ក្លឹបអ្នកកាសែតកម្ពុជាបានចូលក្នុងសមាគមអ្នកសារព័ត៌មានអាស៊ាន
ដោយ ៖ អប្សរា
ថ្ងៃសៅរ៏ ទី២០ ខែមិនា ឆ្នាំ២០១០ ម៉ោង ២០:១៥
រាជធានីភ្នំពេញ ៖ ក្លឹបអ្នកកាសែតកម្ពុជា គឺជាអង្គការអ្នកសារព័ត៌មានតែមួយគត់ក្នុងចំណោមសមាគមអ្នកសារព័ត៌មានចំនួន២៣ ដែលត្រូវបានជ្រើសរើសឱ្យធ្វើជាតំណាងកម្ពុជា ក្នុងសមាគមអ្នកសារព័ត៌មានអាស៊ាន ។ ការសំរេចឱ្យក្លឹបអ្នកកាសែតកម្ពុជាធ្វើជាតំណាងកម្ពុជាក្នុងសមាគមអ្នកសារព័ត៌មានអាស៊ាននេះ ត្រូវបានប្រកាសដោយលោកខៀវ កាញារីទ្ធ រដ្ឋមន្ដ្រីក្រសួងព័ត៌មាន ក្នុងឱកាសដែលលោកអញ្ជើញចូលរួមក្នុងពិធីចែកវិញ្ញាបនបត្របញ្ជាក់ការ សិក្សាដល់អ្នកសារព័ត៌មានចំនួន៥៥នាក់ កាលពីថ្ងៃទី១៨ មីនា នៅក្លឹបអ្នកកាសែតកម្ពុជា ។ លោកខៀវ កាញារីទ្ធ បានបញ្ជាក់ថា នៅកម្ពុជាមានអង្គភាពសារព័ត៌មានជាង៤០០ និងមានសមាគមអ្នកសារព័ត៌មានចំនួន២៣ តែរហូតមកដល់ពេលនេះ យើងមិនទាន់រកបានសមាគមណាមួយឬអ្នកកាសែតណាម្នាក់ ដើម្បីធ្វើជាតំណាងកម្ពុជា ក្នុងសមាគមអ្នកសារព័ត៌មានប្រជាជាតិអាស៊ីអាគ្នេយ៍ ឬអាស៊ាននៅឡើយ ខណៈពេលដែលសមាគមអ្នកសារព័ត៌មានអាស៊ានគេសុំ តែសមាគមអ្នកសារព័ត៌មានកម្ពុជាតែមួយចូលធ្វើជាតំណាងក្នុងសមាគមអ្នកសារព័ត៌មានអាស៊ាន ព្រោះគេបានមើលឃើញថា កម្ពុជាកំពុងមានការរីកចំរើនខាងវិស័យសារព័ត៌មាន ។ ប៉ុន្ដែឥឡូវនេះយើងរកបានហើយគឺក្លឹបអ្នក កាសែតកម្ពុជា ដែលមានសមត្ថភាពគ្រប់គ្រាន់ក្នុងការធ្វើជាតំណាងកម្ពុជា ក្នុងសមាគមអ្នកសារព័ត៌មានអាស៊ាន ។
