ខេត្តបាត់ដំបង ៖ បុរសម្នាក់ទំនងជាភ្លាត់ស្នៀតទើបត្រូវខ្សែរចរន្តអគ្គិសនីដែលខ្លួនពង្រាយសំរាប់ឆក់សត្វកណ្ដុរក្នុងស្រែប្រាំងឆក់ស្លាប់ កាលពីវេលាម៉ោងជិត៧ព្រឹក ថ្ងៃទី០៥ មិនា នៅក្នុងស្រែប្រាំង ដែលស្ថិតក្នុងភូមិគងទុំ ឃុំពាមឯក ស្រុកឯកភ្នំ។
អាជ្ញាធរបានឲ្យដឹងថា ជនរងគ្រោះឈ្មោះនី រូន អាយុ៣៥ឆ្នាំ នៅភូមិ-ឃុំខាងលើ។ បុរសនេះត្រូវសាច់ញាតិប្រទះឃើញស្លាប់នៅក្បែរភ្លឺស្រែ និងនៅលើខ្សែភ្លើងដែលខ្លួនពង្រាយសំរាប់ឆក់សត្វកណ្ដុរដែលចូលបំផ្លាញស្រូវប្រាំង។
មន្ត្រីដដែលបន្តថា ជនរងគ្រោះបានធ្វើស្រែប្រាំងនៅតំបន់នោះជាមួយអ្នកភូមិជាច្រើនទៀត ហើយនៅពេលយប់ពួកគេតែងពង្រាយខ្សែចរន្តអគ្គិសនី ដើម្បីឆក់សម្លាប់សត្វកណ្ដុរដែលតែងចូលបំផ្លាញស្រូវ តែពេលនេះបែរជាភ្លាត់ស្នៀតឆក់ខ្លួនឯងរហូតដល់ស្លាប់តែម្ដង។
អ្នកភូមិដែលធ្វើស្រែប្រាំងនៅតំបន់នោះបាននិយាយប្រាប់សមត្ថកិច្ចថា ជនរងគ្រោះមិនមែនប្រកបមុខរបរកសត្វកណ្ដុរលក់នោះទេ គឺគាត់គ្រាន់តែពង្រាយខ្សែភ្លើង ដើម្បីឆក់សត្វកណ្ដុរដែលចូលស៊ីស្រូវប្រាំងគាត់តែប៉ុណ្ណោះ។ សាក្សីដដែលបន្តថា រាល់លើកជនរងគ្រោះតែងបិទចរន្តភ្លើងមុនពេលដើរមើលសត្វកណ្ដុរងាប់តាមខ្សែភ្លើង តែលើកនេះទំនងជាភ្លេចបិទ ទើបមានគ្រោះថ្នាក់បែបនេះ។
សមត្ថកិច្ចដែលបានចុះពិនិត្យកន្លែងកើតហេតុបាននិយាយដែរថា ជនរងគ្រោះបានដើរជាន់ខ្សែចរន្តអគ្គិសនី ដែលដាក់កម្ពស់ផុតពីដីបន្តិច ហើយត្រូវខ្សែចរន្តឆក់ដូលប្រកាច់ស្លាប់ភ្លាមៗតែម្ដង៕
ចែករំលែកព័តមាននេះ