ខេត្តមណ្ឌលគិរី៖ឈើប្រណិតរាប់រយកំណាត់ត្រូវគេរាយការណ៍ថាបានប្រទះឃើញ គេជីកដីលាក់ទុក ដើម្បីបំបាំងភ្នែកសមត្ថកិច្ចជំនាញ ហើយឈើទាំងនោះត្រូវគេសង្ស័យថា អាចមានជាប់ពាក់ព័ន្ធជាមួយនិងឈើខុសច្បាប់ ដែលមិនមានការបង់ពន្ធត្រឹមត្រូវជូនរដ្ឋ
ខេត្តមណ្ឌលគិរី៖ឈើប្រណិតរាប់រយកំណាត់ត្រូវគេរាយការណ៍ថាបានប្រទះឃើញ គេជីកដីលាក់ទុក ដើម្បីបំបាំងភ្នែកសមត្ថកិច្ចជំនាញ ហើយឈើទាំងនោះត្រូវគេសង្ស័យថា អាចមានជាប់ពាក់ព័ន្ធជាមួយនិងឈើខុសច្បាប់ ដែលមិនមានការបង់ពន្ធត្រឹមត្រូវជូនរដ្ឋ ។
សេចក្តីរាយការណ៍បានបន្តឲ្យដឹងថា គេឃើញមានគ្រឿងចក្រកំពុងតែ ធ្វើសកម្មភាពកាយនិងជីកដីដែលមានទំហំប្រមាណជា៥០ម៉ែត្រការ៉េ ដើម្បីកប់កំណាត់ឈើទាំងនោះ នៅចំណុចភូមិឆក់ដែក ឃុំស្រែសង្គម ស្រុកកោះញែក ខេត្តមណ្ឌលគិរី ។ តែទោះជាយ៉ាងណាប្រភពព័ត៌មាន មិនបានបញ្ជាក់ថា គ្រឿងចក្រទាំងនោះកប់ឈើលាក់ ក្នុងមូលហេតុអ្វីនោះទេ ។ ឬអាចជាឈើខុសច្បាប់ក៏មិនដឹង?ហើយភូមិសាស្ត្រនិងចំណុចដែលមានការកប់ឈើនោះត្រូវគេបញ្ជាក់ថា នៅក្បែរនិងបរិវេណ ក្រុមហ៊ុនវិនិយោគមួយឈ្មោះ ខេន ច័ន្ទនុរក្សផងដែរ ។
កាលពីកំឡុងមុនចូលឆ្នាំប្រពៃណីចិន គេបានឃើញមានអណ្តាតភ្លើង ឆាបឆេះយ៉ាងខ្លាំង ក្នុងទីតាំងក្រុមហ៊ុនខេន ច័ន្ទ នុរក្ស និងបានឆេះឈើប្រណិតដែលមានមុខកាត់ធំៗអស់មួយចំនួន ថែមទៀត ។ ប៉ុន្តែគេមិនបានដឹង អំពីមូលហេតុនៃការឆេះ នឹងមានមនុស្សរងគ្រោះ ក្នុងអគ្គិភ័យឬយ៉ាងណានោះទេ ។
លោកសំរ៉ង់ ឌីវិចិត្រនាយកដែនជំរកសត្វព្រៃភ្នំព្រេច បានឲ្យដឹងថាពាក់ព័ន្ធជាមួយអគ្គិភ័យឆាបឆេះឈើក្នុងក្រុមហ៊ុនខេន ច័ន្ទនុរក្ស លោកមិនបានជ្រាបនោះទេ ព្រោះខាងក្រុមហ៊ុនមិនបានជូនដំណឹងអ្វីទាំងអស់ ។ ចំណែកឈើដែលគេរាយការណ៍ថា មានកប់លាក់ក្បែរក្រុមហ៊ុនខាងលើ លោកមិនហ៊ាននិយាយថា ជាឈើរបស់ក្រុមហ៊ុនខាងលើនោះទេ ។ លោកថា លោកនិងបញ្ជូនមន្ត្រីឲ្យទៅស្រាវជ្រាវ និងសិក្សាលើ កន្លែងដែលកប់ឈើទាំងនោះ ។ លោកបានបញ្ជាក់ទៀតថាក្រុមហ៊ុនខេន ច័ន្ទនុរក្សបានវិនិយោគដីព្រៃសម្បទានសេដ្ឋកិច្ចនៅចំណុចខាងលើ ដើម្បីដាំដំណាំកៅស៊ូ និងមានសិទ្ធប្រមូលផលអនុផលព្រៃឈើ រួចបង់ពន្ធជូនរដ្ឋ មុនការដឹកជញ្ជូនចេញ ។
ជាមួយគ្នានោះលោក ម៉ិល សឿន អភិបាលស្រុកកោះញែក បានឲ្យដឹងផងដែរថា ក្រុមហ៊ុនខេន ច័ន្ទនុរក្ស កំពុងតែដាំដុះបានចំនួន៥០០ហិចតា លើទំហំផ្ទៃដីសរុប១,៥០០ហិចតា ។ ចំណែករឿងមានកប់ឈើ លោកមិនបានដឹងនោះទេ ។
ក្រោយការសាកសួរទៅមន្ត្រីជំនាញ នាយផ្នែករដ្ឋបាលព្រៃឈើកោះញែក នាយកដែនជំរកសត្វព្រៃភ្នំព្រេច អធិការនគរបាលស្រុកនិងអជ្ញាធរពាក់ព័ន្ធមួយចំនួន គេអាចសន្និដ្ឋានថា មន្ត្រីទាំងនោះហាក់មានការបិទបាំង និងរុញដាក់គ្នាទៅវិញទៅមក មិនព្រមបកស្រាយជុំវិញករណីខាងលើនោះទេ ។ ដោយឡែកតំណាងក្រុមហ៊ុន ក៏មិនអាចស្វែងរកការបំភ្លឺបាននោះឡើយនៅថ្ងៃរសៀលថ្ងៃទី៣ មិនា នេះ។
យ៉ាងណានោះមជ្ឈដ្ឋាននានាកំពុងរង់ចាំមើលអំពីលទ្ធផល និងចំណាត់ការ ទៅលើរណ្តៅកប់ឈើនៅទឹកដីនៃស្រុកកោះញែកនោះ ថានិងមានចំណាត់ការយ៉ាងណាចំពោះផ្លូវច្បាប់ ៕
ចែករំលែកព័តមាននេះ