រាជធានីភ្នំពេញ ៖ ក្នុងពិធីបើកការដ្ឋានស្ថាបនាមហាវិថីថ្មីមួយខ្សែស្របប្រឡាយមេខាងជើងរាជធានីភ្នំពេញ នាព្រឹកថ្ងៃទី៧ខែកញ្ញានេះ លោក ឃួង ស្រេង អភិបាលរាជធានីភ្នំពេញ បានថ្លែងថា អាជ្ញាធររាជធានីភ្នំពេញ មិនអនុញ្ញាតអោយជនណាម្នាក់ឬក្រុមណាមួយធ្វើអំពើបែបអនាធិបតេយ្យនៅក្នុងទីក្រុងភ្នំពេញឡើយ ។
លោកបញ្ជាក់ថា សូមបងប្អូនមើលការផ្សព្វផ្សាយនៅប្រទេសគេឡើងវិញថា ស្រុកគេ គេបណ្តោយអោយធ្វើបែបអនាធិបេត្យចឹងទេ ចឹងការគ្រប់គ្រងប្រទេស គឺមានច្បាប់ទម្លាប់ត្រឹមត្រូវ ចំណែកប្រទេសយើងក៏មានច្បាប់ប្រទេសយើងដែរ ហេតុនេះហើយ អាជ្ញាធរភ្នំពេញ មិនអនុញ្ញាតអោយជនណាម្នាក់ឬក្រុមណាមួយធ្វើអំពើបែបអនាធិបតេយ្យនៅក្នុងទីក្រុងភ្នំពេញបានឡើយ ។
នេះជាសាររបស់លោក ឃួង ស្រេង អភិបាលរាជធានីភ្នំពេញ ខណ:មានអ្នកធ្វើបាតុកម្មដោយអហិង្សា ដើម្បីទាមទារតវ៉ារកយុត្តិធម៌សង្គម រយៈពេល៩ថ្ងៃ ចាប់ពីថ្ងៃទី៧ ដល់ថ្ងៃទី១៥ ខែកញ្ញា ឆ្នាំ២០២០ ចាប់ពីម៉ោង៨ព្រឹក ដល់ម៉ោង៦យប់ នៅទីលានប្រជាធិបតេយ្យ។
សូមបញ្ជាក់ថា ដោយមានការស្នើសុំធ្វើបាតុកម្មនោះថ្មីៗនេះ អាជ្ញាធរភ្នំពេញ បានបដិសេធ មិនអនុញ្ញាតអោយធ្វើបាតុកម្មដោយអហិង្សា ដើម្បីទាមទារតវ៉ារកយុត្តិធម៌សង្គម រយៈពេល៩ថ្ងៃ ចាប់ពីថ្ងៃទី៧ ដល់ថ្ងៃទី១៥ ខែកញ្ញា ឆ្នាំ២០២០ ចាប់ពីម៉ោង៨ព្រឹកដល់ម៉ោង៦យប់ នៅទីលានប្រជាធិបតេយ្យឡើយ ដោយសារ ៖ មិនអាចកំណត់សមាសភាព និងចំនួនអ្នកចូលរួមបានច្បាស់លាស់ លោក លោកស្រីបានធ្វើការអំពាវនាវតាមបណ្តាញសង្គមផេកឈ្មោះ ពលរដ្ឋសកម្ម ដែលខ្លឹមសារមានចរិតបំផុសញុះញង់ឱ្យប្រឆាំងជាមួយនឹងដំណើរការនីតិវិធីតុលាការ។
ក្នុងករណីមិនគោរពតាមស្មារតីកិច្ចប្រជុំ ជាមួយរដ្ឋបាលរាជធានីភ្នំពេញ កាលពី ថ្ងៃទី៣១ ខែសីហា ឆ្នាំ២០២០ លោក លោកស្រីត្រូវទទួលខុសត្រូវទាំងស្រុងចំពោះមុខច្បាប់ជាធរមាន។
ទាក់ទិនទៅនឹងពិធីបើកការរដ្ឋាន ស្ថាបនាផ្លូវខាងលើ លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានអោយដឹងថា ដើម្បីកាត់បន្ថយការកកស្ទះចរាចរណ៍ប៉ែកខាងជើងរាជធានីភ្នំពេញ ជាពិសេសនៅក្នុងភូមិសាស្ត្រខណ្ឌសែនសុខ ខណ្ឌឫស្សីកែវ និងខណ្ឌព្រែកព្នៅ រដ្ឋបាលរាជធានីភ្នំពេញ បានបើកការដ្ឋានស្ថាបនាមហាវិថីថ្មីមួយខ្សែ ដែលមានទទឹង៣០ម៉ែត្រ និងបណ្តោយផ្លូវជាង៥គីឡូម៉ែត្រ ដោយចាប់ពីផ្លូវលេខ១០០៣ ផ្លូវបត់ចូលផ្សារទំនើបអ៊ីអន ម៉លសែនសុខ ស្របប្រឡាយមេខាងជើងរាជធានីភ្នំពេញ រហូតដល់មហាវិថី ឈ្នះឈ្នះ ក្នុងខណ្ឌឫស្សីកែវ តភ្ជាប់ទៅខណ្ឌព្រែកព្នៅ កាត់មុខហ្គ្រេនភ្នំពេញ។
លោកបន្តថា ផ្លូវនេះជាប្រភេទផ្លូវបេតុង មានសួនច្បារកណ្តាល២ម៉ែត្រ ផ្លូវ១២ម៉ែត្រសងខាង ដែលអាចឲ្យរថយន្តធ្វើចរាចរណ៍បាន៣គន្លងទៅ ៣គន្លងមក មាន១គន្លងទៅមក សម្រាប់ម៉ូតូ មានចិញ្ចើមផ្លូវសងខាង២ម៉ែត្រ សម្រាប់អ្នកថ្មើជើង ជាមួយនឹងការដាក់លូសង្ខាងផ្លូវទំហំ៨តឹកផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ