កំពូលកីឡាការិនីល្បីឈ្មោះលំដាប់ពិភពលោករបស់ដាណឺម៉ាកការ៉ូលីន វ៉ូនីអាកគី បានគេចផុតពីសំណាងអាក្រក់ដូចឆ្នាំកន្លងទៅដោយបានឆ្លងផុតជុំទី១ ព្រឹត្តិការណ៍វាយកូនបាល់
កំពូលកីឡាការិនីល្បីឈ្មោះលំដាប់ពិភពលោករបស់ដាណឺម៉ាកការ៉ូលីន វ៉ូនីអាកគី បានគេចផុតពីសំណាងអាក្រក់ដូចឆ្នាំកន្លងទៅដោយបានឆ្លងផុតជុំទី១ ព្រឹត្តិការណ៍វាយកូនបាល់ BMW Malaysian Open ។
នៅលើទីលានប្រកួតក្រុងគួឡាឡាំពួ ប្រទេសម៉ាឡេស៊ី វ៉ូនីអាកគី ដែលទើបបែកបាក់គ្នាជាមួយមិត្តប្រុសបានផ្តួលកីឡាការិនីចិន Wang Yafan ក្នុងលទ្ធផលពិន្ទុ៦-៣ និង៦-១ ។
ការមកចូលរួមប្រកួតជាលើកដំបូងរបស់នាងវ៉ូនីអាកគីក្នុងកម្មវិធីខាងលើកាលពី២ឆ្នាំកន្លងទៅមិនបានប្រព្រឹត្តទៅដោយរលូននោះទេ ។ កីឡាការិនីរូបនេះបានរបូតធ្លាក់តាំងពីជុំទី១មកម្ល៉េះ ហើយកាលពីឆ្នាំទៅមិញ រឿងអាក្រក់ដដែលនេះក៏បានកើតលើនាងម្តងទៀត។ យ៉ាងណាក៏ដោយ ការប្រកួតរបស់នាងនៅឆ្នាំនេះ គឺល្អដាច់លើសឆ្នាំមុនៗ ។
ចំណែកកីឡាការិនីអាល្លឺម៉ង់ សាប៊ីន លីស៊ីកគី និងកីឡាការិនីអូស្ត្រាលី Casey Dellacqua បានជួបនឹងសំណាងអាក្រក់បន្ទាប់ពីបានធ្លាក់ចេញពីការប្រកួត ។ នាងស៊ីកគីដែលជាកីឡាការិនីចំណាត់ថ្នាក់លេខ២ របស់កម្មវិធីបានបរាជ័យក្រោមថ្វីដៃកីឡាការិនីរូម៉ានី Alexandra Dulgheru ក្នុងលទ្ធផល៦-៤ និង៧-៥ ខណៈនាង Dellacqua កីឡាការិនីចំណាត់ថ្នាក់លេខ៣ បរាជ័យក្រោមថ្វីដៃនាង Su-Wei Hsieh មកពីតៃវ៉ាន់ ។
ផ្ទុយពីនេះ នាង Julia Goerges , Klara Zakopalova និងនាង Jarmila Gajdosova សុទ្ធតែឡើងទៅជុំបន្ត ។ Goerges បំបាក់នាងAlla Kudryavtseva ក្នុងលទ្ធផល៦-១ និង៧-៦ ខណៈនាង Zakopalova បំបាក់នាង Patricia Mayr-Achleitnerក្នុងលទ្ធផល៦-១និង៦-៣ ។
ក្នុងពេលដំណាលគ្នានេះដែរ នៅឯទីក្រុង Nuevo Leon ប្រទេសម៉ិកស៊ិក កីឡាការិនីជើងខ្លាំងរបស់អុីតាលី Sara Errani បានឆ្លងផុតជុំបើកឆាកកម្មវិធី Abierto Monterrey Afirme ក្រោយពីផ្តួលគូប្រកួតមកពីអាមេរិក Lauren Davis ក្នុងលទ្ធផល៦-០ និង៦-៣ ។ ចំណែកកីឡាការិនីស៊ែប៊ីអាណា អុីវ៉ាណូវិច ក៏បានឡើងទៅជុំបន្តផងដែរក្រោយយកឈ្នះកីឡាការិនីឆែក Nicole Vaidisova ក្នុងលទ្ធផល៦-១ និង៧-៦ ។ ស្របពេលជាមួយគ្នា កីឡាការិនីអុីតាលី Francesca Schiavone បានផ្តួលកីឡាការិនីអាមេរិក Bethanie Mattek-Sands ក្នុងលទ្ធផល ៣-៦, ៧-៦ និង៦-៤ ។
លទ្ធផលគូផ្សេងទៀតមានដូចជា នាង Caroline Garcia មកពីបារាំង យកឈ្នះនាង Karin Knapp មកពីអុីតាលី ក្នុងលទ្ធផល៧-៥ និង៧-៦ ខណៈនាង Urszula Radwanska មកពីប៉ូឡូញ យកឈ្នះនាង Maria Teresa Torro មកពីអេស្ប៉ាញ ក្នុងលទ្ធផល៧-៦ និង៧-៦ ៕
ចែករំលែកព័តមាននេះ