ខេត្តពោធិ៍សាត់ ៖ បុរសម្នាក់បានត្រូវសមត្ថកិច្ចឃាត់ខ្លួនបញ្ជូនទៅកាន់សាលាដំបូងខេត្តពោធិ៍សាត់ពីបទប្រើប្រាស់ និងលាក់ទុកអាវុធខុសច្បាប់ បន្ទាប់ពីបុរសរូបនេះឈ្លោះគ្នាជាមួយអ្នកជិតខាង ហើយប្រើពាក្យសំដីគំរាមបាញ់សម្លាប់ចោល ត្រូវភាគីម្ខាងទៀតប្ដឹងប៉ូលិសឲ្យជួយអន្តរាគមន៍ លុះពេលប៉ូលិសចូលឆែកឆេរក្នុងផ្ទះឃើញលាក់ទុកអាវុធខុសច្បាប់ក៏ធ្វើការឃាត់ខ្លួនតែម្ដង។
លោកវរៈសេនីយ៍ត្រី ធាង លេង អធិការនគរបាលស្រុកវាលវែងឲ្យដឹងថា ជនសង្ស័យឈ្មោះសៅ យ៉ុម ភេទប្រុស អាយុ៥៣ឆ្នាំ រស់នៅចំណុចស្រែអង្គ្រង ស្ថិតក្នុងភូមិស្ទឹងថ្មី ឃុំប្រមោយ ស្រុកវាលវែង ត្រូរសមត្ថកិច្ចឃាត់ខ្លួនតាមពាក្យបណ្ដឹងរបស់ប្រជាពលរដ្ឋឈ្មោះសុន ដែលបានចោទប្រកាន់ថា ឈ្មោះយ៉ុម នេះ កាលពីថ្ងៃទី២២ មីនា ២០១៥ បានប្រើពាក្យគំរាមបំរុងបាញ់គាត់សម្លាប់ចោល។
លុះនៅថ្ងៃទី២៤ មីនា សមត្ថកិច្ចក៏ចុះទៅឆែកឆេរក្នុងផ្ទះរបស់ឈ្មោះសៅ យ៉ុម ស្រាប់តែរកឃើញវត្ថុតាងរួមមានអាវុធអាកាស្វាយបត់មួយដើម ផលិតនៅប្រទេសចិនមានគ្រាប់ចំនួន១២គ្រាប់ គុណភាព៥០%, ខ្សែអន្ទាក់ និងប្រដាប់ឆក់សត្វព្រៃមួយចំនួនទៀត។
នៅចំពោះមុខសមត្ថកិច្ចជនសង្ស័យសៅ យ៉ុម បានសារភាពថា អាវុធអាកាស្វាយបត់នេះខ្លួនរើសបានក្នុងព្រៃកាលពីខែមិថុនា ២០១៤ មានគ្រាប់២០គ្រាប់ ខណៈពេលដើរដាក់អន្ទាក់សត្វព្រៃនៅចំណុចអូរក្រពើ ភូមិស្ទឹងថ្មីដែលគេដាក់ចោលនៅលើធាងសំឡាញ។ ពេលនោះខ្លួនបានយកទៅលាក់ទុកនៅផ្ទះចំការចំណុចដាតាម៉ឹង ព្រមទាំងបានយកទៅបាញ់សត្វប្រើសមួយក្បាលដែលជាប់អន្ទាក់មកលក់ឲ្យអ្នកភូមិទួលគ្រួសទៀតផង។
មកដល់ថ្ងៃទី២៤ មីនា ២០១៥នេះ លោកឈ្លោះគ្នាជាមួយតាសុនដែលនៅជាប់ព្រំប្រទល់ដីគ្នា។ ដោយខឹងខ្លាំងពេកខ្លួនបានប្រើពាក្យសម្តីសំឡុតបាញ់តាសុនសម្លាប់ចោល ប៉ុន្តែមិនបានយកកាំភ្លើងកាន់នឹងដៃទេ។លុះមកដល់ថ្ងៃទី២៤ មីនា ស្រាប់តែសមត្ថកិច្ចចូលទៅឆែកឆេរក្នុងផ្ទះរកឃើញអាវុធក៏ហៅខ្លួនលោកមកសួរនាំ និងឃាត់ខ្លួនតែម្ដង៕
ចែករំលែកព័តមាននេះ