ខេត្តបន្ទាយមានជ័យ៖ ដើម្បីរក្សាការពារសន្តិសុខសណ្តាប់ធ្នាប់សាធារណៈនិងរបៀបរៀបរយក្នុងខេត្ត ឯកឧត្តមគោស៊ុំ សារឿត ប្រធានគណៈបញ្ជាការឯកភាពខេត្តនិងជាអភិបាលនៃគណៈអភិបាលខេត្តបន្ទាយមានជ័យ បានដាក់ផែនការឲ្យកងកម្លាំងនគរបាលខេត្ត ដែលដឹកនាំផ្ទាល់ដោយលោកឧត្តសេនីយ៍អាត់ ខែម ស្នងការនគរបាលខេត្តបន្ទាយមានជ័យ ចាត់វិធានការចំពោះក្រុមក្មេងទំនើងដែលកែច្នៃបំពង់ស៊ីម៉ាំងបំពងសម្លេងដាក់ម៉ូតូបើកបរលើផ្លូវសាធារណៈ ឮលាន់ពេលយប់និងពេលថ្ងៃ និងបើកបរម៉ូតូទម្លាក់ជន្ទល់បង្អូសលើផ្លូវជាតិឲ្យចេញផ្កាភ្លើង ជាលទ្ធផលកម្លាំងនគរបាលជំនាញការិយាល័យកណ្តាលព្រម្មទណ្ឌ ដឹកនាំដោយលោកវរសេនីយ៍ឯកសិទ្ធិ ឡោះ ស្នងការរងនិងជាប្រធានការិយាល័យកណ្តាលនគរបាលព្រហ្មទណ្ឌ សហការជាមួយកម្លាំងនគរបាលក្រុងសិរីសោភ័ណ ចុះប្រតិបត្តិការតាមប្រម៉ាញ់ចាប់ក្រុមក្មេងទំនើងទាំងនោះបានចំនួន៨នាក់និងម៉ូតូចំនួន៨គ្រឿងជាបន្តបន្ទាប់ ដើម្បីយកមកអប់រំ ។
ជាមួយគ្នានោះដែរលោកឧត្តមសេនីយ៍ត្រី អាត់ ខែម ស្នងការនគរបាលខេត្តបានបញ្ជាក់ថាក្មេងទំនើងទាំង៨នាក់នេះ សមត្ថកិច្ចគ្រាន់តែធ្វើការអប់រំពួកគេជាលើកទី១នៅថ្ងៃទី០៥ ខែមិនា ឆ្នាំ២០១៥នេះ និងធ្វើកិច្ចសន្យាដោយបញ្ឈប់មិនឲ្យកើតមានជាលើកទី២ ព្រមទាំងឲ្យដោះដូរបំពង់ស៊ីម៉ាំងឮខ្លាំងដាក់បំពង់ស៊ីម៉ាំងតាមលក្ខណៈបច្ចេកទេសរបស់ទោចក្រយានយន្តវិញនិងប្រគល់ឲ្យអាព្យាបាលយកទៅអប់រំបន្ថែមទៀត ។ លោកស្នងការក៏បានអំពាវនាវ ដល់អាណាព្យាបាលត្រូវអប់រំណែនាំកូនចៅកុំដាក់បំពង់ស៊ីម៉ាំងដែលឮសូរសម្លេងខ្លាំងពេកបង្កការរំខានអារម្មណ៍ដល់ប្រជាពលរដ្ឋ ៕
ចែករំលែកព័តមាននេះ