ទីលាន Silverstone នឹងធ្វើជាម្ចាស់ផ្ទះព្រឹត្តិការណ៍ប្រណាំងម៉ូតូជីភី British Moto Grand Prix នៅប្រទេសអង់គ្លេសសម្រាប់ឆ្នាំ ២០១៥ និង២០១៦ ។
ក្រោយពីបានបាត់បង់សិទ្ធិក្នុងការរៀបចំព្រឹត្តិការណ៍ខាងលើនេះកាលពីឆ្នាំមុន Silverstone ដែលជាទីកន្លែងប្រណាំងរថយន្តហ្វមមូឡាវ័ន បានបញ្ជាក់កាលពីពេលថ្មីៗនេះថា កិច្ចព្រមព្រៀងថ្មីមួយរវាងអ្នកកាន់សិទ្ធិ Circuit of Wales និងក្រុមហ៊ុនរៀបចំការប្រណាំងម៉ូតូជីភី Dorma បានលេចចេញជារូបរាងពិតប្រាកដដោយថា ខ្លួនទទួលបានសិទ្ធិរៀបចំចំនួន២ឆ្នាំ ។
លោក Michael Carrick នាយកប្រតិបត្តិរបស់គម្រោងនេះបានបញ្ជាក់ថា ៖ «យើងមានសេចក្តីរីករាយយ៉ាងខ្លាំងដោយសូមប្រកាសថា យើងបានឈានដល់កិច្ចព្រមព្រៀងជាមួយ Silverstone សម្រាប់ការធ្វើជាម្ចាស់ផ្ទះព្រឹត្តិការណ៍ប្រណាំងម៉ូតូជីភី British Grand Prix ឆ្នាំ២០១៥ និង២០១៦ ។ យើងសូមថ្លែងអំណរគុណចំពោះការគ្រប់គ្រងថ្មីនៅទីលាន Silverstone បណ្តាដៃគូរបស់យើងនៅក្រុមហ៊ុន Dorna ព្រមទាំងអ្នកវិនិយោគដែលបានឆ្លើយតបយ៉ាងរហ័សទាន់តម្រូវការប្រណាំងឆ្នាំ២០១៥ ។ លោកបានបន្តថា ៖ «យើងសប្បាយចិត្តដែលអាចធានាបាននូវអនាគតនៃព្រឹត្តិការណ៍នេះសម្រាប់រយៈពេលពីរឆ្នាំទៅមុខក្នុងខណៈពេលដែលទីលានប្រណាំងរបស់យើងនៅឯប្រទេសវេលកំពុងតែសាងសង់ ។ ដូច្នេះ សេចក្តីប្រកាសនៅថ្ងៃនេះ គឺធានាថា យើងនឹងមានព្រឹត្តិការណ៍ប្រណាំងម៉ូតូ Grand Prix នៅប្រទេសអង់គ្លេសជាដដែលសម្រាប់ឆ្នាំនេះ» ។
សូមបញ្ជាក់ថា ដើម្បីសម្រួលដល់ព្រឹត្តិការណ៍ប្រណាំងម៉ូតូជីភី ទីលាន Silverstoneបានសម្រេចកែប្រែពេលវេលាការប្រណាំងរថយន្ត World Series ដែលមានស្រាប់ក្នុងគម្រោងរបស់ខ្លួនដោយរំកិលទៅធ្វើនៅចុងសប្តាហ៍ ខែកញ្ញាវិញ ។
លោក Patrick Allen នាយកគ្រប់គ្រងថ្មីរបស់ Silverstone បានឱ្យដឹងថា ៖ «ឆ្នាំកន្លងទៅថ្មីៗនេះ ការងារជាច្រើនត្រូវបានធ្វើដើម្បីធានាបានថា ក្រុមអ្នកគាំទ្រការប្រណាំង MotoGP ពេញចិត្តជាមួយអ្វីដែល Silverstone បានផ្តល់ជូន ។ វាក៏ជារឿងអាក្រក់មួយផងដែរ ដែលទីលាននេះបាត់បង់សិទ្ធិកាលពីរដូវស្លឹកឈើជ្រុះកន្លងទៅ ៕
ចែករំលែកព័តមាននេះ