លោក បារ៉ាក់ អូបាម៉ា, លោក ហ្វ្រង់ស្វ័រ ហូឡង់ និងលោកស្រី អេនហ្សឺឡា ម័រកែល កាលពីថ្ងៃទី៣ មីនា បានសន្យាបញ្ចេញប្រតិកម្មខ្លាំងរបស់លោកខាងលិចក្នុងករណីបទឈប់បាញ់គ្នាត្រូវបំផ្លាញ នៅភាគខាងកើតអ៊ុយក្រែន ហើយអំពាវនាវឱ្យពង្រឹងតួនាទីរបស់អង្គការសន្តិសុខ និងកិច្ចសហប្រតិបត្តិការអឺរ៉ុប OSCE ដើម្បីត្រួតពិនិត្យបទឈប់បាញ់នោះ ។
វិមានប្រធានាធិបតីបារាំង អេលីហ្សេ ប្រកាសថា ជំហរនេះត្រូវបានព្រមព្រៀងគ្នា ក្រោយការពិភាក្សាតាមទូរស័ព្ទរវាងប្រធានាធិបតីបារាំង ប្រធានាធិបតីអាមេរិក និងអធិការបតីអាល្លឺម៉ង់ ព្រមជាមួយនឹងនាយករដ្ឋមន្ត្រីអង់គ្លេស លោក ដាវីដ កាមឺរ៉ូន នាយករដ្ឋមន្ត្រីអីុតាលី លោក Matteo Renzi ព្រមទាំងប្រធានក្រុមប្រឹក្សាអឺរ៉ុប លោក Donald Tusk ។
សេចក្តីប្រកាសមួយរបស់វិមានប្រធានាធិបតីបារាំង បញ្ជាក់ថាមេដឹកនាំទាំងនេះបានព្រមព្រៀងគ្នាបញ្ចេញប្រតិកម្មខ្លាំងមួយរបស់សហគមន៍អន្តរជាតិ ដែលចាំបាច់ក្នុងករណីមានការបំផ្លាញធ្ងន់ធ្ងរដល់បទឈប់បាញ់គ្នា ។
ដោយមិននិយាយចំៗ ការគំរាមនេះពិតណាស់សំដៅលើរុស្ស៊ី ។ មេដឹកនាំទាំង៦រូបនោះ ម្យ៉ាងទៀតចង់ឱ្យពង្រឹងមធ្យោបាយរបស់ OSCE ដើម្បីអាចធានាឱ្យមានការគោរពបទឈប់បាញ់គ្នា និងការដកអាវុធធុនធ្ងន់ ពីខ្សែរណសិរ្ស ។
ចំណែកនាយទាហានជាន់ខ្ពស់បំផុតអាមេរិក ឧត្តមសេនីយ៍ Martin Dempsey គាំទ្រឱ្យអាមេរិកជួយផ្តល់អាវុធដល់អ៊ុយក្រែន ក្នុងក្របខ័ណ្ឌអង្គការអូតង់ ។ នៅមុខគណៈកម្មការកងទ័ពរបស់ព្រឹទ្ធសភា ឧត្តមសេនីយ៍រូបនេះថ្លែងថា យើងគ្រោងផ្តល់អាវុធឱ្យអ៊ុយក្រែន ហើយប្រការនេះត្រូវធ្វើក្នុងក្របខណ្ឌអូតង់ ។ លោកយល់ថា ទិសដៅទីមួយរបស់លោក ពូទីន គឺកាច់បំបាក់អូតង់ ។
សម្រាប់ពេលនេះ អាមេរិកផ្តល់គ្រឿងឧបករណ៍យោធាដល់អ៊ុយក្រែន ពុំមែនជាអាវុធ ។ សមាជិកអូតង់ ពិសេសបារាំង និងអាល្លឺម៉ង់ បានប្រឆាំងចំពោះការលក់អាវុធឱ្យអ៊ុយក្រែន ព្រោះខ្លាចជម្លោះកាន់តែរាលដាលនៅអឺរ៉ុប ៕
ចែករំលែកព័តមាននេះ