ខេត្តកណ្តាល ៖ បុរសម្នាក់បានស្លា.ប់ភ្លាមៗនៅកន្លែងកើតហេតុយ៉ាងអណោចអធ័ម បន្ទាប់ពីត្រូវរ៉ឺម៉កម៉ូតូដឹកទឹកបរិសុទ្ធបើកកៀរ និងក្រឡាប់សង្កត់ពីលើ ខណៈកំពុងជិះម៉ូតូ
ខេត្តកណ្តាល ៖ បុរសម្នាក់បានស្លាប់ភ្លាមៗនៅកន្លែងកើតហេតុយ៉ាងអណោចអធ័ម បន្ទាប់ពីត្រូវរ៉ឺម៉កម៉ូតូដឹកទឹកបរិសុទ្ធបើកកៀរ និងក្រឡាប់សង្កត់ពីលើ ខណៈកំពុងជិះម៉ូតូម្នាក់ឯង កាលពីវេលាម៉ោង៤ និង៣០នាទីរសៀល ថ្ងៃទី០៣ មីនា តាមបណ្តោយផ្លូវជាតិលេខ៨ ចន្លោះគីឡូម៉ែត្រលេខ៣០-៣១ ស្ថិតក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្ដាល ។
ប៉ូលិសចរាចរណ៍ស្រុកខ្សាច់កណ្តាលបានឱ្យដឹងថា ជនរងគ្រោះឈ្មោះ យ៉ុង វណ្ណនឿន ភេទប្រុស អាយុ២១ឆ្នាំ មានទីលំនៅក្នុងភូមិតាំងឫស្សី ឃុំរកាជន្លឹង ស្រុកខ្សាច់កណ្ដាល ជិះម៉ូតូម៉ាកហុងដា C១២៥ ពណ៌ខ្មៅ ពាក់ស្លាកលេខ កណ្ដាល1C-9039 ចំណែកអ្នកបើករ៉ឺម៉កម៉ូតូក្រោយពេលកើតហេតុបានរត់គេចខ្លួនបាត់ ។
ប្រភពពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរ៉ឺម៉កម៉ូតូដឹកទឹកបរិសុទ្ធបោះដុំធ្វើដំណើរនៅតាមបណ្តោយផ្លូវជាតិលេខ៨ ដោយបើកបរក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើពុំដឹងជាមានឧបសគ្គអ្វីកើតឡើងនោះទេ ទើបបណ្តាលឲ្យរ៉ឺម៉កម៉ូតូរេចង្កូតទៅឆ្វេងដៃកៀរម៉ូតូជនរងគ្រោះ ដែលបើកបរបញ្ច្រាសទិសគ្នាធ្វើឲ្យរ៉ឺម៉កម៉ូតូក្រឡាប់ផ្ងារជើងសង្កត់លើម៉ូតូ និងជនរងគ្រោះរហូតស្លាប់នៅកន្លែងកើតហេតុតែម្តង ។
ប្រភពដដែលបានបន្តទៀតថា ក្រោយពីមានហេតុការណ៍កើតឡើងអ្នកបើកបររ៉ឺម៉កម៉ូតូបង្កហេតុបានរត់គេចខ្លួនបាត់ស្រមោល រីឯមធ្យោបាយពាក់ព័ន្ធទាំង២គ្រឿងត្រូវបានសមត្ថកិច្ចនគរបាលជំនាញចុះទៅធ្វើការវាស់វែងដកហូត បញ្ជូនទៅកាន់អធិការដ្ឋាននគរបាលស្រុកខ្សាច់កណ្តាលដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ