រាជធានីភ្នំពេញ៖ គ្រោះថ្នាក់ចរាចរក្នុង១ម៉ោងមាន២ករណី ដោយបើករថយន្តគេចម៉ូតូជិះបញ្ច្រាស់ផ្លូវជ្រុលទៅបុករបាំងថ្មពុះចែកទ្រូងផ្លូវ បណ្តាលឲ្យបាក់រងការខូចខាតចំនួន៦កង់ ប៉ុន្តែមិនបង្កឲ្យរងរបួសដល់មនុស្សណាម្នាក់នោះទេ គ្រាន់តែរថយន្តទាំង២បានដាច់ការឡេកង់មុខតែប៉ុណ្ណោះ ។
ករណីទី១កើតឡើងនៅវេលាម៉ោង៨និង១០នាទីយប់ ថ្ងៃទី០៣ ខែមីនា ឆ្នាំ២០១៥ នៅជិតហាងលក់ម៉ូតូគង់ ហុង ដោយរថយន្តកូរ៉េ ១គ្រឿង បើកបរដោយបុរសម្នាក់ ធ្វើដំណើរពីត្បូងទៅជើង ស្រាប់តែមកដល់ចំណុចកើតហេតុ ក៏បួងចង្កូតគេចម៉ូតូដែលបើកបញ្ច្រាស់ផ្លូវ ជ្រុលទៅបុករបាំងថ្មបាក់អស់ចំនួន៥កង់ ។
ចំណែកករណីទី២កើតឡើងនៅវេលាម៉ោង៩និង១០នាទីយប់ ថ្ងៃដដែលបុរសជនជាតិកូរ៉េ២នាក់បានជិះរថយន្តម៉ាកBM ក្នុងទិសដៅពីត្បូងទៅជើង តាមបណ្តោយមហាវិថីព្រះមុន្នីវង្ស ដូចគ្នា ស្រាប់តែមកដល់ចំណុចកើតហេតុដែលប៉ូលិសកំពុងវាស់វែងមិនទាន់ចប់ផង ក៏រេចង្កូតទៅបុករបាំងថ្មកន្លែងតែមួយ បង្កឲ្យរបាំងថ្មខូចខាតថែម១កង់ទៀត ដោយសារតែគេចពីម៉ូតូដែលជិះបញ្ច្រាស់ផ្លូវដូចករណីខាងលើ ។ករណីទាំង២ខាងលើកើតនៅក្នុងសង្កាត់ផ្សារដើមថ្កូវ ខណ្ឌចំការមន ដោយសារតែស្ថានភាពផ្លូវមានការតូចចង្អៀត ព្រោះធ្វើលូ ដូច្នេះផ្លូវមួយចំហៀងត្រូវបានបិទ ទុកតែមួយចំហៀងឲ្យធ្វើចរាចរទៅមកតែប៉ុណ្ណោះ ។
ក្រោយកើតហេតុរថយន្តបង្កទាំង២គ្រឿងត្រូវបានសមត្ថកិច្ចប៉ូលិសខណ្ឌចំការមកធ្វើការវាស់វែងយកទៅរក្សាទុកនៅអធិការដ្ឋានខណ្ឌចំការមន ៕
ចែករំលែកព័តមាននេះ