ខេត្តកំពង់ឆ្នាំង ៖ បុរសម្នាក់បានបាត់ខ្លួន និង២នាក់ទៀតជាឪពុក និងកូនបានបរងរបួសក្នុងហេតុការណ៍គ្រោះថ្នាក់ចរាចរណ៏ផ្លូវទឹកមួយបានកើតឡើង កាលពីវេលាម៉ោង៨ និង៣០នាទីយប់ ថ្ងៃទី០២ មីនា ២០១៥ នៅចំណុចព្រែកក្រពើ ស្ថិតក្នុងភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៌ ខណៈដែលជនរងគ្រោះទាំង៣នាក់ជាឪពុក កូន និងកូនប្រសារ ចេញទៅនេសាទត្រីនៅពេលយប់ ។
លោក ជាង សុវណ្ណារិទ្ឋ អធិការនគរបាលស្រុកបរិបូរណ៌បានមានប្រសាសន៍ថា ជនរងគ្រោះទាំង៣នាក់ មាន១-ឈ្មោះ នី ណេ អាយុ៣១ ឆ្នាំជាកូនប្រសារ បានបាត់ខ្លួនក្នុងពេលកើតហេតុ ២-ឈ្មោះ ហ៊ន រី អាយុ៤៩ ជាឪពុកក្មេក រងរបួសធ្ងន់ និង៣-ឈ្មោះ រី ធា អាយុ១៣ឆ្នាំ ជាកូនប្រុសឈ្មោះ ហ៊ន រី ។ ទាំង៣នាក់មានទីលំនៅ ខេត្តកំពង់ធំ តែបានមកស្នាក់នៅឃុំឆ្នុកទ្រូ ស្រុកបរិបូរណ៌ ខេត្តកំពង់ឆ្នាំង ដើម្បីនេសាទត្រីដោយបង់សំណាញ់ និងឆ្អើរត្រី ។
លោកបានបន្តថា មុនពេលកើតហេតុ ជនរងគ្រោះទាំង៣នាក់ ជាឪពុក និងកូន បានជិះកាណូតបាឡាស្មាច់ទៅនេសាទត្រីដូចសព្វដង តែពេលមកដល់ចំណុចកើតហេតុ ស្រាប់តែបុកគ្នាជាមួយកាណូតមួយគ្រឿងទៀត ដែលជាកាណូតឈើ និងធំជាងកាណូតជនរងគ្រោះ បណ្តាលឱ្យកាណូតជនរងគ្រោះក្រឡាប់ និងរងរបួសទាំងអស់គ្នា ក្នុងនោះកូនប្រសារប្រុសឈ្មោះ នី ណេ បានបាត់ខ្លួនតែម្តង ។
ជនរងគ្រោះត្រូវបានដឹកទៅសង្គ្រោះ (មិនដឹងដឹកទៅពេទ្យណាទេ)។ តាមព័ត៌មានបន្ថែមបានឱ្យដឹងថា នៅវេលាម៉ោង២ និង២០នាទីរៀសល ថ្ងៃទី៣ មីនា ២០១៥ នេះ សពជនគ្រោះបានរកឃើញហើយ នៅចំណុចកើតហេតុ ហើយត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅខេត្តកំពង់ធំ ។ សមត្ថកិច្ចបាននិយាយថា ពេលនេះកំពុងស្រាវជ្រាវរកកាណូតបង្កហេតុ៕
ចែករំលែកព័តមាននេះ