វៀតណាម៦នាក់ចោទយោធាព្រំដែនម្នាក់ថាបានអនុញ្ញាតឲ្យពួកគេចូលមកកា.ប់ឈើ
ខេត្តមណ្ឌលគិរី ៖ ចាប់វៀតណាម៦នាក់ ត្រាក់ទ័រ១ រថយន្តបង្គង់៣គ្រឿង សង្ស័យយោធាព្រំដែន បើកដៃជនជាតិវៀតណាមចំនួន៦នាក់ ត្រាក់ទ័រ១គ្រឿង រថយន្តបង្គង់៣គ្រឿង រណាយន្ត
ខេត្តមណ្ឌលគិរី ៖ ចាប់វៀតណាម៦នាក់ ត្រាក់ទ័រ១ រថយន្តបង្គង់៣គ្រឿង សង្ស័យយោធាព្រំដែន បើកដៃជនជាតិវៀតណាមចំនួន៦នាក់ ត្រាក់ទ័រ១គ្រឿង រថយន្តបង្គង់៣គ្រឿង រណាយន្ត និងឈើសុក្រំមួយចំនួន ត្រូវបានសមត្ថកិច្ចឃាត់ខ្លួន និងចាប់បញ្ជួនមកសាកសួរ ក្រោយពីក្រុមឈ្មួញបានព្យាយាមជញ្ជួនឈើចេញពីព្រៃការពារ ស្ថិតក្នុងដែនអភិរក្ស ។ ប្រតិបត្តិការបង្ក្រាបជនសង្ស័យទាំង៦នាក់ រួមនឹងវត្ថុតាង បានធ្វើឡើងនៅម៉ោងប្រមាណជា៧និង៤០នាទី ថ្ងៃទី២៥ មីនា ២០១៥ ចម្ងាយ២គីឡូម៉ែត ពីផ្លូវជាតិលេខ៧៦ ស្ថិតក្នុងចំណុចគីឡូម៉ែត១៥៩ ភូមិសាស្ត្រស្រុកកែវសីមា ។
ការចុះបង្ក្រាបត្រូវគេឃើញថា មិនមានសមត្ថកិច្ចក្នុងមូលដ្ឋានមានវត្តមាននៅកន្លែងកើតហេតុនោះទេ គឺឃើញមានតែកម្លាំងអាវុធហត្ថលើផ្ទៃប្រទេសដែលដឹកនាំដោយវរសេនីយ៍ត្រីស្វាយ សុវណ្ណា មេបញ្ជាការក្តាប់រួម សហការក្នុងអង្គការអភិរក្សជីវចំរុះកែវសីមាតែប៉ុណ្ណោះ ។
លោកស្វាយ សុវណ្ណា បានអោយដឹងថា ដោយមានសេចក្តីរាយការណ៏ថា មានជនជាតិវៀតណាមកំពុងតែធ្វើសកម្មភាពអារ និងដឹកជញ្ជួនឈើក្នុងដែនព្រៃការពារ លោកបានទទូលការចង្អុលបង្ហាញពីប្រធានគំរោងរបស់អង្គការ W.C.S ចុះចំគោលដៅ ហើយបានចាប់ខ្លួនជនជាតិវៀតណាម បានជាបន្តបន្ទាប់ ព្រមទាំងវត្ថុតាងជាក់ស្តែងមួយចំនួនធំ ។
លោកបន្តថា កម្លាំងត្រូវប្រឈមជាមួយនឹងសុវត្ថិភាព គ្រាដែលសេចក្តីរាយការបញ្ជាក់ថា ជនជាតិវៀតណាមទាំងនោះ មានអាវុធថែមទៀតនោះ ។
លោកបញ្ចាក់ថា ក្រោយពេលចាប់បានជនសង្ស័យទាំងនោះ លោកមិនបានឃើញមានអាវុធ នៅជាប់ខ្លួនពួកគេនោះទេ ប្រហែលជាពួកគេបោះចោល ពេលកំពុងរត់គេចពីសមត្ថកិច្ច ។
សូមជម្រាបថា គេបានដកស្រង់សំដីជនសង្ស័យជាជនជាតិវៀតណាមទាំង៦នាក់ ហើយពួកគេបានឆ្លើយថា ពួកគេចូលមកកាប់ឈើនៅក្នុងស្រុកកែវសីមានេះបាន គឺដោយសារតែមានការអនុញ្ញាតពីមន្ត្រីយោធាកាពារព្រំដែនម្នាក់ ឈ្មោះសៅ រិទ្ធ ហៅ(រិទ្ធជាំ) ។ ទោះជាយ៉ាងណា មន្ត្រីយោធា ឈ្មោះរិទ្ធ បានច្រានចោល នៅការចោទប្រកាន់របស់ជនជាតិវៀតណាមទាំងនោះ ។
ដោយឡែកលោក ទា ខូវម៉េង មេបញ្ជាការកងអនុសេនាធំទី២ ចំណុះវរការពារព្រំដែនលេខ១០៣ ថ្លែងថា លោកមិនបានដឹងអំពីមន្ត្រីយោធារបស់លោក ឃុបឃិតអោយជនជាតិវៀតណាមចូលដោយខុសច្បាប់នោះទេ ដោយលោកថា លោកនឹងហៅឈ្មោះសៅ រិទ្ធ មកសាកសួរ ។ ជាមួយគ្នានោះដែរលោក អ៊ុំ សុវណ្ណ មេបញ្ជាការយោធាវរការពារព្រំដែនលេខ១០៣ មិនអាចស្វែងរកការបំភ្លឺបន្ថែមបាននោះទេ នៅព្រឹកថ្ងៃទី២៦ មីនា ។
សូមបញ្ជាក់ថា គេនៅមិនទាន់ស្គាល់ឈ្មោះជនជាតិវៀតណាមទាំងនោះនៅឡើយ ព្រោះស្ថិតក្នុងការសាកសួរពីមន្ត្រីសមត្ថកិច្ចជំនាញ៕
ចែករំលែកព័តមាននេះ