រាជធានីភ្នំពេញ ៖ ព្រឹត្តិការណ៍ប្រកួតអុកចត្រង្គអបអរសាទរអង្គរសង្ក្រាន្តជុំទី១ លើកទី២ ឆ្នាំ២០១៥ បានចាប់ផ្តើមដំណើរការហើយនៅថ្ងៃនេះ បន្ទាប់ពីចាប់ឆ្នោតរើសគូប្រកួតជាផ្លូវការកាលពីថ្ងៃទី២៥ ខែមីនា
រាជធានីភ្នំពេញ ៖ ព្រឹត្តិការណ៍ប្រកួតអុកចត្រង្គអបអរសាទរអង្គរសង្ក្រាន្តជុំទី១ លើកទី២ ឆ្នាំ២០១៥ បានចាប់ផ្តើមដំណើរការហើយនៅថ្ងៃនេះ បន្ទាប់ពីចាប់ឆ្នោតរើសគូប្រកួតជាផ្លូវការកាលពីថ្ងៃទី២៥ ខែមីនា នៅទីស្នាក់ការគណៈកម្មាធិការជាតិអូឡាំពិកកម្ពុជា ។
លោកឯម ហៀង មន្ត្រីគណៈកម្មការរៀបចំការប្រកួតបានឱ្យដឹងថា រហូតមកទល់នឹងពេលនេះមានអ្នកមកចុះឈ្មោះចូលរួមប្រកួតចំនួន៩១នាក់ហើយ ។ ការប្រកួតជម្រុះជុំទី១ មានរយៈពេល៣ថ្ងៃ គិតចាប់ពីថ្ងៃទី២៦ ដល់ថ្ងៃទី២៨ ខែមីនា នៅទីស្នាក់ការគណៈកម្មាធិការជាតិអូឡាំពិកកម្ពុជា ។ ក្នុងចំណោមកីឡាករទាំង៩១រូបមាន៣៧រូបជាប់ដោយស្វ័យប្រវត្តិ ចំណែក៥៤រូបទៀតត្រូវឆ្លងកាត់ការប្រកួតជម្រុះក្នុងជុំទី១សិន ដើម្បីរកអ្នកឈ្នះឡើងទៅចាប់ឆ្នោតប្រកួតជាមួយអ្នកទាំង៣៧រូបដែលកំពុងឈររង់ចាំ។ នៅថ្ងៃទី២៨ ខែមីនា គឺជាការប្រកួតជម្រុះលើកចុងក្រោយបង្អស់ដើម្បីស្វែងរកបេក្ខភាពដែលឆ្នើមជាងគេចំនួន៨រូបសម្រាប់ឡើងទៅប្រកួតនៅវគ្គ១ភាគ៤ ផ្តាច់ព្រ័ត្រ និងវគ្គ១ភាគ២ ផ្តាច់ព្រ័ត្រជាបន្តទៀត ដែលនឹងត្រូវធ្វើឡើងនៅមុខបរិវេណប្រាសាទអង្គរ ខេត្តសៀមរាប នៅថ្ងៃទី១៤ ដល់ថ្ងៃទី១៦ ខែមេសា ។
លោកឯម ហៀង បន្តថា ដោយឡែកនៅថ្ងៃទី១៦ មេសា គឺជាការប្រកួតវគ្គផ្តាច់ព្រ័ត្រដណ្តើមជ័យលាភីជើងឯកប្រចាំឆ្នាំ២០១៥ ដោយជ័យលាភីលេខ១ ទទួលបានប្រាក់រង្វាន់៥ពាន់ដុល្លារអាមេរិក លេខ២ ទទួលបាន៣ពាន់ដុល្លារអាមេរិក លេខ៣ ទទួលបាន២ពាន់ដុល្លារអាមេរិក និងលេខ៤ ទទួលបាន៥០០ដុល្លារអាមេរិក ។
គួររំលឹកផងដែរថា ព្រឹត្តិការណ៍នេះអ្នកដែលមានអាយុចាប់ពី៨ឆ្នាំឡើង ក៏អាចមកប្រកួតបានដែរ ដោយក្នុង១ក្តារមានរយៈពេល៦០នាទីលើវិញ្ញាសា១ទល់នឹង១ ៕
ចែករំលែកព័តមាននេះ