងអស់ក្នុងជីវិតរស់នៅក្នុងសង្គមរបស់មនុស្សមុស្លីម ទាំងប្រុស ស្រី ក្មេង ចាស់ តាំងពីព្រះរាជារហូតដល់ប្រជានុរាស្ត្រដែលមកពីគ្រប់ច្រកល្ហកនៃកន្លែងរស់នៅ ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍បញ្ជាក់ថា ភាពត្រឹមត្រូវខាងនយោបាយរបស់គណបក្សប្រជាជន រណសិរ្សសង្គ្រោះជាតិកម្ពុជា លើបញ្ហាសាសនា ទោះបីជាអតីតកាលដ៏ជូរចត់របស់កម្ពុជា របបប្រល័យពូជសាសន៍ប៉ុលពត គឺមិនឱ្យអតីតកាលវិលត្រឡប់មកវិញដាច់ខាត ។
សម្តេចតេជោមានប្រសាសន៍ថា នៅកម្ពុជាមានប្រវត្តិដ៏ល្អនៅត្រង់ថា មានបញ្ហាសុខដុមនីយកម្មលើបញ្ហាជនជាតិ និងសាសនា ។ ថ្ងៃនេះបង្ហាញឱ្យឃើញច្បាស់ថា នៅលើវេទិកានេះមានអ្នកកាន់សាសនាជាច្រើន មានអ្នកកាន់ព្រះពុទ្ធសាសនា មានអ៊ិស្លាម ហើយក៏មានគ្រិស្ដសាសនាផងដែរ ។
យោងទៅលើបទពិសោធន៍នៃការដឹកនាំរបស់គណបក្សប្រជាជន រណសិរ្សសាមគ្គីសង្គ្រោះជាតិកម្ពុជា ក៏ដូចជារដ្ឋាភិបាលរបស់អតីតរដ្ឋកម្ពុជា និងរាជរដ្ឋាភិបាលបច្ចុប្បន្ន បញ្ហាជនជាតិ និងសាសនាមិនមែនជាឧបសគ្គរារាំងនៃការអភិវឌ្ឍប្រទេសជាតិទេ ។ បញ្ហាសំខាន់របស់យើង គឺត្រូវធ្វើយ៉ាងណាឱ្យសាសនានៅកម្ពុជា ជាតិសាសន៍ខុសគ្នា និងសាសនាខុសគ្នាមានសុខុដុមរមនាជាមួយគ្នាបាន ។
ប៉ុន្តែបើសិនជាមានការរើសអើងណាមួយក្នុងសង្គមជាតិកម្ពុជារបស់យើង ជាពិសេសបញ្ហាជនជាតិ និងសាសនានេះឯង វាមិនអាចមានសន្ដិភាពយូអង្វែង បើមានការប្រកាន់ពូជសាសន៍ និងការរើសអើងសាសនា ។ នេះជារឿងពិតយ៉ាងដូច្នេះមែន ។
នៅក្នុងតំបន់ ក៏មានប្រទេសមួយចំនួនមានការបែកបាក់ដោយសារការប្រកាន់សាសនា ប៉ុន្តែសម្រាប់កម្ពុជា ខ្ញុំអាចនិយាយបានដោយមោទនភាពថា យើងបានរួមរស់នៅជាមួយគ្នាសុខដុមនីយកម្មលើបញ្ហាជាតិសាសន៍ ។ បើខ្ញុំមិនច្រឡំទេ គណបក្សប្រជាជនកម្ពុជាតាំងពីដើមទសវត្សរ៍៨០ មានគោលនយោបាយគ្រប់ផ្នែក ក្នុងនោះមានគោលនយោបាយជាតិសាសន៍ ។ ដូច្នេះបញ្ហានេះមិនមែនជាបញ្ហាថ្មីថ្មោងសម្រាប់ខ្ញុំហើយក៏មិនមែនថ្មីថ្មោងរបស់គណបក្សកាន់អំណាច គណបក្សប្រជាជនកម្ពុជានោះដែរ ។
សម្ដេចតេជោនាយករដ្ឋមន្ត្រីបញ្ជាក់ថា ត្រង់មេដឹកនាំផ្សេងខ្ញុំមិនហ៊ាននិយាយទេ ប៉ុន្តែនៅក្នុងអាណត្តិរបស់ខ្ញុំ ក្នុងអាណត្តិរបស់គណបក្សប្រជាជន ច្បាស់ណាស់ការរៀបចំឱ្យមានឡើងគណៈចាងហ្វាងគីមទួន និងវិហាអ៊ិស្លាមនៅទូទាំងប្រទេស គ្មានការរារែក និងគ្មានការរំខានណាមួយទៅលើបញ្ហានេះទេ ។ ចាប់ពីឆ្នាំ២០១៤-២០១៥ នេះតទៅ ខ្ញុំបានសម្រេចឱ្យរៀបចំពិធីស្រាយបួសថ្នាក់ជាតិ រៀបចំដោយនាយករដ្ឋមន្ត្រី និងរាជរដ្ឋាភិបាល ។ ពិធីស្រាយបួសថ្នាក់ជាតិនឹងរៀបចំឱ្យមានការប្រឡងសូត្រគម្ពីរអ៊ិស្លាម ខ្ញុំនឹងឧបត្ថម្ភទឹកប្រាក់៥ពាន់ដុល្លារក្នុងមួយឆ្នាំ ។
ម្យ៉ាងទៀតដើម្បីផ្តល់ឱកាសឱ្យស្ត្រីអ៊ិស្លាមមានឱកាសចូលរួមក្លាយជាបញ្ញវន្តដោយមិនមានឧបសគ្គរារាំង រាជរដ្ឋាភិបាលកម្ពុជាសម្រេចឱ្យស្ត្រីអ៊ិស្លាមប្រើប្រាស់សម្លៀកបំពាក់អ៊ិស្លាមចូលសិក្សាទាំងនៅគ្រឹះស្ថានសិក្សារដ្ឋ និងឯកជន។ ក្រៅពីនេះ ក៏បើកឱ្យមានការសូត្រធម៌នៅតាមវិទ្យុផងដែរសម្រាប់សាសនិកអ៊ិស្លាមស្តាប់ ។ ខ្ញុំសូមផ្តាំដល់ម្ចាស់សណ្ឋាគារផងដែរថា កុំភ្លេចធ្វើបន្ទប់សម្រាប់ភ្ញៀវទេសចរជនជាតិអ៊ិស្លាម ថ្វាយបង្គំព្រះអាឡាហ៍ ចំណែករាជរដ្ឋាភិបាល គឺបានរៀបចំឱ្យមានជាស្រេចកាលពីប្រជុំអាស៊ាន និងប្រជុំអាស៊ីអាគ្នេយ៍កន្លងទៅ ៕
ចែករំលែកព័តមាននេះ