ខេត្តកំពង់ឆ្នាំង ៖ គ្រោះថ្នាក់ចរាចរណ៍នៅតែបន្តកើនឡើងជារៀងរាល់ថ្ងៃ ដែលនេះនៅតែជាក្តីបារម្ភរបស់ប្រជាពលរដ្ឋ និងអ្នកដំណើរក្នុងខេត្ត ជាក់ស្តែងយោងតាមរបាយការណ៍របស់ស្នងការដ្ឋាននគរបាលខេត្តកំពង់ឆ្នាំងបានបញ្ជាក់ថា ក្នុងរយៈពេលជាងមួយខែដោយគិតពីថ្ងៃទី៨ កុម្ភៈ មកត្រឹមថ្ងៃទី១៥ មីនា ឆ្នាំ២០១៥ គ្រោះថ្នាក់ចរាចរណ៏បានកើតឡើងចំនួន១៣លើក បើប្រៀបធៀបដូចគ្នានេះដែរ ក្នុងអំឡុងខែមុន គឺបានកើនឡើងចំនួន៥ករណី និងស្លាប់មនុស្សដល់ទៅចំនួន១៣នាក់ ខណៈដែលខែមុនមានត្រឹមតែ៤នាក់ប៉ុណ្ណោះ ។
យោងតាមរបាយការណ៍ដដែលនេះបញ្ជាក់ថា គ្រោះថ្នាក់ចរាចរណ៍ទាំង១៣ខាងលើ បានកើតឡើងនៅស្រុកសាមគ្គីមានជ័យចំនួន២លើក ស្រុកកំពង់ត្រឡាច២លើក ស្រុករលាប្អៀរ៤លើក ស្រុកបរិបូរណ៍៣លើក និងក្រុងកំពង់ឆ្នាំង២លើក ក្នុងនោះកើតឡើងនៅលើផ្លូវជាតិលេខ៥១២លើក និងផ្លូវក្នុងខេត្តចំនួន១លើក ។ ក្នុងគ្រោះថា្នក់ចរាចរណ៍ខាងលើ បានបង្កឱ្យមនុស្សស្លាប់ចំនួន១៣នាក់ (ស្រី៤នាក់) របួសស្រាល២៩នាក់ (ស្រី១៦នាក់) របួសធ្ងន់៩នាក់ (ស្រី៤នាក់) ។ ខូចខាតរថយន្ត៩គ្រឿង (ខូចធ្ងន់៦គ្រឿង) ម៉ូតូ៨គ្រឿង (ខូចធ្ងន់៣គ្រឿង) និងខូចខាតគោយន្ត១គ្រឿង ។
កត្តាគ្រោះថ្នាក់ខាងលើ គឺបង្កឡើងដោយមនុស្សចំនួន១២ករណី ក្នុងនោះបើកបរលឿនហួសល្បឿនកំណត់៤ករណី បើកបរក្នុងស្ថានភាពស្រវឹង២ករណី បត់ឆ្វេងស្តាំមិនប្រយ័ត្ន២ករណី បើកបរមិនប្រកាន់ស្នាំ១ករណី និងបើកជែងក្នុងស្ថានភាពគ្រោះថ្នាក់២ករណី ចំណែកកត្តាយានយន្ត១ករណី គឺគ្មានភ្លើងបំភ្លឺ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ