ខេត្តកំពង់ចាម ៖ ក្រុមចោរមានគ្នាចំនួន២នាក់ប្រដាប់ដោយអាវុធ បានធ្វើសកម្មភាពចូលប្លន់កសិករដែលកំពុងតែដេកយាមក្រោលក្របីមួយកន្លែង ស្ថិតនៅឃុំត្រប់ ស្រុកបាធាយ ដែលល្បីថាមានរហូតដល់ទៅ៦៩ក្បាល
ខេត្តកំពង់ចាម ៖ ក្រុមចោរមានគ្នាចំនួន២នាក់ប្រដាប់ដោយអាវុធ បានធ្វើសកម្មភាពចូលប្លន់កសិករដែលកំពុងតែដេកយាមក្រោលក្របីមួយកន្លែង ស្ថិតនៅឃុំត្រប់ ស្រុកបាធាយ ដែលល្បីថាមានរហូតដល់ទៅ៦៩ក្បាល នាពេលកន្លងទៅថ្មីៗ ហើយត្រូវបានកម្លាំងសមត្ថកិច្ចស្រាវជ្រាវតាមរកមកវិញបានបន្តបន្ទាប់ចំនួន៤៦ក្បាល ។ ចំណែកជាង២០ក្បាលទៀត ត្រូវបានចោរកៀងឡើងរថយន្តដឹកយកទៅលក់បាត់ រហូតមកដល់រសៀលថ្ងៃទី២៧ មីនា នៅមិនទាន់កំណត់អត្តសញ្ញាណក្រុមចោរនៅឡើយ ។
លោកវរសេនីយ៍ទោ ទុំ ចាន់ណា នាយការិយាល័យព្រហ្មទណ្ឌកម្រិតធ្ងន់ខេត្ត ប្រាប់ឲ្យដឹងថា គ្រួសារសាច់ញាតិកសិករមួយមានគ្នាចំនួន៦នាក់ បានដេកយាមក្របីរបស់បងប្អូនត្រង់ចំណុចតំបន់មួយក្នុងឃុំត្រប់ ស្រុកបាធាយ ជាច្រើនខែមកហើយពុំដែលមានហេតុការណ៍ណាមួយកើតឡើងទេ ។ លោកនាយការិយាល័យព្រហ្មទណ្ឌខេត្ត ប្រាប់បន្តថា លុះនៅយប់ថ្ងៃទី២៣ មីនា ស្រាប់តែមានចោរប្លន់ពីរនាក់ បានចូលមកចាប់គ្រួសារកសិករទាំង៦នាក់នោះចងគ្រប់ៗគ្នា ដោយមិនមានអ្នកណាម្នាក់រត់ចេញទាន់ឡើយ ។ បន្ទាប់មកចោរបាននាំគ្នាកៀងហ្វូងក្របីឡើងរថយន្តអស់ចំនួន៤០ក្បាល ដឹកចេញទៅទិសខាងលិច ដែលមានព្រំប្រទល់ជាប់ខេត្តកំពង់ឆ្នាំង ។
ប្រភពចុងក្រោយពីសមត្ថកិច្ចប្រាប់ឲ្យដឹងដែរថា នៅយប់ថ្ងៃកើតហេតុនោះកសិករដែលយាមក្រោលក្របីនោះ មិនបានមកប្តឹងសមត្ថកិច្ចទេ រហូតដល់ម៉ោងប្រហែល៩ព្រឹក ថ្ងៃទី២៤ មីនា សមត្ថកិច្ចបានដឹងរឿងនេះក៏បានចុះទៅកាន់ទីវាលកន្លែងក្រោលក្របី ដែលស្ថិតនៅឃុំត្រប់នោះ ។ ក្រោមការបញ្ជារបស់លោកឧត្តមសេនីយ៍ត្រី បែន រ័ត្ន ស្នងការនគរបាលខេត្ត សមត្ថកិច្ចបានតាមស្រាវជ្រាវរកក្របីឃើញមកវិញចំនួន៤៦ក្បាល ក្នុងនោះបាត់តែជាង២០ក្បាលប៉ុណ្ណោះ ។
សមត្ថកិច្ចបានបញ្ជាក់ថា ដំបូងគេថាកសិករទាំង៦នាក់ក្នុងនោះមានឈ្មោះ ហួយ ហ៊ីម, ឈ្មោះ គឹម ញ៉ និងកូនៗថាត្រូវបានចោរចូលមកប្លន់ចាប់ចង តែនៅពេលសមត្ថកិច្ចសួរនាំម្នាក់ៗ ឃើញថាការឆ្លើយមិនបានស៊ីសង្វាក់គ្នាឡើយ ដោយមានអ្នកខ្លះថាបានចាប់ចង និងខ្លះទៀតថាមិនបានចាប់ចងទេ ដូច្នេះការឆ្លើយមានលក្ខណៈផ្ទុយគ្នាទាំងអស់ ។ ចំណែកភូមិសាស្ត្រកន្លែងក្រោលក្របីនោះ រថយន្តពិបាកបើកចូលទៅណាស់ ព្រោះផ្លូវលំបាក គឺទាល់តែមានអ្នកស្គាល់ទើបអាចទៅបាន ។ ចំពោះក្របីច្រើនក្បាលនេះជារបស់បងប្អូនដែលក្រោយពីគេឃ្វាលហើយ មិនបានដឹកទៅផ្ទះទេ គឺឲ្យអ្នកទាំង៦នាក់នោះ មើលថែរក្សានៅក្រោលត្រឹមត្រូវ ។
តាមការសន្និដ្ឋានរបស់សមត្ថកិច្ចថា ករណីខាងលើមិនមែនជាអំពើប្លន់ទេ អាចជាករណីប្រឌិតឡើងរបស់ក្រុមអ្នកមើលក្របីទាំងនោះ ៕
ចែករំលែកព័តមាននេះ