កីឡាករប្រដាល់អង់គ្លេស ថៃសាន់ ហ្វឺរីកំពុងសម្លឹងរកការជួបប្រកួតដណ្តើមខ្សែក្រវាត់ទម្ងន់ធ្ងន់ពិភពលោកពីកីឡាករអ៊ុយក្រែន វ្ល៉ាឌីមៀ ឃ្លីតស្កូ ក្រោយពីរក្សាបានខ្សែក្រវាត់ទម្ងន់ធ្ងន់ទ្វីបអឺរ៉ុបរបស់ខ្លួននៅសង្វៀន O2 Arena ទីក្រុងឡុងដ៍ ប្រទេសអង់គ្លេស កាលពីចុងសប្តាហ៍កន្លងទៅ ។
ហ្វឺរី បានផ្តួលកីឡាកររូម៉ានី Christian Hammer ឱ្យសន្លប់ក្នុងទឹកទី៨ រក្សាបានឯតទគ្គកម្មមិនធ្លាប់ចាញ់របស់ខ្លួនដល់២៤លើក ។
ស្ថិតក្នុងវ័យ២៦ឆ្នាំ និងជាអ្នកទទួលបានសិទ្ធិវាយដណ្តើមខ្សែក្រវាត់ស្ថាប័ន WBO ពីវ្ល៉ាឌីមៀ ជាផ្លូវការផងនោះ ហ្វឺរី បានបញ្ជាក់ថា ៖ «ពេលនេះ ខ្ញុំបានរៀបចំខ្លួនរួចស្រេចហើយដើម្បីជួបជាមួយ វ្ល៉ាឌីមៀ ។ ខ្ញុំជាកីឡាករដែលរីកចម្រើនលឿន ហើយនេះក៏ជាហេតុផលសមរម្យមួយសម្រាប់ការជួបជាមួយវ្ល៉ាឌីមៀនៅពេលបន្ទាប់» ។
គួរកត់សម្គាល់ថា អំឡុងការប្រកួតកាលពីថ្ងៃសៅរ៍ ហ្វឺរី បានប្រើប្រៀបផ្នែកកម្ពស់ និងចម្ងាយដៃរបស់ខ្លួនវាយចូលចំៗគោលដៅ ។ កីឡាករ Hammer ត្រូវបានអាជ្ញាកណ្តាលរាប់ចំនួនមួយលើកក្នុងទឹកទី៥ បន្ទាប់ពីរងការវាយផ្ទួនៗចំផ្ទៃមុខពីសំណាក់កីឡាករហ្វឺរី ។ ដោយឃើញ កីឡាកររបស់ខ្លួនហាក់គ្មានអ្វីតបតទៅដៃគូ ក្រុមអ្នកឱ្យទឹកកីឡាករ Hammer បានសម្រេចបោះកន្សែងសុំចុះចាញ់ក្នុងទឹកទី៨ ។
ហ្វឺរី បានថ្លែងបន្ទាប់ពីការប្រកួតថា ៖ «ខ្ញុំមកទីនេះដើម្បីផ្តល់ការរីករាយដល់បណ្តាអ្នកគាំទ្រ ។ ខ្ញុំមកទីនេះដើម្បីប្រកួតជាមួយដៃគូល្អៗ និងស្វិតស្វាញ ។ អំឡុងការប្រកួតនេះ កីឡាករ Hammer បានទទួលរងកណ្តាប់ដៃច្រើនរាប់មិនអស់ ហើយអ្នកឱ្យទឹករបស់គេបានដឹងពីស្ថានការណ៍ រួចសម្រេចចិត្តបញ្ឈប់ការប្រកួតតែម្តង» ។
មើលលើឯតទគ្គកម្មប្រកួត ហ្វឺរី ពេលនេះគឺ២៤លើក ឈ្នះទាំង២៤លើក ក្នុងនោះគេឈ្នះដោយផ្តួលគូប្រកួតឱ្យសន្លប់ចំនួន១៨លើក ។ ឯវ្ល៉ាឌីមៀ ឃ្លីតស្កូ វិញ នៅក្នុងចំនួនប្រកួតសរុប៦៦លើក គេឈ្នះ៦៣ ចាញ់៣ មិនដែលស្មើ និងធ្លាប់ផ្តួលគូប្រកួតឱ្យសន្លប់បានចំនួន៥៣លើក ៕
ចែករំលែកព័តមាននេះ