រាជធានីភ្នំពេញ ៖ កម្មវិធីប្រឡងចម្រៀង «ណូដូជីម៉ាន់ មោទនភាពសំឡេង»លើកទី៦ បានប្រារព្ធធ្វើឡើងកាលពីថ្ងៃសៅរ៍ទី២១ មីនា ឆ្នាំ២០១៥ នៅមជ្ឈមណ្ឌលសហប្រតិបត្តិការកម្ពុជា-ជប៉ុន រាជធានីភ្នំពេញ ។ កម្មវិធីនេះបង្កើតឡើងក្នុង គោលបំណងឲ្យអ្នកសិក្សា
រាជធានីភ្នំពេញ ៖ កម្មវិធីប្រឡងចម្រៀង «ណូដូជីម៉ាន់ មោទនភាពសំឡេង»លើកទី៦ បានប្រារព្ធធ្វើឡើងកាលពីថ្ងៃសៅរ៍ទី២១ មីនា ឆ្នាំ២០១៥ នៅមជ្ឈមណ្ឌលសហប្រតិបត្តិការកម្ពុជា-ជប៉ុន រាជធានីភ្នំពេញ ។ កម្មវិធីនេះបង្កើតឡើងក្នុង គោលបំណងឲ្យអ្នកសិក្សាភាសាជប៉ុន ព្រមទាំងសិស្សដែលទើបចាប់ផ្តើមសិក្សាភាសាជប៉ុនរីករាយក្នុងការសិក្សាតាមរយៈការច្រៀងជាភាសាជប៉ុន ។
លោកគូរ៉ូមីយ៉ា តាកាយ៉ូស៊ី ទីប្រឹក្សាស្ថានទូតជប៉ុនប្រចាំប្រទេសកម្ពុជា មានប្រសាសន៍ថា លើកទី៦នៃការប្រឡងចម្រៀងណូដូជីម៉ាន់ នេះមានបេក្ខជនជាច្រើនចូលរួមសរុបទាំងអស់ចំនួន១៧០ក្រុម ស្មើនឹង១៩៣នាក់ ។ បេក្ខជន៣០ក្រុមបានជាប់ក្នុងវគ្គពាក់កណា្តលផា្តច់ព្រ័ត្រដែលធ្វើឡើងកាលពីខែមករានៅរាជធានីភ្នំពេញ និងនៅខេត្តសៀមរាប ។
សម្រាប់ការប្រឡងនេះដាក់ពិន្ទុដោយយោងទៅលើចំណុច សំខាន់ៗ រួមមានការបញ្ចេញសំឡេងភាសាជប៉ុន ទឹកដមសំឡេង និងការសម្តែងកាយវិការ ។ ចំពោះបេក្ខជនជាប់ជ័យលាភីក្នុងឆ្នាំនេះ ចំណាត់ថ្នាក់លេខ១ បានទៅលើលោកស្រ៊ុន វ៉ាន់ឌី ទទួលបានវិញ្ញាបនបត្រ និងកុំព្យូទ័រយួរដៃម៉ាកសូនី មួយគ្រឿង ពីធនាគារកម្ពុជាសាធារណៈ ។ ជ័យលាភីលេខ២ បានទៅលើលោកថន អារុណរ៉េនបូ ទទួលបានវិញ្ញាបនបត្រ និងកុំព្យូទ័រយួរដៃម៉ាកតូស៊ីបា មួយគ្រឿង ពីធនាគារកម្ពុជាសាធារណៈ ។ ជ័យលាភីលេខ៣ បានទៅលោកឌុន ផាតណី ទទួលបានវិញ្ញាបនបត្រ និងកុំព្យូទ័រយួរដៃម៉ាកតូស៊ីបា មួយគ្រឿង ពីធនាគារកម្ពុជាសាធារណៈ។
ចំណែកបេក្ខជនដែលទទួលបានពានរង្វាន់ពិសេសរួមមាន ៖
១-រង្វាន់សម្រាប់បេក្ខជនច្រៀងត្រូវចង្វាក់ភ្លេងបានទៅលើយុវជនហាក់ គឹមហុង ទទួលបានវិញ្ញាបនបត្រ និងElectric Keyboard ពីសាលាតូរ្យតន្ត្រី Soundskool ។
២-រង្វាន់គណៈកម្មការបានទៅលើបេក្ខជនឈឿន សីហា ទទួលវិញ្ញាបនបត្រ និងកុំព្យូទ័រយួរដៃម៉ាកតូស៊ីបាពីក្រុមហ៊ុនអេស៊ាអេលីត។
៣-រង្វាន់ពិសេសចំណាត់ថ្នាក់លេខ១ លើការច្រៀងភាសាជប៉ុនបានល្អបានទៅលើបេក្ខជនឈ្មោះ អ៊ុន ឆៃលី ទទួលបានវិញ្ញាបនបត្រ និងវចនានុក្រមអេឡិចត្រូនិកពីអង្គការCIESF ។
៤-រង្វាន់ពិសេសចំណាត់ថ្នាក់លេខ២លើការច្រៀងភាសាជប៉ុនបានល្អបានទៅលើកញ្ញាយ៉ែន មុន្នីរ័ត្ន ទទួលបានមានវិញ្ញាបនបត្រ និងវចនានុក្រមអេឡិចត្រូនិកពីអង្គការCIESF ។
៥-រង្វាន់ពិសេសចំណាត់ថ្នាក់លេខ៣លើការច្រៀងភាសាជប៉ុនបានល្អបានទៅលើលោកឆេង វាយោ ទទួលបានវិញ្ញាបនបត្រ និងវចនានុក្រមអេឡិចត្រូនិកពីអង្គការ CIESF ។
៦-រង្វាន់ពិសេសចំណាត់ថ្នាក់លេខ១លើការសម្តែងកាយវិការបានល្អបានទៅលើកញ្ញាផាត់ ស្រីរ័ត្ន ទទួលបានវិញ្ញាបនបត្រ និងគ្រឿងសំអាងមួយឈុតម៉ាកណារីពីក្រុមហ៊ុនLocomo។
៧-រង្វាន់ពិសេសចំណាត់ថ្នាក់លេខ២លើការសម្តែងកាយវិការបានល្អបានទៅកញ្ញាអាំ ស្តី ទទួលបានមានវិញ្ញាបនបត្រ និងគូប៉ុងទទួលទានអាហារចំនួនទឹកប្រាក់៥០ដុល្លារ ពីភោជនីយដ្ឋានសាគូរ៉ាតេ ។
ក្រៅពីនេះមានរង្វាន់សម្រាប់បេក្ខជនដែលចូលរួមផងដែរ ដែលឧបត្ថម្ភដោយអង្គការ CIESF, ក្រុមហ៊ុនខ្មែររ៉ាប៊ីត ក្រុមហ៊ុនយូអឹមស៊ី និងក្រុមហ៊ុនរ៉ូយ៉ាល់ហ៊ីរ៉ូស៊ីម៉ា ។
នៅក្នុងឱកាសនោះ លោកគូរ៉ូមីយ៉ា តាកាយ៉ូស៊ី បានថ្លែងអំណរគុណចំពោះដៃគូសហការក្នុងកម្មវិធីនេះគឺមជ្ឈមណ្ឌលសហប្រតិ បត្តិការកម្ពុជា-ជប៉ុន ព្រមទាំងអ្នកសហការឧបត្ថម្ភ គឺធនាគារកម្ពុជាសាធារណៈ, អង្គការCIESF, ភោជនីយដ្ឋានសាគូរ៉ាតេ, សាលាតូរ្យតន្ត្រីSoundskool, ក្រុមហ៊ុនអេស៊ាអេលីត, ក្រុមហ៊ុនLocomo, ក្រុមហ៊ុន Khmer Rabbit, ក្រុមហ៊ុន UMC Cambodia, Royal Hiroshima ព្រមទាំងភោជនីយដ្ឋាន Susume និងហាងឆាយអង្គរដែលបានរៀបចំឧបករណ៍ខារ៉ាអូខេសម្រាប់កម្មវិធីនេះ ។
លោកស៊ាង និមល ប្រធានផ្នែករដ្ឋបាលនៃមជ្ឈមណ្ឌលសហប្រតិបត្តិការកម្ពុជា-ជប៉ុន បានថ្លែងអំណរគុណចំពោះស្ថានទូតជប៉ុនប្រចាំប្រទេសកម្ពុជា ស្ថាប័នពាក់ព័ន្ធ សហការីទាំងអស់ និងអ្នកឧបត្ថម្ភកម្មវិធី ៕
ចែករំលែកព័តមាននេះ