ខេត្តកំពង់ឆ្នាំង៖ ម្ចាស់ម៉ូតូបានព្រួតគ្នាចាប់ជនសង្ស័យម្នាក់ប្រគល់ឱ្យសមត្ថកិច្ចនគរបាល កាលពីព្រឹកថ្ងៃទី០៦ មិនា ២០១៥ នៅចំណុចផ្ទះជួលមួយកន្លែងស្ថិតក្នុងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង បន្ទាប់ពីជនសង្ស័យបានឆបោកម៉ូតូមិត្តភក្តិមួយគ្រឿង នៅក្រុងកំពង់ឆ្នាំង រួចយកទៅបញ្ចាំនៅក្រុងភ្នំពេញ កាលពីយប់ថ្ងៃទី៣ មិនា ២០១៥ ។
សមត្កកិច្ចនគរបាលក្រុងកំពង់ឆ្នាំងបាននិយាយថា ជនសង្ស័យខាងលើនេះ មានឈ្មោះ ម៉ៅ សាវ៉េត អាយុ២៤ឆ្នាំ មានទីលំនៅភូមិត្រពាំបី សង្កាត់ផ្សារឆ្នាំង ក្រុងកំពង់ឆ្នាំង គឺជាមុខសញ្ញាចាស់ ឆបោកម៉ូតូ។
កាលពីវេលាម៉ោងជាង១០យប់ថ្ងៃទី៣ មិនា ២០១៥ ជនសង្ស័យរូបនោះបានខ្ចីម៉ូតូម៉ាកស៊ុយហ្ស៊ុយគី ស្មាស់ ពណ៌ទឹកប៊ិច គ្មានស្លាកលេខ របស់មិត្តភក្តិម្នាក់ឈ្មោះ សុខ រស្មីហៅម៉ី អាយុ២៣ឆ្នាំ មានទីលំនៅភូមិទី២ សង្កាត់ខ្សាម ក្រុងកំពង់ឆ្នាំង ដោយបានប្រាប់ថា ខ្ចីទៅទារលុយគេ ហើយក៏បាត់ខ្លួនរហូត ។ ស្រាប់តែនៅព្រឹកថ្ងៃទី៦ មិនា ២០១៥ ម្ចាស់ម៉ូតូបានប្រទះឃើញជនសង្ស័យខាងលើនៅផ្ទះជួលមួយកន្លែងក្នុងភូមិធម្មយុត្តិ ក៏ព្រួតគ្នាចាប់ខ្លួនប្រគល់ឱ្យសមត្ថកិច្ចតែម្តង ៕
ចែករំលែកព័តមាននេះ