មនុស្សតូចជាងគេបំផុតលើពិភពលោកថ្មីជនជាតិកូឡុំប៊ីកំពស់ត្រឹម70សង្ទីម៉ែត្រ
ដោយ ៖ សាម៉ន
ថ្ងៃអង្គារ ទី៧ ខែកញ្ញា ឆ្នាំ២០១០ ម៉ោង ០៩:១១
គេហទំព័របរទេស
បុរសដែលទាបជាងគេលើពិភពលោក
បុរសជនជាតិកូឡុំប៊ីម្នាក់អាយុ២៤ឆ្នាំ ចូលចិត្តរាំ ហើយស្រមៃចង់ធ្វើដំណើរទៅឆ្ងាយៗ និងចង់បានរថយន្តធុនមែរសឺដែសមួយគ្រឿង មានកំពស់ត្រឹមតែ៧០សង្ទីែម៉ត្រប៉ុណ្ណោះ ។ បុរសនេះមានឈ្មោះថា EDWARD NINO HER-NANDEZ ជាបុរសតូចជាងគេបំផុតនៃពិភពលោក ។ កំពស់របស់គេត្រូវបានទទួលស្គាល់ដោយសៀវភៅឯតទគ្គកម្ម GUINNESS ទទួលស្គាល់ជាផ្លូវការរួចហើយថា ជាមនុស្សតូចល្អិតជាងគេបំផុតនៃពិភពលោក បន្ទាប់ពីមរណភាពកាលពីថ្ងៃទី១១ មីនា កន្លងមកនេះរបស់បុរសជនជាតិចិន ឈ្មោះហ៊ី ពីញពីញ (HE PINGPING) ដែលមានកំពង់៧៤សង្ទីម៉ែត្រ ។
ការប្រកាសបុរសឈ្មោះ EDWARD NINO HERNANDEZ ជាបុរសតូចជាងគេបំផុតលើពិភពលោក នឹងមិនរង់ចាំពេលយូរឡើយ ។ យុវជនជនជាតិនេប៉ាល់ម្នាក់ឈ្មោះខាហ្សង់ដ្រា ថា ប៉ា ម៉ាហ្គារ កំពស់៥៦សង្ទីម៉ែត្រ ត្រូវបានសៀវភៅ GUINNESS ទទួលស្គាល់ជាផ្លូវការរួចហើយថា ជាក្មេងប្រុសជំទង់ដែលតូចជាងគេបំផុតលើពិភពលោក ។
ម្តាយរបស់បុរសមាឌតូចល្អិត EDWARD NINO HERNANDEZ ជាកូនច្បងនៃបងប្អូន៥នាក់និយាយថា កូនរបស់គាត់នេះចាប់តាំងពីអាយុ២ឆ្នាំមក លែងមានការធំធាត់ទៀត ។ ពេលកើត កូនរបស់គាត់នេះមានកំពស់៣៨សង្ទីម៉ែត្រ និងមានទំងន់១,៥គីឡូក្រាម ។ ទំងន់របស់គេនាពេលនេះគឺត្រឹមតែ១០គីឡូក្រាមប៉ុណ្ណោះ ៕
