រាជធានីភ្នំពេញ ៖ រវាង រឿម វណ្ណៈ មកពីសមាគមកីឡាប្រដាល់ក្រសួងការពារជាតិ និង ង៉ែត រដ្ឋា មកពីក្លិបតាព្រហ្មមានជ័យបង្ក្រាបគ្រឿងញៀន ធ្លាប់ជួបប្រកួតគ្នាជាច្រើនលើកច្រើនសារួចមកហើយ ក្នុងនោះភាគតិចណាស់ដែល រឿម វណ្ណៈ ឈ្នះធ្វើឱ្យគេមិនអស់ចិត្តទាល់តែសោះ ទើបនៅថ្ងៃអាទិត្យ ទី២៩ មីនា កីឡាកររូបនេះបានណាត់ជួប ង៉ែត រដ្ឋា សាកវិជ្ជាគុនគ្នាម្តងទៀតនៅលើសង្វៀនស៊ីធីអិន ដើម្បីទូទាត់បញ្ជីចាស់ឱ្យដាច់ស្រឡះ ។
តាមពិត រឿម វណ្ណៈ ក្បាច់ប្រយុទ្ធនៅលើសង្វៀនរបស់គេ ក៏មិនជាអន់ខ្សោយជាង ង៉ែត រដ្ឋា បុ៉ន្មានដែរ ។ ផ្លែកែង និងជង្គង់អាចប្រើការបានល្អដូចគ្នា គ្រាន់តែ រឿម វណ្ណៈ មានចរិតឆេវឆាវបន្តិចបុ៉ណ្ណោះ ។ គូនេះពេលជួបគ្នាម្តងៗមិនដែលបន្ធូរដៃឱ្យគ្នាឡើយដោយសារទាំងសងខាងសុទ្ធតែមានបំណងចង់យកឈ្នះរៀងៗខ្លួន ជាពិសេស រឿម វណ្ណៈ តែម្តង ។ ចំណែក ង៉ែត រដ្ឋា ជាអ្នកប្រដាល់ដែលមានចរិតចាស់ទុំ មិនឆេវឆាវទេ ។ ផ្លែកែង និងជង្គង់របស់គេ រាល់ពេលវាយចេញម្តងៗមិនសូវខុសគោលដៅ ឯស្នៀតជើងកាន់តែអស្ចារ្យថែមទៀត អាចទាត់ចេញបានរហ័ស ថែមទាំងមានទម្ងន់ធ្ងន់ទៀតផង ។ ដូច្នេះសម្រាប់ការប្រកួតលើកនេះ គេមិនទាន់ហ៊ានទាយទុកមុនថា រឿម វណ្ណៈ អាចជម្រះបញ្ជីចាស់ជាមួយ ង៉ែត រដ្ឋា បានឬអត់នោះទេ។ ចំពោះទស្សនៈអ្នកដែលធ្លាប់តាមដានការប្រកួតភាគច្រើន គេមិនសូវមានជំនឿចិត្តលើ រឿម វណ្ណៈ បុ៉ន្មានឡើយ ទោះបី រឿម វណ្ណៈ មានមហិច្ឆតាចង់ផ្តួល ង៉ែត រដ្ឋា ឱ្យខាងតែបានក៏ដោយ ។
នៅលើសង្វៀនដដែល ក្រៅពីគូសងសឹកនេះទៅនៅមានគូល្អៗជាច្រើនទៀតដែលសុំចូលខ្លួនសាកវិជ្ជាគុនគ្នាជូនទស្សនិកជនបានទស្សនានាថ្ងៃសម្រាកចុងសប្តាហ៍ផងដែរដូចជាកីឡាករមាស ភារម្យ មកពីក្លិបកងទ័ពជើងទឹក ជួបប្រកួតជាមួយកីឡាករអេ ចន្ទ្រា មកពីក្លិបអេភូថងកីឡា ។ កីឡាករណក់ ស៊ីនួន មកពីក្លិបឃ្លាំងមឿងកីឡា ប្រកួតជាមួយកីឡាករឡុង សុភស្ស មកពីក្លិបសាលវ័ន្តកីឡា ។ កីឡាករចាន់ គង់រាជ មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករគុន សំណង មកពីក្លិបគីសែមានរិទ្ធ ។ កីឡាករច្រិច កុសល មកពីក្លិបខ្លារខិនមានរិទ្ធ ប្រកួតជាមួយកីឡាករតាំង សីហា មកពីក្លិបកងពលតូចលេខ៧០ និងកីឡាករសូយ សុផាត មកពីក្លិបពោធិជ័យកីឡា ប្រកួតជាមួយកីឡាករអុល រាត្រី មកពីក្លិបពន្លឺវិបុលរិទ្ធី ៕
ចែករំលែកព័តមាននេះ