រដ្ឋមន្រ្តីក្រសួងសុខាភិបាលមិនឆ្លើយសំណួរអ្នកកាសែតរឿងអ្នកផ្ទុកមេរោគអេដស៍នៅភូមិរកា
រាជធានីភ្នំពេញ ៖រដ្ឋមន្រ្តីក្រសួងសុខាភិបាល លោក ម៉ម ប៊ុនហេង មិនឆ្លើយទៅនឹងសំណួររបស់អ្នកកាសែតដែលបានសួរពីការវិវត្តក៍ដូចជាស្ថានភាព
រាជធានីភ្នំពេញ ៖រដ្ឋមន្រ្តីក្រសួងសុខាភិបាល លោក ម៉ម ប៊ុនហេង មិនឆ្លើយទៅនឹងសំណួររបស់អ្នកកាសែតដែលបានសួរពីការវិវត្តក៍ដូចជាស្ថានភាពរបស់អ្នកផ្ទុកមេរោគអេដស៍និងអ្នកកើតជំងឺអេដស៍នៅក្នុងភូមិរកា ស្រុកសង្កែ ដោយលោកគ្រាន់តែតបទៅអ្នកកាសែតវិញថា សួរខុសប្រធានបទ ។
លោករដ្ឋមន្រ្តីក្រសួងសុខាភិបាលមិនឆ្លើយសំណួរអ្នកកាសែត បានធ្វើឡើងនៅក្រោយពេលដែលលោកបញ្ចប់ការចូលទៅបំភ្លឺគណៈកម្មការទី៨នៃរដ្ឋសភាពាក់ព័ន្ឋនឹងសេចក្តីព្រាងច្បាប់ស្តីពីការត្រួតពិនិត្យថ្នំាជក់ នាព្រឹកថ្ងៃទី០៤ មីនា ២០១៥ នៅវិមានរដ្ឋសភាជាតិ និងបន្ទាប់ពីមានសេចក្តីរាយការណ៍ពីខេត្តបាត់ដំបងនៅថ្ងៃនេះថា អ្នកផ្ទុកមេរោគអេដស៍នៅភូមិរកា៥នាក់បានស្លាប់ និង ០៥នាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរបំផុត ។
គួររំលឹកថា មេរោគអេដស៍ដែលឆ្លងរាលដាលទៅលើប្រជាពលរដ្ឋនៅភូមិរកា ឃុំរកា ស្រុកសង្កែនេះ គឺបានផ្ទុះឡើងកាលពីថ្ងៃ០៨ ធ្នូ ២០១៤ បន្ទាប់ពីក្រុមគ្រូពេទ្យនៅមណ្ឌលសុខភាពឃុំរកា បានចាប់ផ្ដើមធ្វើតេស្ដឈាមទៅតាមគម្រោងរបស់មន្ទីរសុខាភិបាលខេត្ត ដែលផ្តោតជាចម្បងទៅលើស្ត្រីមានផ្ទៃពោះ និងបន្ទាប់បន្សំទៅលើអតិថិជនទូទៅ ដើម្បីរកមេរោគអេដស៍និងរោគស្វាយ។ ក្រោយពីផ្ទុះនូវរោគសញ្ញាដ៏គ្រោះថ្នាក់នេះ ប្រជាពលរដ្ឋនៅក្នុងភូមិរកា ឃុំរកា ស្រុកសង្កែ បានភ្ញាក់ផ្អើលយ៉ាងខ្លាំង ហើយនាំគ្នាសម្រុកកាន់តែច្រើនឡើងៗរាល់ថ្ងៃ ទៅឲ្យគ្រូពេទ្យនៅមណ្ឌលសុខភាពឃុំពិនិត្យឈាមរកមេរោគអេដស៍ ។ ការធ្វើតេស្ដឈាមប្រជាពលរដ្ឋប៉ុន្មានថ្ងៃដំបូង លទ្ធផលបានបង្ហាញថា ប្រជាពលរដ្ឋក្មេងចាស់ប្រុសស្រីជិត២០% នៃអ្នកទៅធ្វើតេស្ដឈាមមានប្រតិកម្ម(ឆ្លងមេរោគអេដស៍) ដែលចំនួននេះក្រោយមកបានកើនដល់ជាង២០០នាក់៕
ចែករំលែកព័តមាននេះ