យន្តហោះធ្លាក់សង្ស័យសហអ្នកបើកជនជាតិអាល្លឺម៉ង់ជាអ្នកបើកបុកភ្នំ
សហអ្នកបើកវ័យក្មេងជនជាតិអាល្លឺម៉ង់នៃយន្តហោះ A320 របស់ក្រុមហ៊ុន GERMANWING ពេលនេះត្រូវគេសង្ស័យថាជាអ្នកមានបំណងបើកយន្តហោះបុកភ្នំ ។ ការលាតត្រដាងបែបនេះ
សហអ្នកបើកវ័យក្មេងជនជាតិអាល្លឺម៉ង់នៃយន្តហោះ A320 របស់ក្រុមហ៊ុន GERMANWING ពេលនេះត្រូវគេសង្ស័យថាជាអ្នកមានបំណងបើកយន្តហោះបុកភ្នំ ។ ការលាតត្រដាងបែបនេះនាំឱ្យបណ្តាគ្រួសារជនរងគ្រោះដែលកាលពីថ្ងៃទី២៦ មីនា លើកគ្នាទៅកាន់កន្លែងយន្តហោះធ្លាក់ស្រឡាំងកាំងយ៉ាងខ្លាំង ។
កាលពីយប់ថ្ងៃទី២៦ មីនា នៅភាគខាងលិចអាល្លឺម៉ង់ ពួកអ្នកស៊ើបអង្កេតចូលឆែកឆេរផ្ទះ២របស់សហអ្នកបើកយន្តហោះឈ្មោះ ANDREAS LUBITZ អាយុ២៨ឆ្នាំ ដែលបណ្តាសាច់ញាតិគ្រួសារនិយាយថា រូបគេជាអ្នកកីឡាម្នាក់ហើយមានសមត្ថភាពខ្លាំងណាស់ ។
ចាប់តាំងពីថ្ងៃទី២៤ មីនាមក លោក BRICE ROBIN រដ្ឋអាជ្ញាក្រុងម៉ារសីដែលដឹកនាំការស៊ើបអង្កេតធ្លាប់បានរាយការណ៍ក្នុងសន្និសីទសារព័ត៌មានមួយថា មានសេណារីយ៉ូ មិនគួរឱ្យជឿដែលនាំឱ្យយន្តហោះនោះហោះបុកភ្នំ ALPES បារាំង ។
លោក ROBIN និយាយថា លោក ANDREAS LUBITZ ពុំព្រមបើកទ្វារបន្ទប់បើកបរឱ្យមេបញ្ជាការយន្តហោះចូលក្រោយពេលមេបញ្ជាការរូបនោះចេញទៅបន្ទប់ទឹក ហើយរូបគេបើកយន្តហោះចុះក្រោម ។ គ្មានហេតុផលណាមួយដែលរារាំងមេបញ្ជាការយន្តហោះមិនឱ្យវិលចូលកាប៊ីនវិញឡើយ មានន័យថា សហអ្នកបើករូបនេះមានចេតនាធ្វើឱ្យយន្តហោះធ្លាក់តែម្តង ។
រដ្ឋអាជ្ញារូបនេះបន្តថា បើតាមការលាតត្រដាងនានាទទួលបានពីប្រអប់ខ្មៅសហអ្នកបើកពុំបានស្លាប់ឬសន្លប់អីទេ ពោលមិនព្រមបើកទ្វារឱ្យ ។ ទោះបីយ៉ាងណា លោកគូសបញ្ជាក់ថា គ្មានអ្វីត្រូវនិយាយថា នោះជាការវាយប្រហារភេរវកម្មមួយឡើយ ដោយលោករំលឹកថា យុវជននោះដែលចាប់ផ្តើមធ្វើការក្នុងក្រុមហ៊ុនអាកាសចរណ៍ GERMANWINGS កាលពីខែកញ្ញា ឆ្នាំ២០១៣មកហើយធ្លាប់បើកយន្តហោះដល់ទៅ៦៣០ម៉ោងគ្មានអ្វីសង្ស័យជាភេរវករឡើយ ដូចការអះអាងរបស់អាជ្ញាធរអាល្លឺម៉ង់ដែរ ៕
ចែករំលែកព័តមាននេះ