ខេត្តឧត្តរមានជ័យ ៖ ស្ត្រីម្នាក់ខ្លាំងពូកែខាងឆបោកលុយពីប្រជាពលរដ្ឋបានរាប់ពាន់រាប់ម៉ឺនដុល្លារអាមេរិក ដោយអះអាងថារូបគេនឹងនាំឲ្យទៅរកការងារនៅឯនាយសមុទ្រទីបំផុតអស់លក្ខណ៍ត្រូវបានប៉េអឹមស្រុក
ខេត្តឧត្តរមានជ័យ ៖ ស្ត្រីម្នាក់ខ្លាំងពូកែខាងឆបោកលុយពីប្រជាពលរដ្ឋបានរាប់ពាន់រាប់ម៉ឺនដុល្លារអាមេរិក ដោយអះអាងថារូបគេនឹងនាំឲ្យទៅរកការងារនៅឯនាយសមុទ្រទីបំផុតអស់លក្ខណ៍ត្រូវបានប៉េអឹមស្រុកត្រពាំងប្រាសាទឃាត់ខ្លួនកាលពីរសៀលថ្ងៃទី២៥ មីនា ២០១៥ បញ្ជូនទៅសាលាដំបូងខេត្តឧត្តរមានជ័យ។
ស្ត្រីម្នាក់ឈ្មោះគង់ នី អាយុ៥៥ឆ្នាំ រស់នៅក្នុងភូមិឃាំ្លងកណ្តាល ឃុំត្រពាំងប្រីយ៍ ស្រុកអន្លង់វែង បានរៀបរាប់ថា នៅក្នុងភូមិរបស់គាត់មានប្រជាពលរដ្ឋរងគ្រោះចំនួន៣គ្រួសារ ដោយឡែករូបគាត់អស់លុយចំនួន៣ពាន់ដុល្លារអាមេរិក និង២គ្រួសារផ្សេងទៀតអស់លុយជិត៤ពាន់ដុល្លារអាមេរិក។
ស្ត្រីដដែលបានបញ្ជាក់ថា ដោយសារតែស្ត្រីជាជនសង្ស័យឈ្មោះហេង ភា អាយុ៣៥ឆ្នាំ បានមកអះអាងថា រូបគេនឹងធានាកូនប្រុសរបស់គាត់ឱ្យបានចាកចេញពីផ្ទះទៅរកការងារធ្វើនៅឯប្រទេសកូរ៉េ ហើយបានទទួលប្រាក់ខែចំនួនមួយពាន់ដុល្លារក្នុងមួយខែ រូបគាត់បានបញ្ជាក់ថា ស្ត្រីរូបនេះ បន្ទាប់ពីបានទទួលលុយរួចមកនឹងបានសន្យាខ្យល់ម្តងថាថ្ងៃនេះម្តងថាថ្ងៃនោះដោយមិនចេះចប់ធ្វើឲ្យរូបគាត់អស់ក្តីសង្ឃឹមទើបសម្រេចចិត្តដាក់ពាក្យបណ្តឹងចូលទៅកងរាជអាវុធហត្ថស្រុកត្រពាំងប្រាសាទឲ្យធ្វើការឃាត់ខ្លួនតែម្តង។
លោកអនុសេនីយ៍ត្រីមាស ចន្ថា កងអាវុធហត្តស្រុកត្រពាំងប្រាសាទបានឲ្យដឹងថា បន្ទាប់ពីបានទទួលនូវពាក្យបណ្តឹងពីប្រជាពលរដ្ឋកំលាំងអាវុធហត្ថបានធ្វើការស៊ើបអង្កេតស្រាប់តែបានឃើញមានឈ្មោះហេង ភាភេទស្រី អាយុ៣៥ឆ្នាំ ចូលមកក្នុងស្រុកត្រពាំងប្រាសាទដោយមានគោលបំណងដើធ្វើសកម្មភាពឆបោកទៀត។
លោកបានបញ្ជាក់ថា បន្ទាប់ពីបានឃាត់ខ្លួនស្ត្រីរូបនេះស្រាប់តែមានប្រជាពលរដ្ឋជាច្រើនគ្រួសារចេញមុខមកធ្វើការតវ៉ានិងបំភ្លឺនៅមុខសមត្ថកិច្ចប៉េអឹមថា ស្ត្រីរូបនេះបានឆបោកពួកខ្លួនផងដែរ។ យោងតាមពាក្យបណ្តឹងរបស់ប្រជាពលរដ្ឋ និងយោងតាមចម្លើយសារភាពរបស់ស្ត្រីជាជនជាប់ចោទសមត្ថកិច្ចអាវុធហត្ថបានកសាងសំណុំរឿងបញ្ជូនទៅសាលាដំបូងខេត្តឧត្តរមានជ័យចាត់ការតាមនិតិវិធីច្បាប់៕
ចែករំលែកព័តមាននេះ