រាជធានីភ្នំពេញ ៖ ក្នុងគោលបំណងបង្កើនស្មារតីរួមគ្នាក្នុងការកាត់បន្ថយការចម្លងបទចម្រៀងរបស់បរទេសជាបណ្តើរៗ និងរួមគ្នាបង្កើតស្នាដៃតែងនិពន្ធបទភ្លេង និងទំនុកច្រៀងថ្មីដោយខ្លួនឯង ក្រសួងព័ត៌មានបានរៀបចំមហោស្រពតន្ត្រី និងចម្រៀងសម័យថ្នាក់ជាតិឆ្នាំ២០១៥ ដែលគ្រោងនឹងចាប់ផ្តើមឡើងនៅអំឡុងដើមខែកក្កដា និងបញ្ចប់នៅសប្តាហ៍ចុងក្រោយខែសីហា ២០១៥ខាងមុខនេះ ។
ថ្លែងនៅក្នុងសន្និសីទសារព័ត៌មាននៅក្រសួងព័ត៌មាននាថ្ងៃទី៣ មិនា ២០១៥នេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានមានប្រសាសន៍ថា ការរៀបចំមហោស្រពតន្ត្រី និងចម្រៀងសម័យថ្នាក់ជាតិឆ្នាំ២០១៥នេះ ជាការរៀបចំលើកទី៣របស់ក្រសួងព័ត៌មាន បន្ទាប់ពីអាក់ខានរយៈពេល២ឆ្នាំដោយសារតែក្រសួងមានការងារច្រើនដើម្បីបំពេញ រួមទាំងកង្វះខាតថវិកាផងដែរ។
លោករដ្ឋមន្ត្រីបញ្ជាក់ថា ការរៀបចំមហោស្រពកន្លងមកនេះក្រសួងបានខិតខំ និងព្យាយាមមិនយកថវិការដ្ឋមកចំណាយនោះទេ ប៉ុន្តែបានស្វះស្វែងរកដៃគូរសំខាន់ក្រុមហ៊ុននិងសប្បុជនដើម្បីចូលរួមចំណែកក្នុងការរៀបចំ និងប្រព្រឹត្តិទៅនៃមហោស្រពដ៏មានសារៈសំខាន់នេះ ។
លោក ខៀវ កាញារីទ្ធ ក៏បានថ្លែងអំណរគុណផងដែរចំពោះសប្បុជនដែលបានចូលរួមចំណែកក្នុងការរៀបចំមហោស្រពឲ្យប្រព្រឹត្តទៅដោយរលូន និងទទួលបានជោគជ័យក្នុងនោះអរគុណចំពោះសិល្បករ សិល្បការិនីដែលបានចំណាយពេលវេលា និងកំលាំងចូលរួមប្រកួតប្រជែងក្នុងមហោស្រព បើទោះបីជាមិនជាប់ចំណាត់ថ្នាក់ ឬក៏ទទួលបានរង្វាន់ជ័យលាភីតិចតួចក៏ដោយចុះ ហើយស្មារតីទាំងនោះបានបង្ហាញនូវគំនិតរួមគ្នាដើម្បីកាត់បន្ថយការចម្លងបទចម្រៀងរបស់បរទេសជាបណ្តើរៗ និងរួមគ្នាបង្កើតស្នាដៃតែងនិពន្ធបទភ្លេង និងទំនុកច្រៀនថ្មីដោយខ្លួនឯងសំដៅលើកកម្ពស់សិល្បៈវប្បធម៌ខ្មែរ។
លោក ជា ច័ន្ទបរិបូរណ៌ រដ្ឋលេខាធិការក្រសួងពត៌មានបានរំលឹកថា ព្រឹត្តិការណ៍នេះ ធ្លាប់បានកើតឡើង៣ដងរួចមកហើយ គឺម្តងនៅក្នុងឆ្នាំ១៩៦៣ នាទីក្រុងកែបក្នុងរជ្ជកាលដ៏រុងរឿងរបស់ព្រះករុណា ព្រះមហាវីរក្សត្រ ព្រះវររាជបិតាជាតិខ្មែរ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ និង២លើកទៀតនាពេលថ្មីៗនេះ គឺក្នុងឆ្នាំ២០១១ មហោស្រពប្រឡងតន្ត្រី និងចម្រៀងសម័យថ្នាក់ជាតិឆ្នាំ២០១១ និងមហោស្រពប្រឡងតន្ត្រី និងចម្រៀងសម័យថ្នាក់ជាតិឆ្នាំ២០១៣ ។
លោកបញ្ជាក់ថា មហោស្រពប្រឡងតន្ត្រី និងចម្រៀងសម័យថ្នាក់ជាតិទាំង២លើកនេះ បានប្រសូត្រឡើងក្រោមការផ្តួចផ្តើមឡើងដោយក្រសួងព័ត៌មាន ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ