សំបុត្រគំរាមបំផ្ទុះគ្រាប់បែកលើយន្តហោះ THAI AIRWAYS
ដោយ ៖ អប្សរា
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ០៩:០៦
គេហទំព័របរទេស
ទិដ្ឋភាពអ្នកដំណើរចុះពីយន្តហោះដែលមានការគំរាមនៅអាមេរិក
ប្រភពពីទីភ្នាក់ងារ AP បានផ្សាយកាលពីថ្ងៃទី៨ កញ្ញាឱ្យដឹងថា យន្តហោះរបស់ក្រុមហ៊ុនអាកាសចរណ៍ថៃ THAI AIRWAYS ជើងហោះហើរលេខ៧៩៤ ដែលហោះចេញពីក្រុងបាងកក ឆ្ពោះទៅកាន់ទីក្រុងឡូសអេនចឺឡេស សហរដ្ឋអាមេរិក ដែលដឹកអ្នកដំណើរជាង២០០នាក់ត្រូវបានទទួលរងការឆោឡោពីការដាក់គ្រាប់បែកកាលពីយប់ថ្ងៃអង្គារកន្លងមក ដែលនេះគឺជាការរកឃើញសំបុត្រអនាមិកមួយក្នុងយន្តហោះដែលសរសេរគំរាមថា នឹងមានការបំផ្ទុះគ្រាប់បែក ។ សមត្ថកិច្ចកំពុងធ្វើការត្រួតពិនិត្យទិន្នន័យគំរាមខាងលើដែលប្រទះឃើញនៅបរិវេណកញ្ចក់បន្ទប់ទឹកយន្តហោះកាលពីយប់ម៉ោង៧និង១៥នាទី ខណៈដែលយន្តហោះធ្វើការហោះហើរ ប៉ុន្តែយន្តហោះបានចុះចតដោយសុវត្ថិភាពនៅម៉ោង៩យប់ និងអ្នកដំណើរត្រូវបានជំលៀសឱ្យចុះពីយន្តហោះ ។
តាមរបាយការណ៍បញ្ជាក់ថា លោកពីយ៉ាសាវ៉ាត អាមរ៉ាណាន នាយករបស់ក្រុមហ៊ុនអាកាសចរណ៍ថៃបង្ហើបឱ្យដឹងថា សំបុត្រខាងលើសរសេរជាភាសាអង់គ្លេសដោយមិនមានលក្ខណៈត្រឹមត្រូវតាមភាសា រំពឹងថាជាការព្យាយាមបង្កើតហេតុការណ៍ឱ្យជ្រួលច្របល់ដល់អ្នកដំណើរ និងអ្នកប្រព្រឹត្តទំនងជាមនុស្សឡប់សតិ ។ ទោះជាយ៉ាងណាក៏ដោយ សមត្ថកិច្ចបានធ្វើការត្រួតពិនិត្យសំភារ និងសួរនាំអ្នកដំណើរដោយមន្ត្រី FBI សហរដ្ឋអាមេរិក ។ ខណៈដែលយន្តហោះកំពុងចុះចត សមត្ថកិច្ចផ្នែកពន្លត់អគ្គីភ័យក្រុងឡូសអេនជឺឡេស បានយករថយន្តពន្លត់អគ្គីភ័យចំនួន១៨គ្រឿង ដើម្បីត្រៀមទប់ទល់នឹងហេតុការណ៍អាក្រក់ដែលអាចកើតឡើងជាយថាហេតុ ។
ចំណែកទីភ្នាក់ងារ AFP បានបញ្ជាក់ដែរថា ហេតុការណ៍គំរាមដ៏ចលាចលនេះកើតឡើងក្នុងអំឡុងពេលសហរដ្ឋអាមេរិក កំពុងដាក់បទដ្ឋានការពារសុវត្ថិភាពយ៉ាងតឹងរ៉ឹងក្នុងអំឡុងពេលជិតដល់គំរប់ខួបហេតុការណ៍វិនាសកម្ម ១១ កញ្ញា ឆ្នាំ២០០១ នៅសហរដ្ឋអាមេរិក ។
អាជ្ញាធរក្រុងឡូសអេនចឺឡេសរាយការណ៍ថា ការគំរាមកំហែងភេរវកម្មជាលាយលក្ខអក្សរត្រូវបានរកឃើញកាលពីថ្ងៃទី៧ កញ្ញា ក្នុងយន្តហោះមួយគ្រឿងរបស់ក្រុមហ៊ុនអាកាសចរណ៍ថៃ THAI AIRWAYS មុនពេលចុះចតនៅព្រលានយន្តហោះអន្តរជាតិក្រុងឡូសអេនចឺឡេស ។ លោកស្រី LAURA EIMILLIER អ្នកនាំពាក្យរបស់ FBI អះអាងថា ការគំរាមកំហែងទាំងនេះត្រូវបានរកឃើញក្នុងបន្ទប់ទឹករបស់យន្តហោះនេះដែលគូសបញ្ជាក់ថា មានគ្រាប់បែកមួយគ្រាប់ស្ថិតក្នុងយន្តហោះជើងហោះហើរលេខ៧៩៤របស់ក្រុមហ៊ុនអាកាសចរណ៍ THAI AIRWAYS ។ យន្តហោះនេះដែលហោះមកទីក្រុងបាងកក បានចុះចតនៅក្រុងឡូសអេនចឺឡេសនាវេលាម៉ោង៣និង៥៤នាទីម៉ោងសាកលថ្ងៃទី៨ កញ្ញា ហើយត្រូវគេនាំទៅឈប់នៅកន្លែងមួយដាច់ពីគេនៃព្រលានយន្តហោះ ។ អ្នកដំណើរ និងសមាជិកក្រុមយានិកប្រមាណជា២០០នាក់ បានចុះពីយន្តហោះ ហើយការត្រួតពិនិត្យយន្តហោះដោយពួកអ្នកជំនាញការខាងគ្រឿងផ្ទុះកំពុងធ្វើ ។ មនុស្សទាំងឡាយស្ថិតក្នុងយន្តហោះនេះត្រូវបានគេសួរចម្លើយ ។ រហូតមកទល់ពេលនេះ គេនៅពុំទាន់រកឃើញគ្រឿងផ្ទុះណាមួយនៅឡើយ ៕
