រាជធានីភ្នំពេញ ៖ កាលពីថ្ងៃទី២៦ មីនា កន្លងទៅ មានពិធីជួបជុំគ្នាមួយដើម្បីជូនដំណើរ និងការចងបណ្តាញនិស្សិតអាហារូបករណ៍ជប៉ុន ដោយបានការចូលរួមជាអធិបតីពីសំណាក់លោក ពិត ចំណាន រដ្ឋលេខាធិការ
រាជធានីភ្នំពេញ ៖ កាលពីថ្ងៃទី២៦ មីនា កន្លងទៅ មានពិធីជួបជុំគ្នាមួយដើម្បីជូនដំណើរ និងការចងបណ្តាញនិស្សិតអាហារូបករណ៍ជប៉ុន ដោយបានការចូលរួមជាអធិបតីពីសំណាក់លោក ពិត ចំណាន រដ្ឋលេខាធិការក្រសួងអប់រំ យុវជន និងកីទ្បា និងលោក គូម៉ាម៉ារូ យូជី ឯកអគ្គរាជទូតជប៉ុនប្រចាំកម្ពុជា ។
ក្នុងពិធីនេះ លោកឯកអគ្គរាជទូតបានថ្លែងថា រដ្ឋាភិបាលជប៉ុនបានផ្តល់អាហារូបករណ៍ដល់និស្សិតកម្ពុជាទៅសិក្សានៅប្រទេសជប៉ុនតាំងពីឆ្នាំ១៩៩២មក ដែលមាននិស្សិតជាង៩២០នាក់ ហើយតាមរយៈគ្រោងការណ៍ផ្សេងៗរបស់រដ្ឋាភិបាលជប៉ុន ។
ក្នុងចំណោមអាហារូបករណ៍ទាំងនោះ មានអាហារូបករណ៍ «Monbuka gakusho» ត្រូវបានផ្តល់ដោយក្រសួងអប់រំ វប្បធម៌ កីទ្បា វិទ្យាសាស្ត្រនិងបច្ចេកវិទ្យារបស់ជប៉ុន ។ កន្លងមកក្រោមគ្រោងការណ៍នេះ មាននិស្សិតកម្ពុជាជាង៥៧០នាក់ បានទៅសិក្សានៅប្រទេសជប៉ុន ។ នៅក្នុងគ្រោងការណ៍នេះ គឺមាន៧កម្រិត ដែលក្នុងនោះរួមមានថ្នាក់ក្រោមឧត្តមសិក្សា ថ្នាក់ឧត្តមសិក្សា ថ្នាក់មធ្យមសិក្សាបច្ចេកទេស ថ្នាក់បណ្តុះបណ្តាលវិជ្ជាជីវៈ កម្មវិធីអ្នកដឹកនាំវ័យក្មេង ថ្នាក់និស្សិតសិក្សាភាសាជប៉ុន និងថ្នាក់បណ្តុះបណ្តាលគ្រូបង្រៀន ។
មានគ្រោងការណ៍សំខាន់ផ្សេងទៀត ដែលមានឈ្មោះថា ជំនួយរដ្ឋាភិបាលជប៉ុនសម្រាប់អភិវឌ្ឍន៍ធនធានមនុស្ស (JDS) ។ អង្គការ JICA ជាស្ថាប័នអនុវត្តនូវគម្រោងការណ៍នេះ ហើយបានអញ្ជើញមន្ត្រីវ័យក្មេងរបស់រដ្ឋាភិបាលថ្នាក់ជាតិ និងថ្នាក់មូលដ្ឋានកម្ពុជាទៅសិក្សានៅប្រទេសជប៉ុន ។ កន្លងមក គឺមាននិស្សិតច្រើនជាង៣២០នាក់ហើយ ដែលបានចូលរួម ។
លោកឯកអគ្គរាជទូតបន្តថា នៅក្នុងឆ្នាំនេះមានសិស្សដាក់ពាក្យប្រទ្បងអាហារូបករណ៍សរុបចំនួនជាង១៣០០នាក់ នៅក្នុងកម្រិតចំនួន៤ ។ ក្នុងនោះអ្នកដែលទទួលបានជោគជ័យទទួលបានអាហារូបករណ៍ថ្មីចំនួន៣៨នាក់ គឺមានវត្តមាននៅរាត្រីនេះ ។ តួលេខនេះគឺមានកំណើនស្ទើរតែទ្វេដង បើប្រៀបធៀបទៅនឹងឆ្នាំមុន ។ សិស្សដែលទទួលបានអាហារូបករណ៍នៅយប់នេះ គឺឆ្លងកាត់ការប្រទ្បងនៅប្រទេសកម្ពុជា ក៏ដូចជាការប្រកួតប្រជែងបន្ថែមទៀត ជាមួយនឹងសិស្សនៅប្រទេសដទៃ ។
លោក គូម៉ាម៉ារូ យូជិ កត់សម្គាល់ថា បើនិយាយពីទំនាក់ទំនងនៃប្រទេសយើងទាំងពីរវិញ យើងបានឃើញអំពីការរីកចម្រើននិងភាពស៊ីជម្រៅនៃទំនាក់ទំនងយ៉ាងឆាប់រហ័ស ។ ប្រទេសយើងទាំងពីរបានសម្រេចនូវការរីកចម្រើន និងការអភិវឌ្ឍទំនាក់ទំនងទ្វេភាគីយ៉ាងជ្រាលជ្រៅនៅក្នុងប៉ុន្មានឆ្នាំចុងក្រោយនេះ ទាំងវិស័យសាធារណៈ និងវិស័យឯកជន រួមទាំងពាណិជ្ជកម្ម វប្បធម៌ សិក្សាធិការ បម្លាស់ប្តូរមនុស្សនិងមនុស្សជាដើម ។ នៅក្នុងស្ថានភាពនេះ ចំពោះអ្នកដែលបានសិក្សានៅប្រទេសជប៉ុន នឹងត្រូវបានសង្ឃឹមថានឹងជាអ្នកដើរតួនាទីយ៉ាងសំខាន់ ហើយពួកគេក៏នឹងត្រូវរំពឹងទុកថានឹងក្លាយទៅជាអ្នកដឹកនាំលើជំនាញដែលពួកគេបានជ្រើសរើស។ ខ្ញុំក៏មានក្តីសង្ឃឹមខ្ពស់ថា អ្នកនឹងដើរតួនាទីជាស្ពានមិត្តភាពដ៏រឹងមាំរវាងប្រទេសយើងទាំងពីរ ។
ក្នុងរាត្រីនេះយើងមានភ្ញៀវជាច្រើន ។ យើងមានអតីតនិស្សិតអាហារូបករណ៍មកពីប្រទេសជប៉ុន ។ ចំពោះសមាគមន៍ជនជាតិជប៉ុនវិញនោះ គឺយើងមានទាំងសហគមន៍ជនជាតិជប៉ុន និងសមាគមពាណិជ្ជកម្មជប៉ុននៅប្រទេសកម្ពុជា ។ វាជាឱកាសដ៏រីករាយបំផុត ប្រសិនបើពិធីជប់លៀងនេះ ផ្តល់ឱកាសដ៏ល្អដល់អ្នកទាំងអស់គ្នាឱ្យបានស្គាល់គ្នា និងចងបណ្តាញជាមួយគ្នាទៅវិញទៅមក ៕
ចែករំលែកព័តមាននេះ